﻿Ayub.
35.
Yarra-dd Ilihu, inna: 
Ma ittɣiř ac aya nican, aqa teqqared: ‘Tasegda inu ktar x tenni n Arebbi’? 
Maɣar tennid: ‘Man řefḍeř ɣarek? Min d ayi dd ɣa ikkaren aqa necc war tteggeɣ ddnub?’ 
Ad xak dd-arreɣ, uřa x imeddukkař nnec akidek. 
Xzar ajenna, u xzar, ḥekkar iseynuten tiwa nnec qaɛ! 
Mařa texḍid, min i d as tᵉttegged s man aya? Mařa iɛeddiyen nnec d aṭṭas, min zzayes i d as i ɣa tawyed? 
Mařa cek d amsegged, min i d as tᵉtticed s uya, niɣ min itteṭṭef Netta zeg ufus nnec? 
Aqa tuɛeffna nnec třeqqef aryaz am cek waha, u tasegda nnec tᵉttiři di ṭṭweɛ n ijj n mmis n bnadem waha. 
Sɣuyyun zeg waṭṭas n řeḥṣarat, ttřaɣan ɣar twiza zi ssibbet n uɣiř n ayt n bu-ṣṣulṭa. 
Maca uřa d ijjen iqqar: ‘Mani iǧa Arebbi, wenni d ayi iggin, wenni itticen izřan n uṣebbeḥ di ǧiřet, 
wenni d aneɣ isseřmaden s řmař n temmurt, d wenni d aneɣ itteggen d imiɣisen s ijḍaḍ n ujenna?’ 
Dinni sɣuyyun nitni, maca Netta war dd-ittarri, zi ssibbet n nnfaxet n iɛeffanen. 
S tidett, Arebbi war ittesři ɣar iɣuyyan ibeṭṭřen, Amzemmar x kuřci war kides iřehhi. 
Waxxa cek teqqared, aqa cek war t tᵉttwiřid, tᵉttɣima tmesřact ɛad zzat i wudem nnes. Raja t xenni. 
Mařa řexxu axeyyeq nnes war iccit ɛad, ma xenni Netta war issin x uɛeddi imɣar? 
Ayub icarreg aqemmum nnes baṭeř, ittegg awařen imeqqranen nhřa tussna. 
