﻿1 Imezruyen.
12.
Ina i dd-yusin ɣar Dawud ɣar Ṣiqlaɣ, umi tuɣa ittxeṣṣa ɛad ad iqqim Dawud itteggʷej x wudem n Cawul, mmis n Qic. Nitni tuɣa tteqqen i ayt n bu-teɣruḍt inni iwcin afus i Dawud deg umenɣi. 
Nitni tuɣa ḥezmen s řeqwas u zemmaren ad ḥejjaren s yeẓra u ad wten fřitcat s řqews s ufus afusi u s ufus azeřmaḍ. Nitni tuɣa aten zeg aytmas n Cawul, zi Binyamin. 
Axiɛazar tuɣa d azeǧif nsen, xenni Yuwac, nitni s tnayen idsen d arrawen n Camaɛa, zi Jibɛa, xenni Yazu’il d Falaṭ, nitni s tnayen idsen d arrawen n Ɛazmawet, u Baraxya d Yahu, zi Ɛanatut, 
u Yacmaɛya, zi Jibɛun, wenni tuɣa d ijj n bu-teɣruḍt jar třatin u tuɣa x třatin, 
uřa d Irmiya, Yaḥziyil, Yuḥanan d Yuzabad, Ajadiri, 
Ilɛuzay, Yarimut, Baɛliya, Camarya, Cafaṭya, Aḥarufi, 
Ilqana, Yacci-Yah, Ɛazriyil, Yuɛazar d Yacubɛam, nitni d Iquraḥiyyen, 
u ɣar uneggar Yuɛila d Zabadya, nitni s tnayen idsen d arrawen n Yaruḥam zi Jadur. 
Zeg ayt n Jad aqa din inni immsebḍan ixef nsen ḥima ad ẓwan ɣar Dawud, di lqelɛa di řexřa. Ayt n bu-teɣruḍt imeḥḍen, iɛeskariyyen wejden i umenɣi, ttwaḥezmen s tseddariyin n uɛeskari timeqqranin u s iḥricen. Udmawen nsen am wudmawen n weyraden u nitni uyuren s tazřa amecnaw iɣayḍen n wezɣar x idurar. 
Ɛazar tuɣa-t d azeǧif, Ɛubadya d wiss tnayen, Iliyab d wiss třata, 
Micmanna d wiss arebɛa, Irmiya d wiss xemsa, 
Ɛattay d wiss setta, Iliyil d wiss sebɛa, 
Yuḥanan d wiss tmenya, Ilzabad d wiss tesɛa, 
Irmiya d wiss ɛecra, Maxbanay d wiss ḥiṭac. 
Ina tuɣa aten zeg warrawen n Jad, imeqqranen n řɛeskar. Ameẓyan ḥesben t am mya n yeryazen u ameqqran am ařef. 
Ina d inni iẓwan L’Urdun deg uyur amezwaru, umi isfi L’Urdun barra marra timuwwa nnes u nitni uẓẓřen x marra imezdaɣ n řewḍat n teɣzurt i iǧan ɣar ccarq d řɣarb. 
Uřa zeg warrawen n Binyamin u zeg warrawen n Yahuda usin-dd yeryazen ɣar Dawud ɣar lqelɛa n wedrar. 
Dawud iffeɣ-dd ɣarsen ḥima ad ten iřqa, uca iṭṭef deg wawař, inna asen: “Mařa kenniw tusim-dd ɣari ḥima ad ayi tewcem afus, xenni necc ad iřiɣ s wuř d ijj akidwem, maca mařa kenniw tusim-dd ḥima ad ayi tsellmem i iɣrimen inu, waxxa war din teǧi řexcunet ɣar ifassen inu, xenni iři ad t iẓar AREBBI n řejdud nneɣ u ad kenniw ixeǧes!” 
Iwḍa-dd Arruḥ am warruḍ x Ɛamasay, azeǧif n třatin, netta inna: “Neccin akidek, Dawud, u neccin akidek, mmis n Yassa. Řehna, řehna ad kidek yiři u řehna ad yiři ak-d yinni d ac iwcin afus, maɣar AREBBI nnec iwca ac afus.” Xenni issidef i-ten Dawud u igga i-ten d izeǧifen x terbiɛt n řɛeskar. 
Uřa zi Manassa tuɣa din inni iɛdun ɣar Dawud, umi dd-iffeɣ ak-d Ifilisṭiniyyen ɣar umenɣi ak-d Cawul. Ifilisṭiniyyen maca war d asen jjin ad wcen afus, minzi řbacat n tneddam n Ifilisṭiniyyen ssekken t, nnan: “Zeɛma netta izemmar ad iɛdu s izeǧifen nneɣ deg ufus nnes ɣar Cawul, sides.” 
Umi dd-iɛqeb ɣar Ṣiqlaɣ, ɛdun ina ɣares zeg ayt n Manassa: Ɛadnaḥ, Yuzabad, Yadiɛil, Mixayil, Yuzabad, Ilihu d Ṣilltay, řqebṭanat x řuruf n Manassa. 
Nitni wcin afus i Dawud ḥima ad igewwed tirbiɛin n řɛeskar, maɣar nitni marra tuɣa aten d ayt n bu-teɣruḍt imeḥḍen u nitni tuɣa aten d ikumandaren n řɛeskar. 
Maɣar di řweqt nni usin-dd yeryazen ɣar Dawud zeg wass ař ass ḥima ad as wcen afus, ařami dewřen d řɛeskar d ameqqran, am řɛeskar n AREBBI. 
Wa d řqedd n izeǧifen nni ittwaḥesben n yinni i tuɣa isswejden i umenɣi, inni dd-yusin ɣar Dawud di Ḥabrun maḥend ad ɣares sseɛdun tagelda n Cawul, am mammec t yumur SIDI: 
Zeg warrawen n Yahuda tuɣa řqedd n yinni yarbun tiseddariyin n uɛeskari timeqqranin d iḥricen setta-ařaf u-temn-mya n yeryazen. Nitni tuɣa wejden i umenɣi. 
Zeg warrawen n Cimɛun tuɣa řqedd n ayt n bu-teɣruḍt imeḥḍen i řɛeskar sebɛa-ařaf u-mya n yeryazen. 
Zeg warrawen n Lawi arebɛa-ařaf u-setta-mya n yeryazen. 
Yahuyadaɛ tuɣa d řḥakem i warrawen n Harun. Netta yiwi akides teřt-ařaf u-sebɛa-mya n yeryazen. 
Ṣaduq tuɣa d aḥudri, bu-teɣruḍt imeḥḍen. Zi taddart n babas tuɣa din tnayen u-ɛicrin n řqebṭanat. 
Zeg warrawen n Binyamin, aytmas n Cawul, tuɣa din teřt-ařaf n yeryazen, minzi azyen ameqqran zzaysen tuɣa ḥeṭṭan taddart n Cawul. 
Zeg warrawen n Ifrayim tuɣa din ɛicrin-ařef u-tmenya-mya n yeryazen, ayt n bu-teɣruḍt imeḥḍen, iryazen s yisem di taddart n ibabaten nsen. 
Zeg wezyen n teqbič n Manassa tuɣa din tmenṭac-ařef n yeryazen, inni tuɣa ttwařaɣan s yismawen nsen maḥend ad dd-asen ad ggen Dawud d ajeǧid. 
Zeg warrawen n Issakar, inni ɣarsen řefahmet n řmijařat n řweqt ḥima ad ssnen min tuɣa x Israil ad igg, tuɣa řqebṭanat nsen mitayen n yeryazen, u marra aytmatsen tuɣa aten sadu afus nsen. 
Zeg warrawen n Zabulun, zeg yinni dd-iffɣen ak-d řɛeskar s marra řesnaḥ nsen, tuɣa din xemsin-ařef n yeryazen. Nitni tuɣa sswejden ḥima ad settfen ixef nsen deg useddi s wuř imun nican. 
Zeg warrawen n Naftali tuɣa din ařef n řqebṭanat. Tuɣa-ten di sebɛa u-třatin-ařef n yeryazen inni yarbun taseddart n uɛeskari tameqqrant d lansa, 
Zeg warrawen n Dan tuɣa din tmenya u-ɛicrin ařef u-setta-mya n yeryazen, wejden i umenɣi. 
Zeg warrawen n Acir ffɣen-dd arebɛa-ařaf n yeryazen ak-d řɛeskar ḥima ad ssbedden ixef nsen deg useddi. 
Zeg ujemmaḍ n L’Urdun, zeg warrawen n Rubin u zeg warrawen n Jad u zeg wezyen n teqbič n Manassa tuɣa din mya u-ɛicrin-ařef n yeryazen ak-d marra řesnaḥ i umenɣi. 
Marra iɛeskariyyen-a usin-dd ɣar Ḥabrun, ttwasettfen deg iseddiyyen s wuř imun, ḥima ad ggen Dawud d ajeǧid x marra Israil. Uřa d min iqqimen n ayt n Israil tuɣa aten s wuř d ijj ḥima ad ggen Dawud d ajeǧid. 
Nitni qqimen třata n wussan dinni ɣar Dawud, ccin swin, maɣar aytmatsen tuɣa bedden akidsen. 
Uřa d yinni yudsen ař Issakar d Zabulun d Naftali usin-dd, iwyen-dd weɣrum x iɣyař, x iřeɣman, x isarḍan u x ifunasen, s řeɛweč am farina d iɣrumen n tazart d iɣrumen n zzbib d binu d zzect d ifunasen d wuǧi s ufeyyeḍ, maɣar tuɣa din řefraḥet di Israil. 
