﻿2 Ijeǧiden.
21.
Tuɣa ɣar Manassa tenɛac n iseggʷusa umi idweř d ajeǧid. Netta iḥkem xemsa u-xemsin n iseggʷusa di Urcalim. Yemmas qqaren as Hafṣi-Bah. 
Netta igga min iǧan d aɛeffan di tiṭṭawin n SIDI, am mammec jjɛayef n řegnus nni tuɣa issuffeɣ SIDI zi zzat n wudem n ayt n Israil zi řwart nsen. 
Netta ibda ad iɛdeř řegɛudi nni tuɣa ihdem babas Ḥizqiya. Netta issbedd iɛalṭaren i Baɛal uca igga ict n trebbit n cwarti am mammec tuɣa tt igga Axab, ajeǧid n Israil, uca ibendeq i marra řɛeskar n ujenna uca iɛbed asen. 
Issbedd ɛawed iɛalṭaren di Taddart n SIDI i x inna SIDI: “Di Urcalim ad ssmetneɣ Isem inu.” 
Netta ibna iɛalṭaren i marra řɛeskar n ujenna di tnayen n řemraḥat n Taddart n SIDI. 
Netta ijja mmis ad yekk x tmessi u issxeddam tabezgiwt u tuɣa ittgezzen. Netta yiwi-dd inni issawařen ak-d imettan, d igezzanen. Netta igga aṭṭas min iǧan d aɛeffan di tiṭṭawin n SIDI, maḥend ad t isɛar. 
Netta issbedd ijj n řexyař ineqcen n trebbit n cwarti nni tuɣa igga, di Taddart nni x tuɣa inna SIDI i Dawud, mmis n Suliman: “Di Taddart-a u di Urcalim i farzeɣ zi marra tiqebbař n Israil, ad ssmetneɣ Isem inu i řebda. 
Necc war ttejjiɣ ɛad aḍar n Israil ad iweddar barra i temmurt i wciɣ i řejdud nsen. Mɣir ittxeṣṣa asen ad ḥḍan ad ggen am mammec marra min d asen umureɣ u am mammec marra Ccariɛa i d asen yumur umsexxar inu Musa.” 
Maca nitni war sřin ca, maɣar Manassa yarra i-ten ad weddaren, ařami arenyen di tuɛɛefna mahu řegnus nni imḥa SIDI zzat i wudem n ayt n Israil. 
Xenni issiweř SIDI s uqemmum n imsexxaren nnes, inabiyyen, inna: 
“Minzi Manassa, ajeǧid n Yahuda, igga jjɛayef-a, igga netta tuɛɛefna mahu x ayt n Amur inni i din iǧan qbeř nnes. Netta yarra uřa d Yahuda ad ixḍa s imeyḍa nnes n l’aṣnam. 
S uya, ammu i iqqar SIDI, AREBBI n Israil: ‘Xzar, Necc ad ggeɣ tuɛeffna x Urcalim d Yahuda, maḥend marra wi xas i ɣa isřen, aqa tnayen n imezzuɣen nnes ad ṭneṭnen. 
Necc ad qqneɣ i Urcalim fiřu n řeɛbar n Samarya d řmizan n taddart n Axab. Necc ad mesḥeɣ Urcalim am mammec mesḥeɣ ijj n ṭṭebṣi. Mesḥen t u xenni qeřben t x uzeǧif nnes. 
Ad jjeɣ min iqqimen zi tesɣart n řwart inu, ad ten ssiwḍeɣ ɣar ifassen n řɛedyan nsen u nitni ad dewřen d taḥeggʷast d takeccaḍt i marra řɛedyan nsen, 
maɣar nitni ggin min iǧan d aɛeffan di tiṭṭawin n SIDI u maɣar nitni sɛaren ayi zeg wass i di ffɣen řejdud nsen zi Miṣra ař ass-a. 
Ɛawed tuɣa Manassa issizzeř aṭṭas n idammen imezdagen ařami zzaysen iccur marra Urcalim zeg ijj n ṭṭarf ɣar wenneɣni, břa ma nidar ɛad ddenb nnes i zi yarra Yahuda ad ixḍa, umi igga min iǧan d aɛeffan di tiṭṭawin n SIDI. 
Imezruyen iqqimen n Manassa d marra min igga uřa d ddenb nnes i igga, ma man aya marra war ittwazemmem ca deg wedlis n imezruyen n ijeǧiden n Yahuda? 
Manassa igga ad yareyyeḥ jar řejdud nnes. Netta ittwanḍeř deg weḥwic n taddart nnes, di řemraḥ n Ɛuṣa. Mmis Amun idweř d ajeǧid deg wemcan nnes. 
Amun tuɣa ɣares tnayen u-ɛicrin n iseggʷusa umi idweř d ajeǧid. Netta iḥkem tnayen n iseggʷusa di Urcalim. Yemmas qqaren as Mcullamit, yeǧis n Ḥaruz zi Yutba. 
Netta igga min iǧan d aɛeffan di tiṭṭawin n SIDI, ammu nican am mammec t igga babas Manassa. 
Netta yuyur kuř abrid i di yuyur babas. Netta isexxar i imeyḍa n l’aṣnam i tuɣa isexxar uřa d babas uca isjed asen. 
Netta ismeḥ di SIDI, AREBBI n řejdud nnes, u netta war yuyur ca deg webrid n SIDI. 
Imsexxaren n Amun ggin xas ict n tmeɛmuč uca nɣin ajeǧid di taddart nnes. 
Maca řgens n temmurt nɣin marra inni tuɣa iggin ict n tmeɛmuč i ujeǧid Amun, uca řgens n temmurt ggin mmis Yuciya d ajeǧid deg wemcan nnes. 
Imezruyen iqqimen n Amun d min igga, ma man aya marra war ittwazemmem ca deg wedlis n imezruyen n ijeǧiden n Yahuda? 
Netta ittwanḍeř deg wenḍeř nnes deg weḥwic n Ɛuzza. Mmis Yuciya idweř d ajeǧid deg wemcan nnes. 
