﻿2 Ijeǧiden.
18.
Deg useggʷas wiss třata n Huciɛa, mmis n Ila, ajeǧid n Israil, imsar belli Ḥizqiya idweř d ajeǧid. Netta tuɣa d mmis n Aḥaz, ajeǧid n Yahuda. 
Netta tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem tesɛa u-ɛicrin n iseggʷusa di Urcalim. Yemmas qqaren as Abi, yeǧis n Zakariyya. 
Netta igga min iǧan nican di tiṭṭawin n SIDI, nican am mammec t igga babas Dawud. 
Netta ikkes řegɛudi, yarẓa imayḍuten iqeddsen, ihdem tarebbit n cwarti uca iřbez afiɣar n nnḥas i tuɣa igga Musa, minzi ayt n Israil tuɣa i d as dd-yiwyen tiwhibin n řebxur ař ussan nni. Netta iřaɣa as Naḥuctan. 
Netta ittceř x SIDI, AREBBI n Israil. Jar marra ijeǧiden n Yahuda inni dd-yusin awarni as niɣ ddaren qbeř nnes, war tuɣi iǧi uřa d ijj am netta. 
Netta tuɣa iḍfar abrid n SIDI, war xas iḥeyyed ca zi ḍeffar nnes. Netta tuɣa iḥeṭṭa řumurat nnes nni tuɣa yumur SIDI i Musa. 
SIDI tuɣa akides. Mani ma tuɣa ittraḥ, tuɣa ifřeḥ. Netta iɣewweɣ x ujeǧid n Accur u war xas isexxar ɛad. 
Netta iɣřeb x Ifilisṭiniyyen ař Ɣazza ak-d jjwayeh nnes, zi lburj n iɛessasen ař tandint ifaryen. 
Deg useggʷas wiss arebɛa n ujeǧid Ḥizqiya, d aseggʷas wiss sebɛa n Huciɛa, mmis n Ila, ajeǧid n Israil, imsar belli Calmanassar, ajeǧid n Accur, igeɛɛed ḍidd i Samarya uca iṭṭef i-tt. 
Nitni ṭṭfen tt awarni i třata n iseggʷusa. Deg useggʷas wiss setta n Ḥizqiya, aqa-t d aseggʷas wiss tesɛa n Ḥuciɛa, ajeǧid n Israil, ṭṭfen nitni Samarya. 
Ajeǧid n Accur indeh ayt n Israil di lmenfa ɣar Accur uca yiwyi ten di Ḥalaḥ u ɣar Xabur, wenni d iɣzar n Juzan, u di tneddam n Imadayen, 
maɣar nitni tuɣa war sřin ɣar min d asen inna SIDI, AREBBI nsen, uca arẓin Řɛahd nnes. Marra min yumur Musa, amsexxar n SIDI, war d as sřin u war t ggin.   * 
Deg useggʷas wiss arbeɛṭac n ujeǧid Ḥizqiya iffeɣ Sanḥarib, ajeǧid n Assur, ɣar marra tineddam ifaryen s iɣebrawen n Yahuda uca iḥewwes i-tent. 
Ḥizqiya, ajeǧid n Yahuda, issekk ireqqasen ɣar ujeǧid n Accur, ɣar Laxic, inna: “Necc xḍiɣ! Beɛɛed xafi! Marra min xafi ɣa tegged, ad t xeǧṣeɣ.” Xenni igga ujeǧid n Accur ict n ljizya x Ḥizqiya, ajeǧid n Yahuda: teřt mya talint n nnuqart d třatin talint n wureɣ. 
Ḥizqiya iwca marra nnuqart nni ittwafen di Taddart n SIDI u deg ixxamen n txubay n taddart n ujeǧid. 
Di řweqt nni iqess Ḥizqiya, ajeǧid n Yahuda, marra wureɣ n tewwura n Zzawect Tameqqrant n SIDI u n řeḍruf ɣar uɣezdis n tewwart inni tuɣa iɣeǧef Ḥizqiya, ajeǧid n Yahuda, s wureɣ uca iwca i-t i ujeǧid n Accur. 
Xenni issekk ajeǧid n Accur ljiniral ak-d uzeǧif n imsexxaren icennɛen d ukumandar n řɛeskar ak-d ijj n řɛeskar d ameqqran aṭṭas zi Laxic ɣar ujeǧid Ḥizqiya di Urcalim. Nitni geɛɛden, iwḍen ɣar Urcalim. Uca awarni řami geɛɛden uca iwḍen nitni, bedden ɣar uqadus n waman n uyeřman n sennej, wenni iǧan ɣar webrid yuɛřan ɣar Weḥwic n Uṣebban. 
Nitni řaɣan, ḥima ad dd-yas ujeǧid. Xenni uyuren ɣarsen Alyaqim, mmis n Ḥilqiya, wenni iǧan x taddart n ujeǧid, ak-d umarir Cibna d Yuwax, mmis n Asaf, amarir n umezruy. 
Akumandar n řɛeskar inna asen: “Inim i Ḥizqiya: ‘Ammu i iqqar ujeǧid ameqqran, ajeǧid n Accur: Man atecři-ya i x tᵉttecřed? 
Aqa-t d řhard n iyencicen waha, umi tennid: Aqa ɣarneɣ ccwar d jjehd i umenɣi! Man wen i x tᵉttecřed, aqa cek tɣewwɣed xafi? 
Xzar, řexxu tᵉttecřed x Miṣra, x uɣanim nni innḍefsen, wenni, umi ḥed xas i ɣa iɛemmed, ittejjun deg ufus nnes uca issnuqqeb i-t. Ammu i yeǧa firɛun, ajeǧid n Miṣra, i marra inni xas ittecřen. 
Mařa kenniw ad d ayi tinim: ‘Neccin nettceř x SIDI, AREBBI nneɣ!’, xenni necc ad iniɣ: ‘Ma Netta war iǧi d wenni i zi iḥeyyed Ḥizqiya řegɛudi d iɛalṭaren, u xenni inna i Yahuda d Urcalim: Ittxeṣṣa ad tbendqem zzat i uɛalṭar-a di Urcalim?’ 
Xenni řexxu, egg ijj n umḥarrem ak-d sidi inu, ajeǧid n Accur, necc ad ac wceɣ ařfayen n iysan mařa cek zeg uɣezdis nnec ad asen dd-tawyed ayt n bu-uyis. 
Mammec texsed ad tennqeřbed x wudem n lwali, wenni qaɛ d ameẓyan n imsexxaren n sidi inu, uca ad tᵉttecřed x Miṣra di ssibbet n ikarruten d imnayen? 
Ɛawed, maɣar ma necc geɛɛdeɣ-dd ḍidd n wemcan-a, ḥima ad t areddǧeɣ břa SIDI? SIDI ini ayi: ‘Geɛɛed ḍidd i temmurt-a, areddeǧ i-tt!’” 
Uca nnan Alyaqim, mmis n Ḥilqiya d Cibna d Yuwax i ukumandar n řɛeskar: “Siweř ɛafek s iřes n Tramit ak-d imsexxaren nnec, minzi nefhem as mliḥ. War kidneɣ ssiwiř s Tyahudect deg imezzuɣen n řgens i iǧan x řḥiḍ.” 
Maca akumandar n řɛeskar inna asen: “Ma issekk ayi-dd sidi inu ḥima ad ssiwřeɣ awařen-a ɣar sidi nnec u ɣarek waha, war iǧi i yeryazen nni iqqimen x řḥiḍ, maḥend ad iniɣ aqa aten jmiɛ akidwem ad ccen asuffeɣ nsen u ad swen ibeccicen nsen?” 
Xenni ikkar ukumandar, iřaɣa s jjhed s Tyahudect uca issiweř, inna: “Sřem i wawař n ujeǧid ameqqran, ajeǧid n Accur! 
Ammu i iqqar ujeǧid: ‘Ḥḍam war kenniw ittɣecci Ḥizqiya, minzi netta war izemmar ad kenniw ifekk zeg ufus nnes. 
War ttejjim Ḥizqiya ad kenniw yarr ad tᵉttecřem x SIDI, ad tinim: SIDI ad aneɣ ifekk nican u tandint-a war tᵉttmewci ca deg ifassen n ujeǧid n Accur.’ 
War tesřim ca ɣar Ḥizqiya, maɣar ammu i iqqar ujeǧid n Accur: ‘Ggem ayi array uca ffɣem-dd zi tendint ɣari, xenni izemmar kuř ijjen zzaywem ad icc zi tzayart nnes u zeg wartu n tazart nnes u ad isu aman zeg wanu nnes, 
ař dd ɣa yaseɣ u ad kenniw awyeɣ ɣar ict n temmurt am temmurt nwem: ɣar ict n temmurt teccur s imendi d binu n jdid, ɣar ict n temmurt teccur s weɣrum d imarjaɛen n uḍiř, ict n temmurt n zzitun d zzect d tamment. Ammu i ɣa teqqimem teddarem, war tmettim ca. War ttesřim ɣar Ḥizqiya, maɣar netta ittɣarra kenniw xmi iqqar: SIDI ad aneɣ ifekk! 
Ma zemmaren xenni irebbiten n řegnus, kuř ijj zzaysen, ad fekken tammurt nsen zeg ufus n ujeǧid n Accur? 
Mani ǧan irebbiten n Ḥamat d Arfad? Mani ǧan irebbiten n Sfarwayim d Haniɛ d Ɛiwa? Ma fekken nitni Samarya zeg ufus inu? 
Man wen zi marra irebbiten n temmura nneɣni i issnejmen tammurt nsen zeg ufus inu ařami ɣa ifekk SIDI Urcalim zeg ufus inu?’” 
Maca řgens iseɣd, war xas dd-yarri s uřa d ijj n wawař, maɣar řumur n ujeǧid inna: “Kenniw war xas dd-tarrim ca!” 
Xenni yusa-dd Alyaqim, mmis n Ḥilqiya, řemqeddem n tzeddiɣt n ujeǧid, ak-d Cibna amarir, d Yuwax, mmis n Asaf, amarir n umezruy s warruḍ icarrgen ɣar Ḥizqiya. Nitni ḥajan as marra awařen n ukumandar n řɛeskar. 
