﻿Ayub.
27.
Yarni issgeɛɛed Ayub řhard n lmatal nnes, inna: 
S tidett am iddar Arebbi nni i d ayi ikksen tasɣart inu, Amzemmar x kuřci nni issarzagen řeɛmar inu, 
min ɣa yekk nnefs ɛad dayi u arruḥ n Arebbi ɛad deg wenzaren inu, 
war qqaren iyencicen inu řɣecc u iřes inu war iqqar ixarriqen! 
Iggʷej xafi ad ggeɣ kenniw di tseyyarest n tidett. Ař ɣa ssuffɣeɣ buḥbeř inu, war ttejjiɣ ad xafi kksen asegged inu. 
Ad ṭṭfeɣ di tsegda inu, war zzayes arexxuɣ ca. Uř inu war d as yarexxu uřa x ijjen zeg wussan inu. 
Mři dd-iban řeɛdu inu d aɛeffan, wenni akidi ittmenɣan d mmis n řmuɛṣiyyet. 
Maɣar man řayas n umnafeq, xmi ɣa tᵉttwaqḍeɛ tudart nnes, xmi zzayes i ɣa iqřeɛ Arebbi řeɛmar nnes? 
Ma ad iseř Arebbi i iɣuyyan nnes, xmi xas dd ɣa iwḍa řḥeṣran? 
Ma ad ifarḥ ɣar Umzemmar x kuřci? Ma ad iřaɣa x Arebbi meřmi ma? 
Necc ad awem ssřemdeɣ x ufus n Arebbi, min iɛewweř Umzemmar x kuřci, war t ssnuffareɣ. 
Xzar, kenniw marra idwem teẓrim t. Mayemmi tarennyem tessuffuɣem min ibeṭṭřen teqqarem: 
“Ta d tasɣart n bnadem aɛeffan ɣar SIDI, tasɣart n ayt n bu-řexcunet nni i ɣa ṭṭfen zeg Umzemmar x kuřci: 
Xmi ɣa mmarenyen iḥenjiren nnes, i ssif umi urin. Iɣedduten nnes war ttyawanen aɣrum,    
wi zzayes i ɣa yarewřen ad ttwaneḍřen s ṭṭaɛun, tijjař nnes war ttrunt ca. 
Waxxa ijarruw nnuqart anect n ucař, u issewjad arruḍ anect n ucař, 
iwa, waxxa ad t issewjed, amsegged ad zzayes yarḍ uca amezdag ad ibḍa nnuqart. 
Ad ibna taddart nnes am tcinda, amecnaw tanwalt i issbedda uɛessas i yixef nnes. 
Ad dayes iṭṭeṣ d bu-wagřa, maca war yarenni deg wagřa nnes. Mařa yarzem tiṭṭawin nnes, war din ittɣimi ɛad walu. 
Inexřiɛen ad xas arenyen am iɣezran n waman, taḥaryaḍt ad t-i-dd-teqḍeɛ s ǧiřet. 
Asemmiḍ zi ccarq ad t iksi, iwa dinni ittraḥ, ad t-i-dd-iqřeɛ zeg wemcan nnes. 
Arebbi ad issiweḍ marra aya x uzeǧif nnes, war xas issɛizzi ca. Ad yarweř deɣya zi tecti n ufus nnes. 
Iwdan ad xas wwten deg ifassen nsen am zzayes sthezzan uca ad xas ṣeffaren zeg wemcan n tzeddiɣt nnes.” 
