﻿2 Ijeǧiden.
17.
Deg useggʷwas wiss tenɛac n Aḥaz, ajeǧid n Yahuda, idweř Huciɛa, mmis n Ila, d ajeǧid x Israil di Samarya. Netta iḥkem tesɛa n iseggʷusa. 
Netta igga min iǧan d aɛeffan di tiṭṭawin n SIDI, maca war iǧi anect n ijeǧiden n Israil, inni tuɣa qbeř nnes. 
Calmanassar, ajeǧid n Accur, ihjem xas uca Huciɛa idweř d amsexxar nnes uca ittwagg xas maḥend ad as iwc ljizya. 
Ajeǧid n Accur yufa aqa Huciɛa igga ict n tmeɛmuč. Wanita tuɣa issekk ireqqasen nnes ɣar Su, ajeǧid n Miṣra, uca war dd-yiwi ɛad ljizya am qbeř i ujeǧid n Accur, zeg useggʷas ař aseggʷas. Ajeǧid n Accur iṭṭef i-t uca icedd i-t s iceddiyyen di řeḥbes. 
Ajeǧid n Accur iwḍa x marra tammurt, igeɛɛed ɣar Samarya u inneḍ as-dd třata n iseggʷusa. 
Deg useggʷas wiss tesɛa n Huciɛa, iḥewwes ajeǧid n Accur Samarya uca indeh ayt n Israil di lmenfa ɣar Accur u issezdeɣ i-ten di Ḥalaḥ u ɣar Xabur wenni d iɣzar n Juzan, u di tneddam n Imadayen. 
Aya imsar minzi ayt n Israil xḍan x SIDI, AREBBI nsen, wenni ten dd-issgeɛɛden zi Miṣra, zi sadu i ufus n firɛun, ajeǧid n Miṣra, u umi ggʷeden nitni irebbiten nneɣni, 
ggin ad ddaren ɛlaḥsab tiweṣṣa n řegnus nni iɛarren i-ten SIDI zi zzat i wudem nsen, u ɛlaḥsab tiweṣṣa n ijeǧiden n Israil inni ten iggin. 
Ayt n Israil tuɣa dřin timesřayin i war ittřiqin zzat i SIDI. Nitni ssbedden i ixef nsen řegɛudi di marra tineddam nsen, wah, zi lburj n tɛessast ař tandint ifaryen s iɣebřawen. 
Nitni ssbedden imayḍuten iqeddsen d trebbin n cwarti x kuř tawrirt yuɛřan u sadu kuř azɣar d aziza. 
Nitni qeddmen tiwhibin n řebxur x marra řegɛudi, am mammec ggin řegnus nni tuɣa issuffeɣ SIDI zi zzat n wudem nsen. Nitni ggin timesřayin d tiɛeffanin ařami sɛaren SIDI. 
Nitni sexxaren i imeyḍa n l’aṣnam i x tuɣa d asen inna SIDI: “War iɛeddeř ad teggem aya!” 
SIDI iɛřem i Israil d Yahuda s uqemmum n marra inabiyyen, u s kuř ijj n umwařaw, inna: “Tubem zi tbridin nwem tiɛeffanin u ḥḍam x lfarayiḍ inu d tweṣṣa inu ɛlaḥsab marra Ccariɛa i zi umureɣ řejdud nwem u wenni d awem dd-ssekkeɣ s ufus n imsexxaren inu, inabiyyen. 
Nitni war sřin ca u tuɣa qesḥen aṭṭas am mammec tuɣa qesḥen aṭṭas řejdud nsen, inni war iggin ttiqet di SIDI, AREBBI nsen. 
Nitni nḍaren tiweṣṣa nnes d Řɛahd nnes, wenni igga Netta ak-d řejdud nsen, uřa d cchadat nnes nni tuɣa xasen iched. Nitni ḍfaren min iǧan di řbaṭeř uca uřa d nitni s yixef nsen dewřen beṭṭřen. Nitni ḍfaren ɛawed řegnus nni d asen dd-innḍen i x tuɣa d asen inna SIDI aqa ad tteggen am mammec ggin nitni. 
Nitni aggʷejen x marra tiweṣṣa n SIDI, AREBBI nsen, u ggin i yixef nsen řexyařat ifesyen: tnayen n iɛejmiyyen. Nitni ggin ɛawed ict n trebbit n cwarti uca bendqen i marra řɛeskar n ujenna u ɛebden i Baɛal.    
Nitni arrin iḥenjiren nsen d tḥenjirin nsen ad cuqen di tmessi uca ssxedmen aɛezzem d tgezzant. Nitni zzenzen ixef nsen, maḥend ad ggen min iǧan d aɛeffan di tiṭṭawin n SIDI, ḥima ad t sɛaren. 
X uyenni isɛar SIDI aṭṭas x Israil, ařami inḍar i-ten x wudem nnes. War zzaysen iqqim walu mɣir taqbič n Yahuda. 
Maca uřa d Yahuda war iḥḍa lfarayiḍ n SIDI, AREBBI nsen. Nitni uyuren di tweṣṣa n Israil nni ggin s yixef nsen. 
SIDI inḍar marra zzariɛet n Israil. Netta issbehdeř i-ten uca iwca i-ten deg ufus n imkeccaḍen ařami inḍar i-ten x wudem nnes. 
Maɣar Netta tuɣa iqřeɛ Israil zi taddart n Dawud uca ggin Yarubɛam, mmis n Nabaṭ d ajeǧid. Yarubɛam maca ibḍa Israil x SIDI uca yarra i-ten ad ggen ijj n ddenb d ameqqran. 
Ayt n Israil kkin di marra ddnub i igga Yarubɛam. Nitni war xasen ḥeyyden ca, 
ařami inḍar SIDI Israil zi zzat i wudem nnes am mammec tuɣa issiweř s uqemmum n marra imsexxaren nnes, inabiyyen. Ssuffɣen Israil zeg wudem n temmurt nnes di lmenfa ɣar Accur, ař ass-a. 
Ajeǧid n Accur yiwi-dd iwdan zi Babil d Kuta d Ɛawa d Ḥamat d Sfarwayim, uca issezdeɣ i-ten di tneddam n Samarya, deg wemcan n ayt n Israil. Nitni ṭṭfen Samarya d řwart i yixef nsen u ggin ad zedɣen di tneddam nnes. 
Umi dinni zedɣen ɛad cwayt, imsar aqa nitni war ggʷiden ca SIDI. Xenni issekk SIDI iyraden jar asen inni inɣin ca zzaysen. 
Nitni ssiwřen x man aya ak-d u ujeǧid n Accur, nnan: “Řegnus nni tessuffɣed u tesszedɣed di tneddam n Samarya, war ssinen mammec teǧa tubbart n AREBBI n temmurt. X uya Netta issekk iyraden jar asen, u xzar, nitni nɣin ten, maɣar war ssinen ca tubbart n AREBBI n temmurt. 
Ajeǧid n Accur yumur, inna: “Jjem ad din iraḥ ijjen zeg ikehhanen nni tnedhem ssenni. Nitni ad din raḥen u ad din zedɣen u netta ad asen isseřmed tubbart n AREBBI n temmurt.” 
Yusa-dd ijjen zeg ikehhanen nni tuɣa nedhen zi Samarya uca netta izdeɣ di Bayt-Il. Isseřmed i-ten mammec ɣa weqqaren SIDI. 
Maca kuř řgens yarni ad igg irebbiten n yixef nnes uca ssbedden ten di tudrin x řegɛudi nni tuɣa bnan Isamariyyen, kuř řgens di tneddam nsen mani tuɣa zeddɣen. 
Iryazen n Babil ggin i yixef nsen Sukkut-Bnut, u iryazen zi Kuta ggin Narjal, u iryazen zi Ḥamat ggin Acima, 
u Iɛawiyyen ggin iwrafen n Nibḥaz d Tartaq, uca Isafarwayyin sscemḍen iḥenjiren nsen i Adrammilik d Ɛanammilix, irebbiten n Sfarwayim. 
S marra man aya ggʷeden nitni ɛawed SIDI, maca di řweqt d ijj ggin nitni i yixef nsen zi marra řeṣfuf nsen ɛawed ikehhanen i řegɛudi, inni d asen isexxaren di tudrin x řegɛudi. 
Nitni ggʷeden SIDI uca sexxaren uřa i irebbiten n ixef nsen am mammec tuɣa teǧa tubbart n řegnus i zi tuɣa ttwanedhen nitni. 
Ař ass-a tteggen nitni ɛlaḥsab ṭṭbayeɛ nsen n zic. Nitni war tteggʷden ca SIDI u war tteggen ca ɛlaḥsab tiweṣṣa d lfariḍa, ixs ad yini Ccariɛa d řumur i igga SIDI x ayt n Yaɛqub wenni umi tuɣa iwca isem ‘Israil’. 
SIDI igga ijj n Řɛahd akidsen, uca yumur i-ten, inna: “Kenniw war tzemmarem ad tweqqarem irebbiten nneɣni, war d asen ttaḍarem, war d asen ɛebbdem u war d asen ttawyem taɣarṣt. 
Maca ittxeṣṣa ad teggʷdem SIDI, wenni kenniw dd-issuffɣen zi Miṣra s jjhed ameqqran u s uɣiř isswiẓẓḍen, u ad as tsejdem u ad as tawyem taɣarṣt. 
Ad teḥḍam tiweṣṣa d lfarayiḍ d Ccariɛa d řumur nni d awem yura, maḥend ad ten teggem kuř ass. War iḥeǧeř ad teggʷdem irebbiten nneɣni. 
War tᵉttᵉttum Řɛahd i ggiɣ akidwem u war tᵉttweqqarem i irebbiten nneɣni, 
maɣar ad teggʷedem SIDI, AREBBI nwem. Netta ad kenniw issenjem zeg ufus n marra řɛedyan nwem.” 
Maca nitni war xsen ad sřen, maca ggin ɛlaḥsab tubbart nsen n zic. 
Řegnus ggʷeden SIDI u sexxaren uřa i řexyařat nsen ineqcen deg umur d ijjen. Uřa d iḥenjiren nsen d iḥenjiren n iḥenjiren nsen tteggen ɛad am mammec ggin řejdud nsen, ař ass-a. 
