﻿Ayub.
23.
Yarra-dd Ayub, inna: 
Uřa d ass-a acetci inu d aɣennan, issedqeř afus inu x uneffes inu. 
Mři ssneɣ, mani zemmareɣ ad t afeɣ, maḥend ad awḍeɣ ɣar tzeddiɣt nnes. 
Xenni ad bezzɛeɣ zzates ddeɛwet, ad ccureɣ aqemmum inu s wawařen i ucarreɛ. 
Ad ssneɣ awařen i xafi dd ɣa yarr, ad fehmeɣ min i d ayi ɣa yini. 
Ma ittxeṣṣa as ad imcarreɛ akidi s jjhed ameqqran? Lla, ejj i-t ad ayi iwc taynit waha. 
Dinni ad kides imcarreɛ wenni icnan u ammu necc ad nnufsřeɣ i řebda zi Řqaḍi inu. 
Maca xzar, mařa uyureɣ ɣar ccarq, ammu war din iǧi Netta, u mařa uyureɣ ɣar řɣarb, ammu war d as ttḥekkareɣ. 
Mařa ɣares cɣeř di ccamal, war t ttwiřiɣ, mařa inneqřeb-dd ɣar ljanub, war t ẓarreɣ. 
Maca Netta issen abrid i ggureɣ, ittqeǧeb ayi, ad ffɣeɣ am wureɣ. 
Imneɛ uḍar inu di jjurrat nnes, abrid nnes ḍfareɣ t, war zzayes ffiɣeɣ. 
Tawṣiyyet zeg uqemmum nnes war zzayes arxuɣ. Awařen n uqemmum nnes xemmřeɣ ten, mahu min xef ttwaweṣṣiɣ. 
Maca mařa Netta ḍidd n ca n yijjen, man wen i t ɣa imenɛen zi man aya? Min ixs řeɛmar nnes, ad t yegg. 
Maɣar Netta isseqfař min i d ayi yura, u aqa din aṭṭas n tmesřayin am tina ɣares di řbař. 
X uya ttnexřaɛeɣ zzat i uɣembub nnes, aqa fehmeɣ tt mliḥ, u tteggʷedeɣ zzayes. 
Maɣar Arebbi issefciř uř inu, Amzemmar x kuřci issnexřaɛ ayi. 
Maɣar war ttnexřiɛeɣ zi taǧest, uřa zeg wudem inu nni ittřeḥḥef s tubbarcent. 
