﻿1 Imezruyen.
26.
Tirbiɛin n iɛessasen n tewwura: N Iquraḥiyyen: Macalamya, mmis n Quri, zeg warrawen n Abiyasaf. 
Macalamya tuɣa ɣares warrawen: Zakariyya tuɣa-t d amenzu, Yadiɛil wiss tnayen, Zabadya wiss třata, Yatniyil wiss arebɛa, 
Ɛilam wiss xemsa, Yuḥanan wiss setta, Ilyuɛinay wiss sebɛa. 
Uřa Ɛubid-Idum tuɣa ɣares warrawen: Camɛiya tuɣa-t d amenzu, Yahuzabad wiss tnayen, Yuwax wiss třata, Sakar wiss arebɛa, Natanayil wiss xemsa, 
Ɛamiyil wiss setta, Issakar wiss sebɛa, Faɛaltay wiss tmenya, maɣar ibarek i-t AREBBI. 
Uřa i mmis Camɛiya ttwaxeřqen as-dd warrawen. Nitni tuɣa aten d řḥukkam di taddart n babatsen, minzi nitni tuɣa aten d ayt n bu-teɣruḍt imeḥḍen. 
Arrawen n Camɛiya tuɣa aten: Ɛutni, Rafayil, Ɛubid, Ilzabad ak-d aytmas, iryazen imeḥḍen: Ilihu d Camakya. 
Ina marra tuɣa aten zeg warrawen n Ɛubid-Idum, nitni d warrawen nsen d wawmaten nsen, iryazen imeḥḍen, ccuren s jjehd i tsexxart nsen, tnayen u-settin n yeryazen n Ɛubid-Idum. 
Macalamya tuɣa ɣares warrawen d wawmaten, iryazen imeḥḍen, tmenṭac n yeryazen. 
Ḥusa, zeg warrawen n Marari, tuɣa ɣares warrawen-a: Cimri tuɣa d azeǧif, waxxa netta war iǧi d amenzu, maca babas igga i-t d azeǧif. 
Ḥilqiya tuɣa-t d wiss tnayen, Tabalya wiss třata, Zakariyya wiss arebɛa. Marra arrawen d wawmaten n Ḥusa tuɣa aten di třeṭṭac n yeryazen. 
X terbiɛin-a n iɛessasen n tewwura, x izeǧifen n ayt n bu-teɣruḍt, tuɣa ccɣeř n tsexxart di Taddart n SIDI, jmiɛ ak-d aytmatsen. 
Nitni nḍaren taqedduḥt, am umeẓyan am umeqqran, i tudrin n ibabaten nsen, i tewwart u i tewwart nneɣni. 
Taqedduḥt i tɛessast n ccarq tekkar as-dd i Calamya. Uřa i mmis Zakariyya, wenni d amcawar s řeɛqeř, tewḍa as-dd taqedduḥt u taqedduḥt nnes tekkar as-dd i ccamal. 
I Ɛubid-Idum tekkar as-dd tqedduḥt i ljanub u i warrawen nnes i taddart n ixxamen n řexzen. 
I Cuffim d Ḥusa tekkar asen-dd tqedduḥt i lɣarb, ak-d tewwart n Calakat ɣar webrid ameqqran igeɛɛden ɣar Zzawect Tameqqrant. Ijj n uɛessas tuɣa ibedd ɣar ijj n uɛessas nneɣni. 
Ɣar manis i dd-tneqqar tfuct bedden setta n Ilawiyyen u ɣar ccamal bedden din kuř ass arebɛa. Ɣar ljanub ɛawed kuř ass arebɛa u ɣar ixxamen n řexzen tnayen u ɛawed tnayen. 
Ɣar řebni n uɣezdis n lɣarb n Zzawect Tameqqrant arebɛa ɣar webrid ameqqran u tnayen ɣar řebni n uɣezdis. 
Tina tuɣa d tirbiɛin n iɛessasen n tewwura zeg warrawen n Quraḥ u zeg warrawen n Marari. 
Aytmatsen Ilawiyyen tuɣa aten x ixxamen n txubay n Taddart n AREBBI u x ixxamen n txubay n tewhibin ittwaqeddsen. 
Arrawen n Laɛdan, arrawen n Ujarcuni nni tuɣa ɣar Laɛdan, ixs ad yini izeǧifen n ibabaten n řaǧat n Laɛdan, Ajarcuni: Jaḥiyili waha. 
Iḥenjiren n Yaḥyili tuɣa aten d Zitam d Yuwil, umas. Nitni tuɣa aten x ixxamen n txubay n Taddart n SIDI. 
N Ɛamramiyyen, d Iyiṣhariyyen, d Iḥabruniyyen, d Iɛaziyiliyyen 
tuɣa Cabuwil, mmis n Jarcum, mmis n Musa, d ameḥḍayi x ixxamen n txubay. 
Aytmas zi jjadira n Iliɛazar tuɣa aten d mmis Raḥabya, mmis Icaɛya, mmis Yuram, mmis Zikri d mmis Calumit. 
Calumit wanita d aytmas tuɣa aten x ixxamen n txubay n tewhibin ittwaqeddsen, tinni issqeddes i-tent ujeǧid Dawud ak-d izeǧifen x ibabaten n řaǧat u ak-d imeqqranen x wařef d x mya, u ak-d ikumandaren n řɛeskar. 
Nitni tuɣa ssqeddsen tiwhibin nni zi garrat u zi tkeccaḍt, ḥima ad zzaysent ɛedřen Taddart n SIDI. 
Ɛawed marra min tuɣa issqeddes i-t umwařaw Camwil, d Cawul, mmis n Qis, d Abnir, mmis n Nir, d Yuwab, mmis n Ṣaraya. Marra min tuɣa ittwaqeddsen tuɣa sadu afus n Calumit d aytmas. 
Zeg Iyiṣhariyyen tuɣa Kananya d warrawen nnes xeddmen am imeḥḍayen d řquḍat barra di temmurt n Israil. 
Zeg Iḥabruniyyen tuɣa taweqqaft x Israil ɣar Ḥacabya d aytmas, iryazen imeḥḍen, ařef u-sebɛa-mya n yeryazen, x ujemmaḍ n L’Urdun ɣar lɣarb, tuɣa aten x marra řxedmet i SIDI u x tsexxart i ujeǧid. 
I Iḥabruniyyen tuɣa Yariya d azeǧif, i Iḥabruniyyen, i jjiřat nnes, jar ibabaten n řaǧat. Deg useggʷas wiss arebɛin n tgelda n Dawud ttwarzun u ttwafen ayt n bu-teɣruḍt imeḥḍen di Yaɛzir di Jilɛad. 
Aytmas tuɣa aten d iryazen imeḥḍen, ařfayen u-sebɛa-mya n izeǧifen x ibabaten n řaǧat. Ajeǧid Dawud igga ten x ayt n Rubin, x ayt n Jad u x wezyen n teqbič n Manassa, x marra timesřayin n AREBBI u x marra timesřayin n ujeǧid. 
