﻿Istir.
6.
Di ǧiřet nni simant nnes tuɣa yugi ad ikk iḍeṣ x ujeǧid uca inna ad as dd-awyen adlis n řidaret n imezruyen uca ɣrin zzaysen zzat i wudem n ujeǧid. 
Ittwaf uran dayes, aqa Murdaxay ixebbar x Biɣtana d Tarac, tnayen n imsexxaren icennɛen n ujeǧid, zeg iɛessasen n tewwart, inni tuɣa yarezzun ad wten afus n ujeǧid Aḥacwiruc. 
Xenni inna ujeǧid: “Man ccan d řemɣaret i ittwaggen i Murdaxay x man aya?” Imsexxaren iḥuḍriyyen n ujeǧid nni tuɣa i d as ittsexxaren, nnan: “War d as ittwagg walu di ṭṭweɛ nnes!” 
Xenni inna ujeǧid: “Wi din barra deg wazzay?” Haman tuɣa ɛad mammec dd-ittadef ɣar wazzay n taddart n ujeǧid i iǧan ɣar barra qaɛ ḥima ad yini i ujeǧid ḥima ad yayeř Murdaxay ɣar tḥenact n wayař, tenni i d as issewjed. 
Imsexxaren n ujeǧid nnan as: “Aqa d Haman i da ibedden deg wazzay.” Xenni inna ujeǧid: “Ejj i-t ad yadef!” 
Xmi yudef Haman, inna as ujeǧid: “Min ɣa ittwaggen ak-d weryaz i umi ixs ujeǧid ad t icenneɛ?” Ixemmem Haman deg wuř nnes: “Man wen ixs ujeǧid ad icenneɛ ktar zzayi?” 
S uyenni yarra-dd Haman x ujeǧid: “Aryaz i ixs ujeǧid ad t icenneɛ, 
ad as immewc tcamir igellden i zi innum ujeǧid ad yarḍ uřa d ayis i xef innum ujeǧid ad iniy uca ad ssarsen ijj n ttaj igellden x uzeǧif nnes. 
Ad ggen tcamir d uyis deg ufus n ijj zi řḥukkam n ujeǧid, ijjen zi tarwa n taṣiřet, uca ad zzayes ssyarḍen aryaz nni i ixs ujeǧid ad icenneɛ uca ad t ssnedhen x uyis deg wazzay n tendint, uca ad barrḥen: ‘Ammu i ɣa ittwagg ak-d weryaz, wenni ixs ujeǧid ad t icenneɛ!’” 
Xenni inna ujeǧid i Haman: “Qeǧeq, ksi tcamir d uyis am mammec tennid uca egg amenni ak-d Murdaxay wenni iqqimen di tewwart n ujeǧid u war ttejji uřa d ijj n wawař ad iwḍa zi marra min tessiwřed.” 
Iksi Haman tcamir d uyis uca issyarḍ Murdaxay s tcamir u issnedh i-t x wazzay n tendint uca issekkar abarreḥ qibač nnes: “Ammu i ɣa ittwagg ak-d weryaz wenni umi ixs ujeǧid ad as icenneɛ!’” 
Awarni aya iɛqeb Murdaxay ɛawed ɣar tewwart n ujeǧid, maca Haman yuyur deɣya ɣar taddart, iḥzen u tuɣa azeǧif nnes iřeḥḥef. 
Iɛawed Haman i Zarac, tamɣart nnes, u i marra imeddukkař nnes marra min i d as imsaren. Xenni nnan as imiɣisen nnes d Zarac, tamɣart nnes: “Mařa Murdaxay, wenni zzat i wudem nnes tebdid ad tewḍid, zi zzariɛet n Wudayen i yeǧa, war d as tzemmared, maca s tidett ad tewḍid zzat i wudem nnes.” 
Umi nitni ssiwřen ɛad akides, usin-dd imsexxaren icennɛen d ujeǧid uca qeǧqen ad awyen Haman ɣar zzardet nni tessewjed Istir. 
