﻿Naḥamya.
4.
Umi maca Sanballaṭ d Ṭubiya d Weɛraben d ayt n Ɛammun d Icdudiyyen sřan, aqa aɛdař n řeḥyuḍ n Urcalim ittraḥ ɣar zzat, tizzeyyin bdant ad qqnent, imsar, aqa xeyyqen aṭṭas. 
Nitni marra ggin tameɛmuč maḥend ad dd-asen ad mmenɣen ak-d Urcalim, ad dinni ssekkaren řeḥweř. 
Neccin maca nẓuǧ ɣar AREBBI nneɣ u di ssibbet nsen nessbedd ict n tɛessast xasen ass d ǧiřet. 
Xenni inna Yahuda: “Jjhed n yinni yarebbun yuḥeř, maɣar din aṭṭas n řxarbet. War nzemmar x řebni n řḥiḍ.” 
Iɣrimen nneɣ aqa nnan: “Nitni war tticin u war ttwiřin walu ař dd ɣa nas di řwesṭ nsen u ad ten neneɣ. Ammu i ɣa nessbedd řxedmet. 
Řami dd-usin Wudayen, inni ɣarsen izeddɣen, nnan aneɣ ɛecra n twařawin: “Ittxeṣṣa kenniw ad ɣarneɣ dd-tɛeqbem!”, 
ssbeddeɣ necc řgens awarni i řḥiḍ ɣar imucan iwaṭan u ɣar tseqqar ifruren, ɛlaḥsab řaǧat nsen, ak-d řesyuf nsen d iḥricen nsen d řeqwas nsen. 
Xzareɣ, xenni kkareɣ, nniɣ i tarwa n taṣiřet u i imḍebbaren u i min iqqimen n řgens: “War zzaysen tteggʷedem ca! Sidi inu d ameqqran u issaggʷad. Fekkarem dayes, mmenɣem i aytmatwem, iḥenjiren nwem d tḥenjirin nwem d temɣarin nwem d tudrin nwem.” 
Umi sřan řɛedyan nneɣ, aqa neccin nargeb xas u aqa AREBBI ibḍeř anway nsen, imsar xenni neccin marra idneɣ neɛqeb ɣar řḥiḍ, kuř ijj ɣar wemcan nnes. 
Zeg wass nni imsar, aqa azyen n imsexxaren inu tuɣa xeddmen u azyen nneɣni zzaysen ṭṭfen iḥricen d tseddariyin n uɛeskari d řeqwas d warruḍ n wuzzař, uca řḥukkam bedden awarni i kuř taddart n Yahuda. 
Inni tuɣa ittbennan řḥiḍ uca yarebbun ddquřat uca ssarebbun tent, xeddmen s yijj n ufus u s ufus nneɣni ṭṭfen lansa. 
Marra inni tuɣa ibennan aqa ɣarsen ssif iqqen x tejɛinna nnes am tuɣa ibenna. Wenni ittsuḍen deg uyicc n icarri, tuɣa-t akidi. 
Nniɣ i tarwa n taṣiřet u i imḍebbaren u i min iqqimen n řgens: “Řxedmet temɣar u teyru. Neccin nettwabezzeɛ x řḥiḍ, ijjen iggʷej x wenneɣni. 
Deg wemcan mani ɣa tesřem asuḍi deg uyicc n icarri, munem-dd dinni xaneɣ. AREBBI nneɣ ad immneɣ di ṭṭweɛ nneɣ. 
Ammu i nexdem uca azyen zzaysen ṭṭfen iḥricen zi tuffut ař dd ɣa ffɣen itran. 
Di řweqt nni nniɣ i řgens: “Kuř ijj ad issens daxeř di Urcalim ak-d umsexxar nnes uca ammu i ɣarneɣ i ɣa yiřin d iɛessasen di ǧiřet u deg wass ad iřin i řxedmet.” 
Uřa d ijj zzayneɣ war ikkis arruḍ, war iǧi necc řa d aytma řa d imsexxaren inu uřa d yeryazen n tɛessast. Kuř ijj iruḥ ɣar waman ak-d lansa nnes. 
