﻿1 Imezruyen.
24.
Tirbiɛin n warrawen n Harun. Arrawen n Harun tuɣa aten d Nadab, Abihu, Aliɛazar d Itamar. 
Nadab d Abihu mmuten zzat i wudem n babatsen. War ɣarsen bu warrawen. Aliɛazar d Itamar tuɣa ttsexxaren am yikehhanen. 
Jmiɛ ak-d Ṣaduq zeg warrawen n Aliɛazar u ak-d Aximalik zeg warrawen n Itamar ibḍa i-ten Dawud ɛlaḥsab taweqqaft nsen i tsexxart nsen. 
Ufin aqa ɣar warrawen n Aliɛazar aṭṭas n izeǧifen x izeǧifen nni iǧan ɣar warrawen n Itamar. Bḍan ten amenni: jar warrawen n Iliɛazar tuɣa din seṭṭac n izeǧifen i tudrin n ibabaten nsen u jar warrawen n Itamar tuɣa din tmenya n izeǧifen i tudrin n ibabaten nsen. 
Nitni bḍan ten s tqedduḥt, am yina am yinni, maɣar imeqqranen n Zzawect Iqeddsen, imeqqranen n AREBBI, tuɣa aten zeg warrawen n Aliɛazar u zeg warrawen n Itamar. 
Camɛiya, mmis n Natanyil, wenni tuɣa d amarir zi teqbič n Lawi, izemmen i-ten zzat i wudem n ujeǧid d řḥukkam d ukehhan Ṣaduq, d Aximalik, mmis n Abyatar, u zzat i wudem n izeǧifen n řaǧat jar ikehhanen u jar Ilawiyyen. Ggin taqedduḥt i yijj n řaǧ n Aliɛazar, xenni i yijj n řaǧ n Itamar. 
Taqedduḥt tamezwarut tekkar as-dd i Yahuyarib, wiss tnayen i Yadaɛya, 
wiss třata i Ḥarim, wiss arebɛa i Saɛurim, 
wiss xemsa i Malkiya, wiss setta i Miyamin, 
wiss sebɛa i Haqquṣ, wiss tmenya i Abiya, 
wiss tesɛa i Yecuɛa, wiss ɛecra i Cakanya, 
wiss ḥitac i Ilyacib, wiss tenɛac i Yaqim, 
wiss třeṭṭac i Ḥuffa, wiss arbeɛṭac i Yacabad, 
wiss xemmesṭac i Bilja, wiss seṭṭac i Immir, 
wiss sbeɛṭac i Ḥizir, wiss tmenṭac i Ḥafṣiṣ, 
wiss tseɛṭac i Faqaḥya, wiss ɛicrin i Yaḥazqiyil, 
wiss waḥit u-ɛicrin i Yaxin, wiss tnayen u-ɛicrin i Jamul, 
wiss třata u-ɛicrin i Dalaya, wiss arebɛa u-ɛicrin i Maɛazya. 
Ina tuɣa xasen taweqqaft maḥend ad adfen ɣar Taddart n SIDI ɛlaḥsab asettef n tsexxart nsen am mammec lfariḍa i dd-yusin s ufus n babatsen Harun am mammec d as yumur SIDI, AREBBI n Israil. 
Zi jjihet n usettef n min iqqimen n warrawen n Lawi: Cubayil tuɣa d azeǧif i warrawen n Ɛamram, Yaḥadya tuɣa d azeǧif i warrawen n Cubayil. 
X Raḥabya: x warrawen n Raḥabya tuɣa Yacci-Yah d azeǧif. 
X warrawen n Yiṣhar tuɣa Calumit d azeǧif. X warrawen n Calumit tuɣa Yahat d azeǧif. 
U x warrawen n Ḥabrun tuɣa Yariya d azeǧif, Amarya tuɣa-t d wiss tnayen, Yaḥziyil d wiss třata, Yaqmaɛam dd wiss arebɛa. 
X warrawen n Ɛuzziyil tuɣa Mixa d azeǧif. X warrawen n Mixa tuɣa Camir d azeǧif. 
Umas n Mixa tuɣa d Yacci-Yah. X warrawen n Yacci-Yah tuɣa Zakariyya d azeǧif. 
Arrawen n Marari tuɣa aten d Maḥli d Muci. X warrawen n Yaɛazya tuɣa Banu d azeǧif. 
Arrawen n Marari s Yaɛazya tuɣa aten d Banu d Cuham d Zakkur d Ɛibri. 
I Maḥli tuɣa Aliɛazar d mmis. Wanita tuɣa war ɣares bu warrawen. 
X Qis: arrawen n Qis: mɣir Yarḥamyil. 
Arrawen n Muci tuɣa aten d Maḥli, Ɛadir d Yarimut. Ina tuɣa aten d arrawen n Lawi, ttwasettfen ɛlaḥsab řaǧat n ibabaten nsen. 
Uřa d nitni nḍaren tiqedduḥin am yaytmatsen, arrawen n Harun, zzat i wudem n ujeǧid Dawud d Ṣaduq d Aximalik d izeǧifen x ibabaten n řaǧat n ikehhanen u x Ilawiyyen, am yibabaten nni iǧan d azeǧif am umatsen d amaẓuẓ. 
