﻿2 Imezruyen.
36.
Ksin řgens n temmurt Yahuyaḥaz, mmis n Yuciya, uca ggin t d ajeǧid di Urcalim deg wemcan n babas. 
Yahuyaḥaz tuɣa ɣares třata u-ɛicrin n iseggʷusa, umi idweř d ajeǧid. Netta iḥkem třata n iyuren di Urcalim. 
Ajeǧid n Miṣra ikkes i-t d ajeǧid zi Urcalim uca igga i temmurt ijj n multa n mya talint n nnuqart d ict n talint n wureɣ. 
Ajeǧid n Miṣra igga umas Alyaqim d ajeǧid x Yahuda d Urcalim. Netta ibeddeř isem nnes ɣar Yahuyaqim. Maca umas Yahuyaḥaz iṭṭef i-t Naxu uca yiwyi i-t ɣar Miṣra. 
Yahuyaqim tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Netta igga min iǧan d aɛeffan di tiṭṭawin n SIDI, AREBBI nnes. 
Nabuxadnaṣṣar, ajeǧid n Babil, iffeɣ i umenɣi akides uca icarf i-t s tnayen n ssnaseř n nnuqart, ḥima ad t yawi ɣar Babil. 
Yiwi Nabuxadnaṣṣar uřa d ijj n wezyen n řeqcuɛ zi Taddart n SIDI ɣar Babil uca issars i-ten di zzawect nnes di Babil. 
Imezruyen iqqimen n Yahuyaqim d jjɛayef i igga u min ittwafen ḍidd nnes, xzar, marra aya ittwazemmem deg wedlis n ijeǧiden n Israil d Yahuda. Mmis Yahuyakin idweř d ajeǧid deg wemcan nnes. 
Yahuyakin tuɣa ɣares tmenṭac n iseggʷusa umi idweř d ajeǧid. Netta iḥkem třata n iyuren d ɛecra n wussan di Urcalim. Netta igga min iǧan d aɛeffan di tiṭṭawin n SIDI. 
Ɣar ubeddeř n useggʷas ijja ujeǧid Nabuxadnaṣṣar ad t yawi ɣar Babil s řeqcuɛ iɣřan zi Taddart n SIDI. Netta igga umas Ṣidqiya d ajeǧid x Yahuda d Urcalim. 
Ṣidqiya tuɣa ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. 
Igga min iǧan d aɛeffan di tiṭṭawin n SIDI, AREBBI nnes, war isswaḍeɛ ixef nnes zzat i wudem n unabi Irmiya wenni issiwřen x řumur n SIDI. 
Uřa d netta iɣewweɣ x ujeǧid Nabuxadnaṣṣar, wenni t ijjin ad ijjaǧ ɣar AREBBI. Netta issemḥeḍ iri nnes uca isseqseḥ uř nnes maḥend war dd-iddikkʷiř ɣar SIDI, AREBBI n Israil. 
U marra imeqqranen n ikehhanen uřa d řgens ruḥen, aggʷejen aṭṭas di řeɣdar nsen, ggin am mammec marra jjɛayef n řegnus. Nitni ssxemjen Taddart n SIDI tenni tuɣa issqeddes di Urcalim. 
SIDI, AREBBI n řejdud nsen issekk-dd ɣarsen inehharen s ufus n ireqqasen nnes, řexxu niɣ řexmin, maɣar Netta tuɣa izziǧiz as řgens nnes d Tzeddiɣt nnes. 
Maca nitni stehzan zeg ireqqasen n AREBBI u sseḥqaren awařen nnes. Nitni ggin taḍṣa x inabiyyen nnes, ařami isɛar SIDI x řgens nnes u war iqqim ɛad usgenfu. 
Netta igga ajeǧid n Ikaldaniyyen ad ɣarsen dd-iffeɣ, wenni inɣin iḥudriyyen nsen s ssif di Taddart n Zzawect nsen Iqeddsen. Netta war issɛizz x iḥudriyyen niɣ x teɛzariyyin uřa x iwessura d imeccaybuten. AREBBI iwca i-ten marra deg ufus nnes. 
Marra řeqcuɛ n Taddart n AREBBI, řeqcuɛ imeqqranen d imeẓyanen, uřa d txubay n Taddart n SIDI d txubay n ujeǧid d řḥukkam nnes, aqa marra aya yiwyi i-t ɣar Babil. 
Nitni sscemḍen Taddart n AREBBI, hedmen řḥiḍ n Urcalim uca qqden marra řeqṣur nnes s tmessi u areddǧen marra řeqcuɛ iɣřan aṭṭas zzayes. 
Wi iqqimen zi ssif indeh i-ten ɣar lmenfa ɣar Babil, uca dewřen nitni d imsexxaren i netta u i iḥenjiren nnes ař řeḥkamet n tgeldit n Lfurs, 
- ḥima ad ittwasseqfeř wawař n SIDI i issiweř s uqemmum n Irmiya - ařami teksi tammurt iseggʷusa nnes n ssebt. Marra ussan n wareddeǧ tuɣa tammurt tareyyeḥ, ařami kemmřen sebɛin n iseggʷusa. 
Maca deg useggʷas amezwaru n ujeǧid Kurac, ajeǧid n Lfurs - ḥima ad ittwakemmeř wawař n SIDI s uqemmum n Irmiya - issekkar-dd SIDI buḥbeř n Kurac, ajeǧid n Lfurs, uca ijja wanita ad dd-iffeɣ ijj n ubarreḥ di marra tageldit nnes, uřa di tira, maḥend ad yini: 
“Ammu i iqqar Kurac, ajeǧid n Lfurs: ‘SIDI, AREBBI n ijenwan, iwca ayi marra tigeldiwin n temmurt uca Netta igga xafi ad bniɣ ict n Taddart i Netta di Urcalim di Yahuda. Ejj ad igeɛɛed qaɛ man wen zzaywem zi marra řgens nnes! Ad yiři SIDI, AREBBI nnes, akides!’” 
