﻿Ayub.
29.
Uca yarni issgeɛɛed Ayub řhard n lmatal nnes, inna: 
Mři ǧiɣ am deg uyenni n iyuren iɛdun aṭṭas zeg wami, am deg uyenni n wussan řami d ayi tuɣa iḥeṭṭa Arebbi, 
řami igga řefnar nnes ad yareɣ x uzeǧif inu, u tuɣa ggureɣ di taǧest s tfawt nnes. 
Mři ǧiɣ am deg wussan n temẓi inu, umi amuni di řaman ak-d Arebbi tuɣa ibedd x tqiḍunt inu, 
umi Amzemmar x kuřci tuɣa-t ɛad akidi, u iḥenjiren inu ɛad nnḍen ayi-dd, 
umi iṣuraf inu tuɣa ɛummen di trussi, u taṣḍart tuɣa tᵉttzeǧaɛ zzati tiɣezratin n zzect! 
Umi dd-ffɣeɣ ɣar tewwart n tendint, jjiɣ ssbedden ayi řkursi inu deg wazzay, 
nnufaren iḥudriyyen řami d ayi ẓrin, u imeccaybuten kkaren, qqimen bedden. 
Řḥukkam menɛen awařen nsen u ssarsen afus x uqemmum nsen. 
Tmijja n řḥukkam tesqar, iřseq iřes nsen ɣar waneɣ nsen. 
Mařa isřa ayi umezzuɣ, issemɣar ayi, mařa teẓra ayi tiṭṭ, teched x řxaḍar inu. 
Maɣar ssnejmeɣ řmeskin nni isɣuyen, ayujiř nni war ɣares tuɣi wenni t i ɣa iɛawnen. 
Řxaḍar n wenni tuɣa ɛřayen ad ihellek, tusa-dd xafi, uř n tajjač ggiɣ t isřiwřew s řefraḥet. 
Yarḍeɣ tasegda u tasegda tessyarḍ ayi. Tuɣa ccreɛ inu am useřham u am areẓẓet. 
Tuɣa ayi d tiṭṭawin i idarɣařen, uřa d iḍaren i iqiḍaren. 
Tuɣa ayi d babatsen i imezřaḍ, uca ddeɛwet n wenni war ssineɣ, beqqceɣ tt. 
Arẓiɣ tiɣmas n teɣmart n wenni iggin min war iseggden uca kkseɣ zzardet i teɣmas nnes. 
Nniɣ: ‘Ad ssuffɣeɣ buḥbeř inu x řɛucc inu, ad ddareɣ tudart tazirart am ujḍid n funiks.’ 
Iẓewran inu bezzɛeɣ ten ař aman u di ǧiřet iqqim nnda x řefruɛ inu. 
Tuɣa řɛezz inu iqqim akidi řebda, řqews inu isheř deg ufus inu řebda. 
Sřin-dd ɣari, rajan, sqaren di ṭṭweɛ n ccwar inu. 
Awarni wawař inu war ssiwřen twařa nneɣni, awařen inu udumen xasen. 
Nitni rajan ayi am rajan anẓar, arzmen aqemmum nsen am t arezmen ɣar wenẓar n tefsut. 
Mařa sfarnineɣ ɣarsen, war zemmaren ɛad ad ttiqqen, maca tafawt n uɣembub inu war zmiren ad kides mmɛařan. 
Ixḍareɣ asen abrid, beddeɣ asen ɣar uzeǧif, zedɣeɣ am ujeǧid jar řɛeskar, am wenni ittɛezzan inni iceḍnen. 
