﻿1 Imezruyen.
23.
Umi tuɣa Dawud iwsar u ijjiwen ussan, igga netta mmis Suliman d ajeǧid x Israil. 
Netta issmun-dd marra řḥukkam n Israil uřa d ikehhanen d Ilawiyyen. 
Ttwaḥesben Ilawiyyen zi třatin n iseggʷusa d sennej. Tuɣa řqedd nsen azeǧif azeǧif tmenya u-třatin-ařef n yeryazen. 
Zzaysen tuɣa din arebɛa u-ɛicrin-ařef n yinni ittwaggen d imseyyaren x řxedmet di Taddart n SIDI uca aqa din ɛad setta-ařaf n imeḥḍayen d řquḍat, 
arebɛa-ařaf n iɛessasen n tewwart d arebɛa-ařaf n imedyazen i iẓran n uṣebbaḥ i SIDI, ak-d dduzanat n lmusiqa nni ggiɣ necc, inna Dawud, ḥima ad ssemɣaren SIDI s yezřan n uṣebbaḥ. 
Dawud ibḍa ten di terbiɛin, am ttwasettfen nitni ɛlaḥsab arrawen n Lawi: Jarcun, Qahat d Marari. 
Zeg Ijarcuniyyen tuɣa aten d Laɛdan d Cimɛi. 
Arrawen n Laɛdan tuɣa aten d azeǧif Yaḥiyil, Zitam d Yuwil, třata n yeryazen. 
Arrawen n Cimɛi tuɣa aten d Calumit, Ḥaziyil d Haran, třata n yeryazen. Ina tuɣa aten d izeǧifen x ibabaten n řaǧat n Laɛdan. 
Arrawen n Cimɛi tuɣa aten d Yaḥat, Zayna, Yaɛuc d Bariɛa. Ina tuɣa aten d arrawen n Cimɛi. 
Yaḥat tuɣa-t d azeǧif u Ziza d wiss tnayen, maca Yaɛuc d Bariɛa war tuɣi ɣarsen arrawen aṭṭas. Ɣar řeḥsab ttwaḥesben nitni d icten taddart n ibabaten. 
Arrawen n Qahat tuɣa aten d Ɛamram, Yiṣhar, Ḥabrun d Ɛuzziyil, arebɛa n yeryazen. 
Arrawen n Ɛamram tuɣa aten d Harun d Musa. Ittwaɛzeř Harun ḥima ad ittwaqeddes d amqeddes qaɛ, netta d arrawen nnes, i řebda, ḥima ad issbexxar zzat i wudem n SIDI, ḥima ad as isexxar u ḥima ad ibarek s Yisem nnes i řebda. 
Arrawen n Musa, aryaz n AREBBI, ttwařaɣan jar teqbič n Lawi. 
Arrawen n Musa tuɣa aten d Jarcum d Iliɛazar. 
Zeg warrawen n Jarcun tuɣa Cabuwil d azeǧif. 
Mmis n Iliɛazar tuɣa d azeǧif Raḥabya. War tuɣi ɣares ɣar Iliɛazar arrawen nneɣni. Arrawen n Raḥabya maca tuɣa aten deg waṭṭas. 
Zeg warrawen n Yiṣhar tuɣa Calumit d azeǧif. 
Zeg warrawen n Ḥabrun tuɣa Yariya d azeǧif, Amarya wiss tnayen, Yaḥziyil wiss ṭrata d Yaqmaɛam wiss arebɛa. 
Zeg warrawen n Ɛuzziyil tuɣa Mixa d azeǧif, u Yacci-Yah wiss tnayen. 
Arrawen n Marari tuɣa aten d Maḥli d Muci. Tarwa n Maḥli tuɣa aten d Aliɛazar d Qis. 
Aliɛazar immut u netta war ɣares tuɣi bu warrawen maca yessis wah. Arrawen n Qis, aytmatsen, iwyen tent d tamɣart. 
Arrawen n Muci tuɣa aten d Maḥli d Ɛadir d Yarimut, třata n yeryazen. 
Ina tuɣa aten d arrawen n Lawi, ttwasettfen ɛlaḥsab tudrin n ibabaten nsen, ɛlaḥsab izeǧifen n řaǧat, inni ittwazemmen ɣar řeḥsab nsen s řqedd n ismawen nsen azeǧif azeǧif, inni iggin tasexxart i Taddart n SIDI, zi ɛicrin iseggʷusa sennej. 
Maɣar Dawud tuɣa inna: “SIDI, AREBBI n Israil, iwca řhudnet i řgens nnes u Netta ad izdeɣ di Urcalim i řebda.” 
Netta inna ɛawed x Ilawiyyen: “Nitni war ḥdijen ɛad ad arbun Tazeddiɣt d marra řeqcuɛ nni dd ittasen ak-d tsexxart.” 
Minzi ɛlaḥsab awařen ineggura n Dawud, tuɣa řqedd n warrawen n Lawi d inni iǧan zi ɛicrin iseggʷusa sennej. 
Nitni bedden ak-d warrawen n Harun di tsexxart di Taddart n SIDI, ɣar uḥeṭṭu x řemraḥat, x ixxamen n řexzen, x usizdeg n marra řeqcuɛ iqeddsen, x řxedmet n tsexxart di Taddart n AREBBI, 
x usewjed n aɣrum n wescan, x waren azdad i tewhibt n řɣiǧet, x teřfaf břa antun, x wexdim u x mammec ggʷin arecti u x marra řqedd d řeqyas. 
Tuɣa ittxeṣṣa ad bedden wejden di kuř tuffut ḥima ad ṣebbḥen u ad ssemɣaren SIDI, uřa ɣar tmeddit, 
uřa řami dd-yiwyen marra tiɣarṣa n wecmaḍ i SIDI, deg wussan n ssebt, deg wussan n uyur n jdid u di řeɛyudat ittwaggen, ɛlaḥsab řqedd i yeǧa di lfariḍa i d as ittřiqan, břa aqeṭṭu zzat i wudem n SIDI. 
Ittxeṣṣa asen ad ḥḍan taweqqaft nsen i Uqiḍun n Umsagar d tweqqaft nsen i Zzawect Iqeddsen d tweqqaft nsen ɣar uɣezdis n warrawen n Harun, aytmatsen, ɣar tsexxart n Taddart n SIDI. 
