﻿2 Imezruyen.
15.
Xenni yusa-dd Arruḥ n AREBBI x Ɛazarya, mmis n Ɛudid. 
Netta yuyur ibedd zzat i Asa, inna as: “Seř-dd ɣari, Asa d marra ayt n Yahuda d Binyamin! SIDI aqa-t akidwem u kenniw akides. Mařa tarezzum xas, Netta ad kenniw yarr ad t tafem, maca mařa kenniw tḥeyydem xas, ad xawem iḥeyyed uřa d Netta. 
Aṭṭas n wussan i iqqim Israil břa AREBBI n tidett u břa ijj n ukehhan issɣaran u břa Ccariɛa. 
Mařa dewřen-dd nitni ɣar SIDI, AREBBI n Israil, di řeḥṣaret u arzun xas, ijja i-ten ad t afen. 
Deg wussan nni war din tuɣi řehna i wenni dd-iffɣen u i wenni yareggʷḥen, maɣar aqa din aṭṭas n řeḥweř jar marra imezdaɣ n temmura. 
Ijj n řgens ittwaɛfes zeg ijj n řgens nneɣni, u ict n tendint zeg ict n tendint nneɣnit, maɣar AREBBI issiggʷed i-ten s kuř řeḥṣařet. 
Kenniw maca iřim d iryazen, war ttejjim ad arxun ifassen nwem, maɣar aqa din řmunet i řxedmet nwem.” 
Umi Asa isřa awařen-a d nnubuwa n unabi Ɛudid, issejhed ixef nnes uca issbeɛɛed nnɛawat n l’aṣnam zi marra tammurt n Yahuda d Binyamin u zi marra tineddam nni tuɣa iṭṭef x idurar n Ifrayim uca iɛdeř aɛalṭar n SIDI, wenni iǧan zzat i wesqif n wadaf i Zzawect Tameqqrant n SIDI. 
Issmun marra Yahuda d Binyamin, uřa d ibarraniyyen zeg Ifrayim, Manassa u Cimɛun, maɣar aṭṭas zi Israil ɛdun ɣares, umi nitni ẓrin, aqa SIDI, AREBBI nnes, tuɣa-t akides. 
Nitni munen di Urcalim deg uyur wiss třata, deg useggʷas wiss xemmesṭac n tgelda n Asa. 
Deg wass nni wehhben nitni sebɛa-mya n ifunasen d tfunasin d sebɛa-ařaf n wuǧi d tɣarṣt i SIDI zi tkeccaḍt i kidsen iwyen. 
Nitni udfen ɣar ijj n Řɛahd maḥend ad arzun SIDI, AREBBI n řejdud nsen, s marra uř nsen u s marra řeɛmar nsen. 
Marra wenni war yarezzun x SIDI, AREBBI n Israil, ittxeṣṣa ad ittwaneɣ, am umeẓyan am umeqqran, am weryaz am temɣart. 
Nitni jjuǧen i SIDI s tmijja tejhed u s usřewřiw, ɣar wesruddeḥ n řebwaq d waccawen n icarri. 
Marra Yahuda tfarḥ x tjaǧit, maɣar nitni ggin tt s marra uř nsen umi nitni arzun xas s marra arḍa nsen, u Netta ijja i-ten ad t afen uca SIDI iwca asen řhudnet zi marra iɣezdisen nsen. 
Issḥeyyed Asa uřa d ḥennas Maɛka zi jjehd nnes, maɣar nettat tuɣa tegga ict n jjɛifect n řexyař i trebbit n cwarti. Asa iceqqar jjɛifect nnes, iřbez i-tt uca isscemḍ i-tt ɣar teɣzart n Qidrun. 
War ttwaḥeyydent řegɛudi, maca uř n Asa tuɣa icḍar nican i SIDI, marra ussan n tudart nnes. 
Tiwhibin iqeddsen n babas d min tuɣa issqeddes netta s yixef nnes yiwyi-t di Taddart n AREBBI, uřa d tiwhibin nnes iqeddsen: nnuqart d wureɣ d řeqcuɛ nneɣni. 
War din iqqim ɛad umenɣi ař aseggʷas wiss xemsa u-třatin n tgelda n Asa. 
