﻿Ayub.
1.
Tuɣa din ijj n weryaz di temmurt n Ɛuṣ qqaren as Ayub. Aryaz-a tuɣa ikmeř d amsegged, itteggʷed zi AREBBI u ittḥeyyad x min iǧan d aɛeffan. 
Ttwarwen as-dd sebɛa n iḥenjiren d třata n tḥenjirin. 
Taḥimart n řmař nnes dayes sebɛa-ařaf n wuǧi u teřt-ařaf n iřeɣman d xemsa-mya n tyuyawin n iyenduzen d xemsa-mya n teɣyař, arni ɣares abarru n isemɣan. Aryaz-a tuɣa d ameqqran x marra arraw n ccarq. 
Iḥenjiren nnes nnumen tteggen ijj n umensi, kuř ijj zzaysen s nnubet nnes deg wass nnes di taddart nnes. Ssekken, ɛarḍen uřa x třata n suyᵉtmatsen ad kidsen ccent u ad kidsen swent. 
Řami ɛdun wussan n zzardet awarni nnḍen zi taddart ɣar taddart nneɣni, issekk Ayub ḥima ad ten issqeddes. Zic ɣar tuffut ikkar uca yiwi din tiɣarṣi n wecmaḍ anect lɛadad n marra arrawen nnes. Maɣar Ayub inna: “Ad taɣ xḍan arrawen inu u ḥeyyden x AREBBI deg wuř nsen.” Ammu i igga Ayub řebda. 
Deg ijj n wass usin-dd arraw n AREBBI ḥima ad bedden zzat i SIDI, uca yusa-dd uřa d cciṭan di řwesṭ nsen. 
Inna SIDI i cciṭan: “Manis i dd-tusid cek?” Yarra-dd cciṭan x SIDI, inna: “Usiɣ-dd zeg wetlaɛ x temmurt, kkiɣ tt marra.” 
Inna SIDI i cciṭan: “Ma teḥḍid amsexxar inu Ayub? Am netta war iǧi x temmurt: d aryaz ikmeř, iggur nican, itteggʷed AREBBI u ittḥeyyad x min iǧan d aɛeffan!” 
Yarra-dd cciṭan x SIDI, inna: “Ma amenni waha itteggʷed Ayub AREBBI? 
Ma war iǧi d Cek, wenni iggin ijj n useřqi i netta d taddart nnes d marra min ɣares? Aqa tbarked timegga n ifassen nnes uca řmař nnes imɣar aṭṭas di temmurt. 
Swiẓẓeḍ mɣir afus nnec ɣares, ḥada marra min iǧan nnes, ma xenni s tidett ad ibeɛɛed x wudem nnec?” 
Xenni inna SIDI i cciṭan: “Xzar, marra min ɣares aqa-t deg ufus nnec. Mɣir war d as swiẓẓiḍ afus nnec waha!” Xas uca yuyur cciṭan zi zzat n wudem n SIDI. 
Deg wass min di tuɣa iḥenjiren nnes d yessis ttᵉtten u sessen binu di taddart n umatsen amenzu, imsar, 
aqa yusa-dd ijj n ureqqas ɣar Ayub, inna: “Ifunasen tuɣa carrzen u tiɣyař heddant x uɣezdis nsen. 
Xenni hejmen ayt n Caba, ksin ten uca nɣin iḥudriyyen s řeqḍeɛ n ssif. Mɣir necc waha inejmen, ḥima ad ac t ɛawdeɣ.” 
Umi tuɣa wa ɛad issawař, yusa-dd ijj nneɣni, inna: “Timessi n AREBBI tewḍa-dd zeg ujenna uca tarɣa deg wuǧi d iḥudriyyen uca tecca i-ten. Mɣir necc waha inejmen, ḥima ad ac t ɛawdeɣ.” 
Umi tuɣa wa ɛad issawař, yusa-dd ijj nneɣni, inna: “Ayt n Ikaldaniyyen ssbedden třata n bandiyyat, hejmen x iřeɣman, ksin ten uca nɣin iḥudriyyen s řeqḍeɛ n ssif. Mɣir necc waha inejmen, ḥima ad ac t ɛawdeɣ.” 
Umi tuɣa wa ɛad issawař, yusa-dd ijj nneɣni, inna: “Iḥenjiren nnec d yessic ccin u swin binu di taddart n umatsen amenzu. 
Uca xzar, yusa-dd ijj n usemmiḍ iwɛar x tiwa n řexřa, iřqef arebɛa n tɣemmura n taddart uca tewḍa taddart x iḥudriyyen d tḥudriyyin uca mmuten nitni. Mɣir necc waha inejmen, ḥima ad ac t ɛawdeɣ.” 
Xenni ikkar Ayub, icarreg aseřham nnes, iḥeff azeǧif nnes, iwḍa x temmurt uca ibendeq, 
inna: “D aɛaryan i dd-usiɣ zeg uɛeddis n yemma u d aɛaryan i din i ɣa dewřeɣ. SIDI iwca, SIDI ikkes, ad ittwabarek Isem n SIDI.” 
Di man aya marra war ixḍi Ayub ca u war inni min war iɛeddřen x AREBBI. 
