﻿1 Ijeǧiden.
16.
Yusa-dd wawař n SIDI ɣar Yahu, mmis n Ḥanani. Awař tuɣa ḍidd i Baɛca, inna: 
“Minzi Necc ssgeɛɛdeɣ-dd cek zi tɛejjajt u ggiɣ cek d řḥakem x řgens inu Israil, uca cek tuyured x webrid n Yarubɛam u tarrid řgens inu Israil ad ixḍa umi i d ayi tesɛared s ddnub nsen, 
xzar, s uya ad mḥiɣ min iqqimen n Baɛca d min iqqimen n taddart nnes, u Necc ad ggeɣ taddart nnec am taddart n Yarubɛam, mmis n Nabaṭ. 
Man wen zi taddart n Baɛca i ɣa immten di tendint, ad t ccen yiṭan u man wen zzayes i ɣa immuten deg iyyar, ad t ccen yijḍaḍ n ujenna.” 
Imezruyen iqqimen n Baɛca, d marra min igga, ma man aya marra war ittwazemmem ca deg wedlis n imezruyen n ijeǧiden n Israil? 
Baɛca igga ad yareyyeḥ jar řejdud nnes u netta ittwanḍeř di Tirṣa. Mmis Ila idweř d ajeǧid deg wemcan nnes. 
Ammu dd-yusa wawař n SIDI s ufus n unabi Yahu, mmis n Ḥanani, uřa x Baɛca d taddart nnes zi ssibbet n marra taɛeffant i igga di tiṭṭawin n SIDI, umi t isɛar s řexdayem n ifassen nnes u umi idweř am taddart n Yarubɛam, uca uřa minzi netta tuɣa iqḍa wanita. 
Deg useggʷas wiss setta u-ɛicrin n Asa, ajeǧid n Yahuda, idweř Ila, mmis n Baɛca, d ajeǧid x Israil di Tirṣa, i ijj n řmijař n tnayen n iseggʷusa. 
Zimri, amsexxar nnes, wenni d akumandar x ijj n wezyen n ikarruten n umenɣi, igga xas ict n tmeɛmuč umi t tuɣa di Tirṣa, tuɣa iscar di taddart n Arṣa, wenni tuɣa d ameḥḍay x taddart di Tirṣa. 
Zimri yudef, iwta i-t uca inɣa i-t deg useggʷas wiss sebɛa u-ɛicrin n Asa, ajeǧid n Yahuda. Netta idweř d ajeǧid deg wemcan nnes. 
Řami idweř d ajeǧid uca inya x řɛarc nnes, imsar, aqa iqḍa x marra taddart n Baɛca. Netta war ijji uřa d ijj wenni t iggin x řḥiḍ ad iddar, u war ijji uřa d ijj wenni izemmaren ad as intaqem u uřa d ijj zeg imeddukkař nnes. 
Ammu i iteḥḥa Zimri marra taddart n Baɛca ɛlaḥsab awař n SIDI nni issiweř Baɛca s ufus n unabi Yahu, 
di ssibbet n marra ddnub n Baɛca d ddnub n mmis Ila i zi xḍan nitni u i zi arrin Israil ad ixḍa am sɛaren SIDI, AREBBI n Israil, s l’aṣnam nsen ibeṭṭřen. 
Imezruyen iqqimen n Ila, d marra min igga, ma man aya marra war ittwazemmem ca deg wedlis n imezruyen n ijeǧiden n Israil? 
Deg useggʷas wiss sebɛa u-ɛicrin n Asa, ajeǧid n Yahuda, tuɣa Zimri sebɛa n wussan d ajeǧid di Tirṣa. Řgens tuɣa iḥeṣṣar i Jibbatun nni iǧan n Ifilisṭiniyyen. 
Řgens i tuɣa iwtin iqiḍan nnes din, isřa aqa qqaren: “Zimri tuɣa igga d ict n tmeɛmuč uca inɣa ajeǧid.” Deg wass nni marra řgens yarra Ɛumri, wenni d akumandar x řɛeskar, d ajeǧid x Israil di řmargeḥ n řɛeskar. 
Ɛumri igeɛɛed-dd zi Jibbatun d marra Israil akides uca nnḍen as-dd i Tirṣa. 
Umi iẓra Zimri aqa tandint tuɣa tᵉttwaṭṭef, yudef ɣar lqelɛa n taddart n ujeǧid, iqedd tiwa nnes timessi i taddart n ujeǧid, ařami immut 
di ssibbet n ddnub nnes i tuɣa igga, umi igga min iǧan d aɛeffan di tiṭṭawin n SIDI, umi yuyur deg webrid n Yarubɛam uřa di ssibbet n ddnub i igga am d yarra Israil ad ixḍa. 
Imezruyen iqqimen n Zimri, d tameɛmuč i igga, ma man aya marra war ittwazemmem ca deg wedlis n imezruyen n ijeǧiden n Israil? 
Xenni ittwammsebḍa řgens n Israil x tnayen n iziynat. Ijj n wezyen n řgens ibedd awarni i Tibni, mmis n Jinat, maḥend ad t ggen d ajeǧid, u ijj n wezyen nneɣni ibedd awarni i Ɛumri. 
Řgens nni ibedden awarni i Ɛumri, tuɣa ijhed x řgens nni ibedden awarni i Tibni, mmis n Jinat. Xenni immut Tibni u Ɛumri idweř d ajeǧid. 
Deg useggʷas wiss waḥit u-třatin n Asa, ajeǧid n Yahuda, idweř Ɛumri d ajeǧid x Israil. Netta iḥkem tenɛac n iseggʷusa. Di Tirṣa iḥkem setta n iseggʷusa. 
Isɣa adrar n Samarya zi Camir s tnayen talint n nnuqart, u netta ibda ad ibna x wedrar n Samarya. Iřaɣa as i tendint i ibna ‘Samarya’, ɛlaḥsab isem n Camir, bab n wedrar. 
Ɛumri igga min iǧan d aɛeffan di tiṭṭawin n SIDI. Netta tuɣa igga min iǧan d aɛeffan mahu x marra inni tuɣa d as izwaren. 
Netta yuyur di kuř tabridt n Yarubɛam, mmis n Nabaṭ, u di ddnub nnes i zi yarra Israil ad ixḍa, umi sɛaren nitni SIDI, AREBBI n Israil, s l’aṣnam nsen ibeṭṭřen. 
Imezruyen iqqimen n Ɛumri d min igga d ṣṣulṭa nnes i zi igga, ma man aya marra war ittwazemmem ca deg wedlis n imezruyen n ijeǧiden n Israil? 
Ɛumri igga ad yareyyeḥ jar řejdud nnes. Netta ittwanḍeř di Samarya. Mmis Axab idweř d ajeǧid deg wemcan nnes. 
Axab, mmis n Ɛumri, idweř d ajeǧid x Israil deg useggʷas wiss tmenya u-třatin n Asa, ajeǧid n Yahuda. Axab mmis n Ɛumri, iḥkem tnayen u-ɛicrin n iseggʷusa x Israil di Samarya. 
Axab, mmis n Ɛumri, igga min iǧan d aɛeffan di tiṭṭawin n SIDI, mahu x marra inni tuɣa zzayes izwaren. 
Tuɣa tuyurt nnes di ddnub n Yarubɛam, mmis n Nabaṭ, drus waha, maɣar netta yiwi Izabal, yeǧis n It-Baɛal, ajeǧid n Iṣiduniyyen, d tamɣart, uca yuyur ad iɛbed i Baɛl, isjed as. 
Netta issbedd ijj n uɛalṭar i Baɛl di zzawect n Baɛl nni ibna netta di Samarya. 
Netta igga ɛawed ict n trebbit n cwarti. Axab iɛdu s wesɛar nnes i SIDI, AREBBI n Israil, x marra ijeǧiden nni tuɣa i d as izwaren. 
Deg wussan nnes ibna Ḥiyil, zi Bayt-Il, tandint n Ariḥa. Issars dsas nnes di ssum n mmis amenzu Abiram u di ssum n mmis amaẓuẓ Sajub yarekkeb tiwwura nnes ɛlaḥsab awař n SIDI i issiweř s uqemmum n Yacuwa, mmis n Nun. 
