﻿2 Imezruyen.
34.
Yuciya tuɣa ɣares tmenya n iseggʷusa umi idweř d ajeǧid. Netta iḥkem waḥit u-třatin n iseggʷusa di Urcalim. 
Netta igga min iǧan nican di tiṭṭawin n SIDI. Netta yuyur deg ibriden n babas Dawud, war iffiɣ x webrid řa ɣar yefus uřa ɣar uzeřmaḍ. 
Deg useggʷas wiss tmenya n řeḥkamet nnes, umi t tuɣa ɛad d aḥudri, ibda ad yarzu x AREBBI n babas Dawud. Deg useggʷas wiss tenɛac ibda ad issizdeg Yahuda d Urcalim zi řegɛudi, zi trebbin n cwarti u zi řexyařat ineqcen d řexyařat ifesyen. 
Zzat i tiṭṭawin nnes hedmen iɛalṭaren n ‘Ibaɛlen’, uca izdem netta ipilaren n arebbi n tfuct nni xasen dd-ibanen sennej. Tirebbin n cwarti d řexyařat ineqcen d řexyařat ifesyen yarẓa i-ten di iwetwiten uca iddez i-ten u taɛejjajt nsen yareyyec i-tt x imeḍřan n yinni tuɣa d asen dd-yiwyen taɣarṣt. 
Issarɣ iɣsan n ikehhanen x iɛalṭaren nsen. Ammu i issizdeg Yahuda d Urcalim. 
Uřa ɣar tneddam n Manassa d Ifrayim d Cimɛun, wah, ař Naftali, ɣar marra iɣezdisen n imucan nsen ittwareddǧen, 
ihdem iɛalṭaren. Netta iřbez tirebbin n cwarti d řexyařat ineqcen, iddez i-tent, uca izdem ɛawed marra ipilaren n arebbi n tfuct di marra Israil. Awarni uya iɛqeb-dd ɣar Urcalim. 
Deg useggʷas wiss tmenṭac n řeḥkamet nnes, awarni řami issizdeg tammurt d Taddart, issekk netta Cafan, mmis n Aṣalya, d Maɛasiya, ameqqran n tendint, d Yuwax, mmis n Yahuyaḥaz, amarir n umezruy, ḥima ad ɛedřen Taddart n SIDI, AREBBI nnes. 
Nitni usin-dd ɣar Ḥilqiya, arrays n ikehhanen, u wcin as nnuqart i dd-ittwawyen di Taddart n AREBBI, d tenni dd-yarwen Ilawiyyen nni tuɣa iɛessen ɣar wadaf, zeg ufus n Manassa d Ifrayim, zi marra min iqqimen n Israil, zi marra Yahuda d Binyamin u zi marra imezdaɣ n Urcalim. 
Nitni wcin tt deg ufus n yinni tuɣa iggin řxedmet, inni iǧan x Taddart n SIDI, uca ina wcin tt i yinni iggin řxedmet di Taddart n SIDI, maḥend ad ɛedřen u ad ssjehden Taddart. 
Nitni wcin tt i iḥrayfiyyen u i imaṣṣuten i tmesɣiwt n tṣuḍar ittwassuydan u i tmesɣiwt n ukeccuḍ i tḥenya n uɛarreḍ, maḥend ad ggen tiɣurfin i tudrin, tinni ijjin ijeǧiden n Yahuda ad arxun. 
Iryazen xedmen s řaman. Yaḥat d Ɛubadya, Ilawiyyen zeg iḥenjiren n Marari, tuɣa aten d iweqqafen xasen, uřa d Zakariyya d Macullam zeg iḥenjiren n Quḥat, ḥima ad seyyaren. Ilawiyyen, marra tuɣa ttḥakan di dduzanat n lmusiqa, 
tuɣa aten ɛawed x yinni yarebbun řeḥmeř. Nitni d imseyyaren i marra inni tuɣa ixeddmen di řexdayem ifarzen. Ttwařeqqmen zeg Ilawiyyen uřa d imariren d imeḥḍayen d iɛessasen n tewwura. 
Umi ksin tmenyat n nnuqart nni tuɣa dd-iwyen di Taddart n SIDI, yufa ukehhan Ḥilqiya adlis ittwannḍen n Ccariɛa n SIDI, i tuɣa d asen immewcen x ufus n Musa. 
Ḥilqiya iṭṭef deg wawař, inna i umarir Cafan: “Necc ufiɣ adlis ittwannḍen n Ccariɛa di Taddart n SIDI.” Uca iwca Ḥilkiya adlis i Cafan. 
Cafan yiwi adlis ɣar ujeǧid. Netta ixebbar ajeǧid, inna: “Marra min umuren i imsexxaren nnec, aqa tteggen t. 
Nitni ssfarrɣen temnyat n nnuqart i ufin di Taddart n SIDI uca wcin tent deg ufus n iweqqafen u n yinni itteggen řxedmet.” 
Xenni iḥaja umarir Cafan i ujeǧid ammu, inna: “Akehhan Ḥilqiya iwca ayi ijj n wedlis!” Cafan iɣra zzayes x ujeǧid. 
Umi isřa ujeǧid awařen n Ccariɛa, imsar, icarreg netta arruḍ nnes. 
Yumur ujeǧid i Ḥilqiya u i Axiqam, mmis n Cafan, u i Ɛabdun, mmis n Mixa, u i umarir Cafan i Ɛasaya, amsexxar n ujeǧid, inna: 
“Uyurem, seqsam SIDI di ṭṭweɛ inu u di ṭṭweɛ n min iqqimen di Israil u di Yahuda x wawařen n wedlis i ittwafen. Maɣar asɛar n SIDI nni xaneɣ ittwazeǧɛen, aqa-t d ameqqran, minzi řejdud nneɣ war ḥḍin ca awař n SIDI, ḥima ad ggen am mammec marra min yurin deg wedlis ittwannḍen.” 
Xenni yuyur Ḥilqiya ak-d yinni ittwassekken zeg ujeǧid ɣar tnabit Xulda, tamɣart n Callum, mmis n Tuqahat, mmis n Ḥasra, wenni ibedden x řehri n warruḍ. Nettat tezdeɣ deg wezyen nneɣni n Urcalim uca ssiwřen akides x man aya. 
Nettat tenna asen: “Ammu i iqqar SIDI, AREBBI n Israil: ‘Inim i weryaz nni kenniw ɣari dd-issekken: 
‘Ammu i iqqar SIDI: Xzar Necc ad ssiwḍeɣ tuɛeffna x wemcan-a u x imezdaɣ nnes, marra nnɛaři i yurin deg wedlis nni zzayes ittwaɣaren zzat i wudem n ujeǧid n Yahuda, 
maɣar nitni ḥeyyden xafi u iwyen tiwhibin n řebxur i irebbiten nneɣni ařami d ayi sɛaren s marra řexdayem n ifassen nsen. Asɛar inu ad ittwazeǧeɛ x wemcan-a u war ixessi. 
Maca i ujeǧid n Yahuda, wenni kenniw dd-issekken da, ḥima ad tesseqsam SIDI, ad as tinim: ‘Ammu i iqqar SIDI, AREBBI n Israil: X wawařen nni tesřid: 
Maɣar idweř wuř nnec yarḍeb u tesswaḍɛed ixef nnec zzat i wudem n AREBBI umi tesřid i wawařen nnes x wemcan-a u x imezdaɣ nnes, u umi tesswaḍɛed ixef nnec uca tcarrged arruḍ nnec u trud zzat i wudem inu, s uya sřiɣ Necc ɛawed ɣarek, iqqar SIDI. 
Xzar, ad cek ssmuneɣ ɣar řejdud nnec u ad tᵉttwassarsed deg wenḍeř nnec s řehna u tiṭṭawin nnec war ttwiřint ca marra tuɛeffna nni ɣa ssiwḍeɣ x wemcan-a u x imezdaɣ nnes.’” Nitni ɛawden awař-a i ujeǧid. 
Xenni issekk ujeǧid ireqqasen uca issmun marra imeqqranen n Yahuda d Urcalim. 
Igeɛɛed ujeǧid ɣar Taddart n SIDI ak-d marra iryazen n Yahuda d imezdaɣ n Urcalim, ak-d ikehhanen d Ilawiyyen u ak-d marra řgens, zeg umeqqran ař ameẓyan, u ɣrin xasen marra awařen n wedlis n Řɛahd nni tuɣa ittwafen di Taddart n SIDI. 
Ajeǧid ibedd deg wemcan nnes uca iqqen Řɛahd zzat i wudem n SIDI, ḥima ad iḍfar SIDI u ḥima ad iḥḍa řumurat nnes d cchadat nnes d tweṣṣa nnes s marra wuř nnes u s marra řeɛmar nnes u ḥima ad igg awařen n Řɛahd-a i yurin deg wedlis-a. 
Netta ijja marra inni iǧan di Urcalim d Binyamin, ad kkaren ḥima ad t ssmetnen uca imezdaɣ n Urcalim ggin ɛlaḥsab Řɛahd n AREBBI, AREBBI n řejdud nsen. 
Ikkes Yuciya marra jjɛayef n ṣṣanam zi temmura n ayt n Israil u yarra marra inni izedɣen di Israil ttsexxaren i tsexxart n SIDI, AREBBI nsen. Marra ussan n tudart nnes war ḥeyyden ca zeg weḍfar n SIDI, AREBBI n řejdud nsen. 
