﻿Naḥamya.
12.
Ina d ikehhanen d Ilawiyyen inni dd-igeɛɛden ak-d Zarubabbil, mmis n Caɛaltiyil, d Yahucaɛ: Saraya, Irmiya, Ɛizra, 
Amarya, Mallux, Ḥaṭṭuc, 
Cakanya, Raḥum, Marimut, 
Ɛiddu, Jinnituy, Abiya, 
Miyamin, Maɛadya, Bilja, 
Camɛiya, Yuyarib, Yadaɛya, 
Sallu, Ɛamuq, Ḥilqiya d Yadɛaya. Ina d izeǧifen n ikehhanen d aytmas deg wussan n Yahucaɛ. 
Uca Ilawiyyen d ina: Yecuɛa, Binnuy, Qadmiyil, Carabya, Yahuda d Mattanya, wenni iǧan x izřan n uqadi, jmiɛ ak-d aytmas. 
Baqbuqya d Ɛunni, aytmatsen, tuɣa ḥeṭṭan arendad nsen. 
Yecuɛa ijja-dd Yuyaqim, u Yuyaqim ijja-dd Ilyacib, u Ilyacib ijja-dd Yuyadaɛ, 
u Yuyadaɛ ijja-dd Yunatan, u Yunatan ijja-dd Yadduɛ. 
Deg wussan n Yuyaqim tuɣa d izeǧifen-a n řaǧat n ibabaten d ikehhanen: i řaǧat n Saraya: Maraya, i řaǧat n Irmiya: Ḥananya, 
i řaǧat n Ɛizra: Macullam, i řaǧat n Amarya: Yuḥanan, 
i řaǧat n Maliku: Yunatan, i řaǧat n Cabinya: Yusuf, 
i řaǧat n Ḥarim: Ɛadna, i řaǧat n Marayut: Ḥilqay, 
i řaǧat n Ɛiddu: Zakariyya, i řaǧat n Jinnitun: Macullam, 
i řaǧat n Abiya: Zikri, i řaǧat n Minyamin d Muɛadya: Filṭay, 
i řaǧat n Bilja: Cammuɛa, i řaǧat n Camɛiya: Yunatan, 
i řaǧat n Yuyarib: Mattanay, i řaǧat n Ɛuzzi: Yadaɛya, 
i řaǧat n Sallay: Qallay, i řaǧat n Ɛamuq: Ɛabir, 
i řaǧat n Ḥilqiya: Ḥacabya u i řaǧat n Yadaɛya: Natanayil. 
Deg wussan n Ilyasib, Yuyadaɛ, Yuḥanan d Yadduɛ, ttwazemmemen izeǧifen x ibabaten n řaǧat n Ilawiyyen uřa d ikehhanen ař tagelda n Dariyus, Afarsi. 
Ttwazemmemen ayt n Lawi, izeǧifen x ibabaten n řaǧat, deg wedlis n imezruyen ař ussan n Yuḥanan, mmis n Ilyacib. 
Izeǧifen n Ilawiyyen tuɣa Ḥacabya, Carabya d Yecuɛa, mmis n Qadmiyil, u aytmatsen bedden ajemmaḍin nsen ḥima ad ssemɣaren u ad qadan, am mammec tuɣa teǧa tewṣeyyet n Dawud, aryaz n AREBBI. Ijj tuɣa iḥeṭṭan arendad n wenneɣni i tuɣa iḥeṭṭan. 
Tuɣa Mattanya, Baqbuqya, Ɛubadya, Macullam, Ṭalmum d Ɛaqqub iɛessasen n tewwart inni iɛessen x ixxamen n řexzen n tewwura n tendint. 
Ina tuɣa aten deg wussan n Yuyaqim, mmis n Yahucaɛ mmis n Yuṣadaq, uřa deg wussan n Naḥamya, lwali, u n ukehhan Ɛizra, amseřmed n idlisen. 
Ɣar udeccen n řḥiḍ n Urcalim arzun nitni x Ilawiyyen di marra imucan nsen maḥend ad ten awyen ɣar Urcalim ḥima nitni ad ssqefřen adeccen, ad ggen řefraḥet s uqadi u s yezřan, s teǧunin n wuzzař, s lharpat d řgambriyat. 
Nitni ssmunen x ayt n imedyazen zeg udewwar n Urcalim u zi dcurat n Unaṭufati, 
u zi Bayt-Jiljal uřa zeg iyyaren n Jiba d Ɛazmawet, minzi imedyazen bnan i yixef nsen dcurat i dd-innḍen i Urcalim. 
Ssizedgen ikehhanen d Ilawiyyen ixef nsen uca awarni i uya ssizedgen nitni uřa d řgens d tewwura d řḥiḍ. 
Xenni ggiɣ řḥukkam n Yahuda ad nyen x řḥiḍ u ssbeddeɣ tnayen n terbiɛin n uɣennej i uqadi. Tuyur ict n terbiɛt ɣar yefus sennej x řḥiḍ ɣar Tewwart n Řeɣbar. 
Yareddef i-tt Hucaɛya s yijj n wezyen n řḥukkam n Yahuda, 
Ɛazarya, Ɛizra, Macullam, 
Yahuda, Binyamin, Camɛiya d Irmiya, 
u zeg ayt n ikehhanen inni ɣarsen řebwaq: Zakariyya, mmis n Yunatan, mmis n Camɛiya, mmis n Mattanya, mmis n Mixa-Yah, mmis n Zakkur, mmis n Asaf, 
d aytmas Camɛiya d Ɛazaryil, Milalay, Jilalay, Maɛay, Natanayil d Yahuda, Ḥanani ak-dduzan n řmusiqa n Dawud, aryaz n AREBBI, uca zzat i wudem nsen tuɣa iggur Ɛizra, amseřmed n idlisen. 
Ɣar Tewwart n Tařa uca xenni nican qibač nsen nyen ddrujjat n tendint n Dawud mani dd-igeɛɛed řḥiḍ, ttekken x taddart n Dawud ař Tawwart n Waman, ɣar ccarq. 
Tarbiḥt n uqadi wiss tnayen tuyur ɣar jjihet nneɣnit uca necc areddfeɣ tt ak-d wezyen nneɣni n řgens, nekka x řḥiḍ ɣar uɣezdis n Lburj n Tefqunt ař řḥiḍ amiriw, 
uca xenni nekka x Tewwart n Ifrayim u x Tewwart Taqdimt u x Tewwart n Iseřman d Lburj n Ḥananiyil d Lburj n Mya ař Tawwart n Wuǧi uca nitni qqimen bedden ɣar Tewwart n Řeḥbes. 
Xenni beddent tnayen n terbiḥin n uqadi di Taddart n AREBBI, uřa d necc ak-d wezyen n imḍebbaren akidi. 
Uřa d ikehhanen Alyaqim, Maɛasiya, Minyamin, Mixa-Yah, Ilyuɛinay, Zakariyya, Ḥananya, inni ɣarsen řebwaq, 
uca xenni Maɛasiya d Camɛiya d Aliɛazar d Ɛuzzi d Yuḥanan d Malkiya d Ɛilam d Ɛazar. Imedyazen ggin ad ttwasřen u tuɣa Yizraḥa d aweqqaf. 
Deg wass nni wehhben nitni aṭṭas n tɣarṣa d timeqqranin. Marra farḥen, maɣar AREBBI igga asen ict n řefraḥet d tameqqrant. Farḥen uřa d timɣarin d iḥenjiren imeẓyanen ařami řefraḥet n řɛid n Urcalim tuɣa ttesřan as zi řaggʷaj. 
Deg wussan nni ggin iryazen ad iřin x ixxamen i iǧan i txubay, i tewhibin n usgeɛɛed, i usuffuɣ tamezwarut n ṣṣabet u i řeɛcur, ḥima ad daysent yarwen tiseqqar i dd-ikkaren i ikehhanen d Ilawiyyen zeg iyyaren n tneddam ɛlaḥsab Ccariɛa, maɣar farḥen ayt n Yahuda zeg ikehhanen d Ilawiyyen nni i din ibedden 
u ḥḍan x tsexxart n AREBBI nsen u x tsexxart n usizdeg, jmiɛ ak-d imedyazen d iɛessasen n tewwura, ɛlaḥsab tawṣeyyet n Dawud d mmis Suliman. 
Maɣar zic, deg wussan n Dawud d Adaf, tuɣa din ijj n izeǧifen n imedyazen i izřan n uṣebbeḥ uřa i uqadi i AREBBI. 
S uya iwca marra Israil di marra ussan n Zarubbabil u deg wussan n Naḥamya tiseqqar n imedyazen d iɛessasen n tewwura, kuř tasɣart n ijj n wass deg wass nnes, uca ssqeddsen tt i Ilawiyyen uca Ilawiyyen ssqeddsen tt i warraw n Harun. 
