﻿Ayub.
15.
Xenni yarra-dd Ilifaz, wenni dd-yusin zi Tayman, inna: 
Ma ittarra-dd ijj n umiɣis s tussna ixwan? Ma ad iccur aɛeddis nnes s usemmiḍ i dd-ittasen zi manis dd-tneqqar tfuct? 
Ma ittcarraɛ s řharي war ineffɛen, s wawařen nni war ittakkwaḍen? 
Cek tarẓid tiggʷudi n Arebbi, tekksed taẓaǧit zzat i wudem n Arebbi. 
Maɣar aqemmum nnec issargeb řmuɛṣiyyet nnec, aqa itteɛjib ac řhard s tḥraymect s yiřes nnec. 
Aqemmum nnec ad cek iḥkem, war iǧi necc, iyencicen nnec ad xak cehden. 
Ma cek d bnadem d amezwaru nni dd-ittwaxeřqen? Niɣ tᵉttwarwed qbeř tiwririn? 
Ma tessḥessed i wegraw n imcawaren imtiqqan n Arebbi, ma tjebbded tiɣit ɣarek? 
Min tessned cek, neccin war t nessin? Min tfehhmed cek, aqa inqeṣ ɣarneɣ? 
Uřa jar aneɣ d amcaybu d uwessar, nitni d imɣaren deg wussan x babac. 
Ma asfewwej n Arebbi drus ɣarek, niɣ ijj n wawař ssiwřen t akidek s terɣeɣ? 
Mayemmi cek issetlaɛ wuř nnec, mayemmi qeǧɛent tiṭṭawin nnec, 
aqa tessneqřabed buḥbeř nnec x Arebbi, ařami tessuffuɣed marra awařen nni zeg uqemmum nnec? 
Min iɛna bnadem aqa netta ad yiři d amezdag, min iɛna wenni dd-ittwaxeřqen zi temɣart, aqa netta ad yiři d amsegged? 
Xzar, imqeddasen nnes war xasen ittciř, uřa d ijenwan war ǧin ṣfan di tiṭṭawin nnes! 
Ahtat ɛad ijj n nnɛi n bnadem d bu-ufessad, wenni isessen min war iḥřin am waman! 
Necc xseɣ ad ac t ssecneɣ, seř-dd ɣari, xenni ad ɛawdeɣ min ẓriɣ, 
min ɛawden imiɣisen, am war ffaren ca n řejdud nsen. 
I nitni waha umi temmewc temmurt, uřa d ijj n řbarrani war xas iɛdu. 
Marra ussan i iddar uɛeffan, imarret ixef nnes, řqedd n iseggʷusa i ittwaxemmřen i bu-řexcunet, aqa inuffar xas. 
Yudef-dd řḥess n iɣuyyan issnexřaɛen ɣar imezzuɣen nnes. Ɛad di řweqt n řehna ad xas iwḍa umteḥḥay. 
Netta war ittriji ad dd-iɛqeb zi taǧest, maca aqa netta ittwagg i ssif. 
Netta ittemhafa da d diha x weɣrum. ‘A, mani i yeǧa?’ Netta issen aqa ittraja i-t wass d abarcan deɣya. 
Ḍḍiqet d řeḥṣaret ssaggʷadent netta, arnint i-t am yijj n ujeǧid iwjed i umenɣi. 
Maɣar ɣar Arebbi isswiẓẓaḍ netta afus nnes, ak-d Umzemmar x kuřci imenneɛ taɣennant tameqqrant. 
S yiri imeḥḍen ittazzeř ɣares, innufrar ɣar ḍeffar n tseddariyin nsen n uɛeskari s ibuṭunen igdaren. 
Maɣar iřeḥḥef i uɣembub nnes s tadunt, igga tadunt i tejɛinna nnes. 
Izeddeɣ di tneddam ittwahedmen, di tudrin war daysent izeddeɣ ɛad uřa d ijj, tinni yuran maḥend ad dewřent d řxirbat. 
Netta war iddikkwiř d bu-wagřa, agřa nnes war ittɣimi, mařa min dd-ikseb war yarenni x temmurt. 
Netta war inejjem i taǧest, aceɛɛař n tmessi ad yecc řefruɛ nnes, ad ifna s řeɛwin n uqemmum nnes. 
Ejj i-t war ittciři x řɣecc, maɣar xenni i ɣa tiři uřa d řmunet nnes d řɣecc. 
Mařa war dd-yusi ɛad wass nnes, ad ittwakemmeř ɛad, maɣar taseṭṭa n tini nnes war tzeyziw. 
Ad isseɣḍeř aḍiř war issnedyen nnes am yict n tzayart, ad immenḍar nnuwar nnes am tzitunt. 
Maɣar abarru n imnafqen aqa-t břa řɣiǧet u timessi tᵉttett iqiḍan i iccuren s řɣecc. 
Aqa aten s ddeyset zi tamara, tturwen řɣecc, řexdeɛ aqa-t deg uɛeddis nsen. 
