﻿2 Imezruyen.
7.
Umi ikemmeř Suliman taẓaǧit nnes, tehwa-dd tmessi zeg ujenna tecca taɣarṣt n wecmaḍ uřa d tɣarṣa inneɣni, uca iccur uɛuǧi n SIDI Taddart. 
Ikehhanen war zemmaren ad adfen ɣar Taddart n SIDI, minzi aɛuǧi n SIDI tuɣa iccur Taddart n SIDI. 
Umi ẓrin marra ayt n Israil belli tehwa-dd tmessi nni, uřa d aɛuǧi n SIDI iban-dd tiwa n Taddart, uḍaren nitni s uɣembub nsen ɣar temmurt x tisi n zzellij, bendqen, qadan SIDI: “Maɣar Netta iṣbeḥ u tamexsiwt nnes icewwaren tᵉttɣima i řebda”. 
Ajeǧid, u marra Israil akides, wehhben tiɣarṣa zzat i wudem n SIDI. 
Ajeǧid Suliman iwehheb tnayen u-ɛicrin-ařef n ifunasen d tfunasin d mya u-ɛicrin ařef n wuǧi d taɣarṣt n řehna. Ammu i ideccen ujeǧid d marra ayt n Israil Taddart n AREBBI. 
Ikehhanen tuɣa bedden ɣar tsexxart nsen uca Ilawiyyen bedden ak-d dduzan n ǧɣa n SIDI, inni igga ujeǧid Dawud ḥima ad qadan SIDI - ‘Maɣar tamexsiwt nnes icewwaren tᵉttɣima i řebda!’ - s izřan n uṣebbeḥ n Dawud deg ufus nsen, u arendad nsen suḍen ikehhanen di řebwaq, am tuɣa ibedd marra Israil. 
Suliman issqeddes řwesṭ n řemraḥ n zzat, wenni iǧan zzat i Taddart n SIDI, minzi yiwi din tiɣarṣa n wecmaḍ d tadunt n tewhibin n řɣiǧet, maɣar aɛalṭar n nnḥas nni igga Suliman tuɣa war izemmar ad iksi taɣarṣt n wecmaḍ d tewhibt n řɣiǧet d tadunt. 
Di řweqt nni iɛeyyed Suliman Řɛid i yijj n řmijar n sebɛa n wussan d marra Israil akides, ijj n wegraw n řgens d ameqqran, zi mani ɣa tiwḍed ɣar Ḥamat ař Taɣzart n Miṣra. 
Deg wass wiss tmenya ggin ijj n umuni ifarzen, minzi di sebɛa n wussan ggin nitni adeccen n uɛalṭar uca uřa d Řɛid awarni man aya ɣares ɛawed ijj n řmijar n sebɛa n wussan. 
Deg wass wiss třata u-ɛicrin n uyur wiss sebɛa yarxu netta i řgens ad raḥen ɣar iqiḍan nsen s wuř ifarḥen u s řxaḍar s marra řxar i igga SIDI i umsexxar nnes Dawud d Suliman u i řgens nnes Israil. 
Ammu i ikemmeř Suliman řebni n Taddart n SIDI d taddart n ujeǧid. Marra min tuɣa deg wuř n Suliman ḥima ad t igg di Taddart n SIDI u di taddart nnes, aqa ifřeḥ ad igg aya. 
SIDI iban-dd i Suliman di ǧiřet, inna as: “Necc sřiɣ i tẓaǧit nnec u farzeɣ amcan-a i Yixef inu ḥima ad yiři d Taddart i tewhibt n tɣarṣt. 
Xmi ɣa bellɛeɣ ajenna maḥend war iccit wenẓar ɛad, niɣ mařa umureɣ tamuɣri iřeḥḥfen maḥend ad tecc temmurt niɣ xmi dd-ssekkeɣ ṭṭaɛun jar řgens inu, 
uca řgens inu x min xef ittwařaɣa Isem inu ad issehwa ixef nnes, ad iẓẓaǧ, u nitni ad arzun udem inu u ad tuben zi tebridin nsen tiɛeffanin, xenni Necc ad ɣarsen sřeɣ zeg ujenna, ad asen ɣfareɣ u ad ssgenfiɣ tammurt nsen. 
Xenni řexxu, tiṭṭawin inu ad iřint arzment d imezzuɣen inu ad ḥḍan x tẓaǧit zeg wemcan-a, 
maɣar řexxu ixḍareɣ Taddart-a u ssqeddseɣ tt ḥima ad ssmetneɣ din Isem inu i řebda u tiṭṭawin inu d wuř inu ad din iřin marra ussan. 
Mařa cek tuyured zzat i wudem inu am mammec tuɣa iggur babac Dawud, u ad tegged am mammec marra i d ac umureɣ uca ad teḥḍid tiweṣṣa inu d lfarayiḍ inu, 
xenni ad ssmetneɣ řɛarc n tgeldit nnec am mammec Řɛahd i ggiɣ ak-d babac Dawud, nniɣ: ‘War d ac ittxeṣṣa uřa d ijj n weryaz nni iḥekkmen di Israil!’ 
Maca mařa kenniw tḥeyydem zi tweṣṣa inu d řumurat inu nni wciɣ zzat i wudem nwem, uca ad tuyurem ad tɛebdem i irebbiten nneɣni, ad asen tbendqem, 
xenni ad qḍiɣ x Israil zi temmurt nni d asen wciɣ, uca Taddart-a, i ssqeddseɣ i Yisem inu, ad tt nḍareɣ zeg wudem inu u Israil ad idweř d umedya uřa d řqecɛet n ubehdeř itteqqsen jar marra řegnus. 
U x Taddart-a tenni yuɛřan qaɛ, marra wi xas i ɣa ikken, ad itebhet, ad yini: ‘Mayemmi igga SIDI ammu di temmurt-a u di Taddart-a?’ 
Ad inin: ‘Minzi nitni semḥen di SIDI, AREBBI n řejdud nsen, wenni ten dd-issuffɣen zi temmurt n Miṣra, u minzi nitni cebbaren di irebbiten nneɣni u Israil yuyur ad asen isjed u ad ten iɛbed, x uya isseɣḍeř Netta marra řɣar-a xasen.’” 
