﻿Ayub.
30.
Řexxu maca tuɣa ḍeḥḥcen xafi iḥudriyyen nni iǧan d imeẓyanen xafi deg wussan, inni babatsen war ɣari sekkwin maḥend ad ten ggeɣ ɣar yiṭan i iǧan x wuǧi inu. 
Min ɣa ggeɣ xenni s jjehd n ifassen nsen? Aqa ifna jjehd nsen zi ssibbet n tewsar. 
Zi řqiǧet u zi řaẓ dewřen isriwen, ttmeɣzazen di řwaṭa yuẓɣen di tubbarcent teccur s ureddeǧ d urebbej. 
Nitni řeqqḍen řebzar ameǧaḥ jar cbarq, iẓewran n uzezzu d aɣrum nsen. 
Uẓẓřen xasen zi tmunet n iwdan, kkwaren ten am yixewwanen, 
ḥima ad zedɣen di teɣzurin issaggʷaden, deg ifran n ucař u di řejruf. 
Sɣuyyun jar cbarq, sadu tizeggwarin ssmunan. 
Tarwa n ibuhařiyyen d tarwa břa isem, d inni uẓẓřen xasen zi temmurt s uzeǧaḍ. 
Řexxu maca aqa ayi deg izři nsen n tẓawart, dewřeɣ asen i řhard.    
Carrhen ayi, ttaggʷajen xafi, war ttseḍḥin ca maḥend ad ssusfen x uɣembub inu. 
Maɣar Netta issefsi asɣun n tqiḍunt inu uca issehwa ayi. Nitni nḍaren ssrimet nsen zzati. 
Ɣar uɣezdis afusi inu kkaren-dd xafi iɣeddiwen n tarrawt, ɛarrnen iḍaren inu, ssgeɛɛaden xafi imesraq n arẓiyyet nsen. 
Abrid inu arẓin t, arennyen tamara x tamara inu waxxa nitni simant nsen war ɣarsen iǧi wi d asen ɣa iwcen afus. 
Axmi dd-ttasen zeg ijj n unuqqib d miriw, ttakkwaḍen am řemwaj yareddǧen. 
Ttwakebben-dd xafi inexřiɛen, am usemmiḍ ḍeffaren nitni ccan inu, iḍwa zzhar inu am yijj n useynu. 
S uya ifessi řexxu řeɛmar inu dayi, ussan n řeɣben mennɛen ayi. 
Di ǧiřet issnuqqub ayi iɣsan inu i dayi iǧan, řeḥriq i d ayi ittɣezzan war yaressi. 
Ittwabeddeř warrud inu s jjehd nnes ameqqran ařami war xafi tteɛqiřen ɛad. Icarf ayi am tma i innḍen i warzem n yiri deg warruḍ. 
Inḍar ayi deg ubeǧaɛ, dewřeɣ am ucař d yiɣɣeḍ. 
Sɣuyyuɣ ɣarek, maca Cek war xafi dd-tᵉttarrid, necc beddeɣ da uca Cek tᵉqqimed tḥeṭṭid dayi. 
Cek tdewřed ayi am yijj n bu-řexcunet, tᵉttdarraced xafi s ufus nnec ijehden. 
Cek tessgeɛɛaded ayi u tneddhed ayi deg usemmiḍ, tessefraɣed qaɛ addud inu. 
Maɣar necc ssneɣ aqa Cek ad ayi tnedhed ɣar řmewt, ɣar taddart mani ttmunen marra inni iddaren. 
Ma war ineṭṭar bnadem afus nnes mařa iwḍa ḥed, ma war isɣuyyu walu qaɛ ɣar arẓiyyet nnes? 
Ma war ruɣ x wenni tuɣa ɣar iǧa wussan n tamara, ma war icḍin buḥbeř inu x umezřuḍ? 
Umi ssitmeɣ ɣar min iṣebḥen, aqa yusa-dd min iǧan d aɛeffan, umi rajiɣ tafawt, tusa-dd taǧest. 
Adan inu ttnennan, war arsin, iwḍen-dd wussan n tamara ɣari. 
Necc ad uyureɣ deg wecḍan, břa řehmu n tfuct. Ad kkareɣ deg wegraw n řgens uca ad qqimeɣ sɣuyyuɣ deg ujenna. 
I wuccanen n řexřa dewřeɣ d umatsen zzaysen, i yessis n nnɛamet d amɛacar. 
Tiřmect inu tedweř xafi d akarkuc abarcan, zi tmessi cemmḍen iɣsan inu. 
Tedweř tirart n řgambri inu i wecḍan, tamja inu i řḥess n imeṭṭawen. 
