﻿Ayub.
11.
Xenni yarra-dd Ṣufar, wenni dd-yusin zi Naɛma, inna: 
Ma ad qqimen waṭṭas n wawařen břa tamwarrit, u ma ad ɣares yiři i yijj n bu-uqemmum řḥeqq řebda? 
Ma izemmar řhard nnec ad issɣed iwdan, ařami tzemmared ad testehzid břa cek i ɣa isseḥcem uřa d ijj? 
Cek tennid: ‘Teṣfa tɣuri inu, aqa ayi d amezdag di tiṭṭawin nnec!’ 
Uh, mři Arebbi Simant nnes issawař, mři yarezzem iyencicen nnes qibač nnec. 
Mři Netta d ac i ɣa isscen timesřayin ixemmřen n tiɣit, maɣar nitenti sekkwant ddubel i ufekki. Ssen, aqa Arebbi ad ittu aṭṭas n řmuɛṣiyyet nnec di tizi nnec. 
Ma tzemmared ad tbeqqced di mummu n Arebbi? Ma tzemmared ad tadfed ɣar řekmaret n Umzemmar x kuřci? 
Aqa-ten di řuɛřat n ujenna! Min texsed ad tegged ɛad? Tiɣit tuǧeɣ x řaxart! Min tzemmared ad zzayes tessned? 
Řeɛbar nnes yuɛřa aṭṭas x temmurt, tiru nnes teɛdu aṭṭas x tmiriwt n řebḥar. 
Mařa iɛdu Netta, ibelleɛ x ca n yijjen uca iřaɣa as i ddeɛwet, man wen i t ɣa issbedden? 
Maɣar Netta issen iɣeccacen, ittwařa řɣecc břa ma t iḥḍa. 
Maca mařa abuhaři izemmar ad yaf řefhamet, xenni aɣyuř n řexřa izemmar ad idweř d bnadem. 
Mařa cek tɛedřed uř nnec, xenni bezzeɛ ifassen nnec ɣares. 
Mařa irṣeq řɣecc ɣar ufus nnec, saggʷej i-t, war ttejji ddeǧ ad izdeɣ di tqidunin nnec, 
maɣar xenni tzemmared ad tessgeɛɛded udem nnec břa řɛib, ad tbedded nican, war tteggʷeded ca. 
Maɣar ad tᵉttud řeɣben nnec, ɛemmarṣ war dayes tᵉttxemmimed ɛad am ɛemmarṣ war tᵉttxemmimed ɛad ɣar waman iɛdun. 
Abrid n tudart nnec ad yarɣ tiwa x ṭṭḥa n uziř, waxxa din taǧest, ad tiři am teffut. 
Ad tacid ixef nnec di řaman, minzi aqa din řayas, ad texzared deg wenneḍ, ad tᵉṭṭṣed di řhudnet. 
Ad tezzřed nhřa cek issnexřeɛ uřa d ijj, uca aṭṭas i cek i ɣa zawgen zzat i wudem nnec. 
Maca tiṭṭawin n iɛeffanen ad ddarɣřent, qaɛ tarewřa ad asen tweddar, ad meẓren ad deřqen i buḥbeř. 
