﻿1 Imezruyen.
11.
Marra Israil yusa-dd ɣar Dawud ɣar Ḥabrun, nnan: “Xzar, neccin d iɣsan d weysum nnec. 
Ɛad umi tuɣa Cawul d ajeǧid xaneɣ, aqa d cek i dd-issuffɣen Israil ɣar umenɣi uca tjebded t-i-dd ad dd-idweř. Ɛawed inna ac SIDI, AREBBI nnec: ‘Cek ad tarewsed řgens inu Israil u cek ad tiřid d řḥakem x Israil.’” 
Xenni usin-dd marra imɣaren n Israil ɣar ujeǧid di Ḥabrun uca igga ujeǧid Dawud ijj n řɛahd akidsen di Ḥabrun zzat i wudem n SIDI. Nitni dehnen Dawud d ajeǧid x Israil ɛlaḥsab awař n SIDI s uqemmum n Camwil.    
Dawud iffeɣ ak-d marra Israil ɣar Urcalim, aqa-t d Yabus. Dinni tuɣa zeddɣen ayt n Yabus, imezdaɣ n temmurt. 
Imezdaɣ n Yabus nnan i Dawud: “Cek war da tᵉttidfed ca.” Maca Dawud iṭṭef lburj n Ṣihyun, aqa-t d tandint n Dawud. 
Maɣar Dawud inna: “Kuř ijj wenni i ɣa iwten ayt n Yabus d amezwaru, ad idweř d azeǧif n ikumandaren. Uca Yuwab, mmis n Saraya, igeɛɛed d amezwaru, s uyenni idweř netta d azeǧif. 
Tuɣa Dawud izeddeɣ di lqelɛa. X uya qqaren as i lqelɛa tandint n Dawud. 
Netta ibna tandint i d as dd-innḍen, zi lqelɛa u ssenni iquwwar as-dd. Iɛdeř Yuɛab min iqqimen n tendint. 
Idweř Dawud yarenni di řemɣaret, maɣar SIDI n řɛeskarat tuɣa-t akides. 
Ina d izeǧifen n ayt n bu-teɣruḍt n Dawud inni issjjehden akides tagelda nnes di marra Israil, ḥima ad t ggen d ajeǧid x Israil ɛlaḥsab awař n SIDI. 
Ta d lista n lɛadad n ayt n bu-teɣruḍt n Dawud: Yacubɛam, mmis n Hakmuni, azeǧif n třatin. Netta iḥenneḍ s lansa nnes x teřt-mya n yeryazen nni issnuqqeb deg ijj n umur. 
Awarni as yusa-dd Aliɛazar, mmis n Dudu, Axuxi. Netta tuɣa d ijj zi třata n ayt n bu-teɣruḍt. 
Netta tuɣa-t ak-d Dawud di Fas-Dammim. Ifilisṭiniyyen nnyarwen din i umenɣi. Ijj n wezyen n yeyyar tuɣa iccur s imendi umi yarweř řgens zeg Ifilisṭiniyyen. 
Nitni bedden di řwest n wezyen n yeyyar nni, fekken t, uca ɣeřben x Ifilisṭiniyyen. Ammu i yarra SIDI d asenjem d ameqqran. 
Třata zi třatin n izeǧifen hwan ař taṣḍart, usin-dd ɣar Dawud deg ifri n Abdullam. Řɛeskar n Ifilisṭiniyyen tuɣa iwta iqiḍan nnes di teɣzurt n Irafawiyyen. 
Dawud tuɣa-t di lqelɛa u tuɣa din ijj n řɛeskar n uḥewwes n Ifilisṭiniyyen di Bayt-Laḥm. 
Dawud iřqef i-t ufadi, inna: “Wi i d ayi dd ɣa yawyen aman zi tařa n Bayt-Laḥm nni iǧan ɣar tewwart n tendint?” 
Xenni cuqen třata nni řmargeḥ n řɛeskar n Ifilisṭiniyyen, uymen-dd aman zi tařa n Bayt-Laḥm, tenni iǧan ɣar tewwart n tendint. Ksin ten akidsen uca iwḍen ɣar Dawud. Netta yugi ad ten isu, maca izeǧeɛ i-ten zzat i SIDI. 
Netta inna: “Aya iggʷej xafi, a AREBBI inu, aqa necc ad ggeɣ man aya. Ma ad sweɣ idammen n yeryazen s řeɛmar nsen daysen, maɣar nitni sebbřen tudart nsen simant nsen?” U netta war ixs ad ten isu. D man aya i ggin třata n ayt n bu-teɣruḍt nni. 
Abicay, mmis n Yuwab, tuɣa d azeǧif n třata nni. Netta iḥenneḍ lansa nnes x teřt-mya n yeryazen, issnuqqeb i-ten. Netta ɣares ijj n yisem ittwacennɛen jar třata nni. 
Jar třata-ya tuɣa Abicay d wenni ittwacennɛen tnayen n imuren, u netta tuɣa d řqebṭan i nitni. Maca netta war yiwiḍ uřa am třata imezwura. 
Xenni Banaya, mmis n Yahuyadaɛ, mmis n ijj n weryaz imeḥḍen, timegga nnes mɣarent. Netta zi Qabḍiyil. Iɣřeb x tnayen n iyraden jehden zi Mu’ab. Ɛawed tuɣa ihwa ict n twařa, iɣřeb x ijj n weyrad di řwesṭ n ijj n wanu deg ijj n wass umi iwta wedfeř. 
Netta iɣřeb uřa x yijj n weryaz d Amiṣri, s yijj tiddi n xemsa n iɣaǧen. Amiṣri tuɣa ɣares lansa deg ufus nnes tegga am yijj n weɛmud n ukeccuḍ n uxeyyeḍ. Ihwa ɣares s weɛmud, ikkes as lansa zeg ufus n Umiṣri uca inɣa i-t s lansa nnes. 
D man aya i igga Banaya, mmis n Yahuyadaɛ. S uya ɣares iǧa isem icneɛ jar třata n ayt n bu-teɣruḍt. 
Netta tuɣa d wenni ittwacennɛen aṭṭas zi třatin, maca war yiweḍ ař třata imezwura. Dawud igga i-t jar imtiqqan nnes. 
Ayt bu-teɣruḍt imeḥḍen i iqqimen tuɣa aten: Ɛasa’il, umas n Yuwab, Ilḥanan, mmis n Dudu, zi Bayt-Laḥm, 
Cammut, Aharudi, Ḥaliṣ, Alfaluni, 
Ɛira, mmis n Ɛiqqic, Atiqquɛi, Abiɛazar, Aɛanatuti, 
Sibbikay, Aḥucati, Ɛilay, Axuxi, 
Maharay, Anaṭufati, Xalid, mmis n Baɛna, Anaṭufati, 
Ittay, mmis n Ribay, zi Jibɛa, zeg warrawen n Binyamin, Banaya, zi Firɛatun, 
Huray zi teɣzarin n Jaɛac, Abiyil, Aɛarabati, 
Ɛazmawet, Abaḥrumi, Ilyaḥba, Acaɛalbuni, 
arrawen n Hacim, Ajazuni, Yunatan, mmis n Cajay, Aharari, 
Axiyam, mmis n Sakar, Aharari, Ilifal, mmis n Ur, 
Ḥafir, Amakirati, Axiya, Afaluni, 
Ḥaṣru, Akarmali, Naɛray, mmis n Izbay, 
Yuwil, umas n Natan, Mibḥar, mmis n Hajri, 
Ṣaliq, Aɛammuni, Naḥray, Aba’iruti, - aḥemmař n řesnaḥ n Yuwab, mmis n Ṣaruya, 
Ɛira, Ayitri, Jarib, Ayitri, 
Uriya, Aḥitti, Zabad, mmis n Aḥlay, 
Adina, mmis n Ciza, zi teqbič n Rubin, wenni d azeǧif n ayt n Rubin, u sennej nnes ɛad třatin n yeryazen, 
Ḥanan, mmis n Maɛka, d Yucafaṭ, Amatni, 
Ɛuzziya Aɛactaruti, Camaɛ d Yaɛiyil, arrawen n Ḥutam, Aɛaruɛiri, 
Yadiɛil, mmis n Cimri, Yuḥa, umas, Atiṣi, 
Iliyil Amaḥwim, Yaribay d Yucuwya, arrawen n Ilnaɛam, d Yitma Amu’abi, 
Iliyil, Ɛubid d Yaɛsiyil zi Maṣubaya. 
