﻿1 Ijeǧiden.
1.
Tuɣa ajeǧid Dawud iwsar u imɣar deg wussan. Ssduryen t s warruḍ maca war t iřqif ɛad řeḥmu. 
Nnan as imsexxaren nnes: “Ejj ad arzun i sidi inu ajeǧid ict n tebřiɣt d taɛzarect u ejj i-tt ad tbedd zzat i wudem n ujeǧid, ad dayes tᵉthilla. Ejj i-tt ad tᵉṭṭeṣ ɣar idmaren nnes, ḥima sidi inu ajeǧid, ad idweř iḥemma.” 
Arzun nitni di marra tammurt n Israil x ict n tebřiɣt dayes aẓri. Ufin Abicaj, Tacunamit, uca iwyen tt ɣar ujeǧid. 
Tabřiɣt tuɣa dayes aẓri aṭṭas u nettat tᵉthilla dayes u tsexxar xas. Ajeǧid war tt issin ca. 
Aduniya, mmis n Hajjit, ixs ad issuɛřa ixef nnes, inna: “Necc ad dewřeɣ d ajeǧid.” Netta iḍebbar ikarruten d imnayen uca izwaren xemsin n yeryazen s tazřa zzat i wudem nnes. 
Babas tuɣa ɛemmarṣ war xas isseqseḥ x man aya řami d as inna: “Mayemmi i teggid aya?” Ɛawed Aduniya tuɣa ɣares ijj n waddud icna. Yemmas turuw t-i-dd awarni i Abcalum.    
Issiweř ak-d Yuwab, mmis n Ṣaruya, u ak-d Abyatar, akehhan, uca nitni wcin afus i Aduniya. 
Maca akehhan Ṣaduq d Banaya, mmis n Yahuyadaɛ, d unabi Natan d Cimɛi d Riɛi uřa d ayt n bu-teɣruḍt nni iǧan ɣar Dawud, war qqinen ca ixef nsen ɣar Aduniya. 
Aduniya iɣarṣ i wuǧi d ifunasen d tfunasin d řmař iṣeḥḥen ɣar weẓru n Zaḥifa wenni ɣar tařa n Rujil. Netta iɛarḍ marra aytmas, iḥenjiren n ujeǧid, u marra iryazen n Yahuda, imsexxaren n ujeǧid. 
Maca anabi Natan d Banaya d ayt n bu-teɣruḍt n Dawud d umas Suliman, war ten iɛriḍ ca. 
Xenni inna Natan i Bat-Cabaɛ, yemmas n Suliman, inna: “Ma war tesřid cem, aqa Aduniya, mmis n Hajjit, idweř d ajeǧid? Aqa Dawud, siditneɣ, war xas yargib? 
Xenni řexxu, as-dd, ejj ayi ad am wceɣ ccwar, ḥima ad tessnejmed tudart nnem d tudart n mmim Suliman. 
Uyur, adef ɣar ujeǧid Dawud, ini as: ‘A sidi inu ajeǧid, ma war tejjuǧed i tayya nnec, tennid: S tidett, mmim Suliman ad yiři d ajeǧid awarni ayi u netta ad iqqim x řɛarc inu? Mayemmi idweř xenni Aduniya d ajeǧid?’ 
Xzar, umi cem dinni tessawařed ɛad ak-d ujeǧid, ad adfeɣ uřa d necc ad kemmřeɣ awařen nnem.” 
Bat-Cabaɛ tudef ɣar ujeǧid deg wexxam n daxeř. Ajeǧid tuɣa iwsar aṭṭas u Abicaj, Tasunamit, tsexxar xas. 
Bat-Cabaɛ tuḍar, tbendeq i ujeǧid uca ajeǧid inna: “Min cem yuɣin?” 
Nettat tenna as: “A sidi inu, cek tejjuǧed i tayya nnec ɣar SIDI, AREBBI nnec: ‘S tidett, Suliman, mmim, ad yiři d ajeǧid awarni ayi u netta ad iqqim x řɛarc inu! 
Uca řexxu, xzar, Aduniya idweř d ajeǧid, u řexxu, sidi inu ajeǧid, cek war xas tessargibed ca. 
Netta iɣarṣ i waṭṭas n ifunasen d řmař iṣeḥḥen d wuǧi u netta iɛarḍ x marra iḥenjiren n ujeǧid u x Abyatar, akehhan, u x Yuwab, akumandar n řɛeskar, maca amsexxar nnec Suliman, war t iɛriḍ ca. 
Ɣarek cek, a sidi inu ajeǧid, ɣarek cek xezzarent marra tiṭṭawin n Israil, ḥima cek ad asen tessecned man wen i ɣa iqqimen x řɛarc n sidi inu ajeǧid awarni as netta. 
Niɣ ad imsar, mařa sidi inu ajeǧid ad igg ad yareyyeḥ jar řejdud nnes, aqa necc d mmi Suliman ad ttwaḥesben d ayt n řmuɛṣiyyet.’” 
U xzar, am tessawař nettat ɛad ak-d ujeǧid, yudef-dd anabi Natan. 
Xebbaren aya i ujeǧid, nnan: “Xzar, aqa da anabi Natan.” Netta yusa-dd zzat i wudem n ujeǧid, ibendeq zzat i ujeǧid s uɣembub nnes ɣar temmurt. 
Inna Natan: “Sidi inu ajeǧid, ma tennid cek: ‘Aduniya ad yiři d ajeǧid awarni ayi u netta ad iqqim x řɛarc inu’? 
Maɣar netta ihwa ass-a u netta iɣarṣ i waṭṭas n ifunasen d řmař iṣeḥḥen d wuǧi u iɛarḍ x marra iḥenjiren n ujeǧid u x ikumandaren n řɛeskar u x ukehhan Abyatar. Xzar nitni ttᵉtten, sessen zzat i wudem nnes, qqaren: ‘Ad iddar ujeǧid Aduniya!’ 
Maca necc, necc wenni d amsexxar nnec, d ukehhan Ṣaduq d Banaya, mmis n Yahuyadaɛ, d Suliman, amsexxar nnec, war d aneɣ iɛriḍ ca. 
Ma iffeɣ-dd wawař-a zi sidi inu ajeǧid? Ma xenni war tessargibed ca amsexxar nnec, man wen i ɣa iqqimen x řɛarc n sidi inu ajeǧid awarni as?” 
Ajeǧid Dawud iṭṭef deg wawař, inna: “Řaɣat ayi-dd x Bat-Cabaɛ!” Nettat tusa-dd ɣar zzat i wudem n ujeǧid, tbedd din zzat i wudem n ujeǧid. 
Xenni ijjuǧ ujeǧid, inna: “S tidett am iddar SIDI, wenni ifekken řeɛmar inu zi marra řeḥṣaret, 
wah nican, am mammec d am jjuǧeɣ ɣar SIDI, AREBBI n Israil, nniɣ: ‘Aqa mmim Suliman ad yiři d ajeǧid awarni ayi u netta ad iqqim x řɛarc inu deg wemcan inu!’, wah, ammu i-t ɣa ggeɣ s tidett ass-a.” 
Xas uca tuḍar Bat-Cabaɛ s uɣembub nnes ɣar temmurt, tbendeq i ujeǧid, tenna: “Ad iddar sidi inu, ajeǧid Dawud, i řebda!” 
Xas uca inna ujeǧid Dawud: “Řaɣat ayi-dd i ukehhan Ṣaduq d unabi Natan d Banaya, mmis n Yahuyadaɛ!” Uca nitni usin-dd zzat i wudem n ujeǧid. 
Inna asen ujeǧid: “Ksim imsexxaren n siditwem akidwem u ejj mmi Suliman ad iniy x usardun i ɣari iǧan u sehwa t ɣar Jiḥun. 
Ejj akehhan Ṣaduq ak-d unabi Natan ad t idhen dinni d ajeǧid x Israil. Xenni ad tsuḍem deg uyicc n icarri, ad tinim: ‘Tudart i Suliman!’ 
Ittxeṣṣa ad tgeɛɛdem awarni as u netta ad dd-yas ad iqqim x řɛarc inu. Netta ad yiři d ajeǧid deg wemcan inu, maɣar necc umureɣ as ḥima ad yiři d řḥakem x Israil u x Yahuda.” 
Banaya, mmis n Yahuyadaɛ, yarra-dd x ujeǧid, inna: “Amin, ammu i iqqar SIDI, AREBBI n sidi inu ajeǧid! 
Am mammec tuɣa iǧa SIDI ak-d sidi inu ajeǧid, ammu i ɣa yiři Netta uřa ak-d Suliman. Iři Netta ad issemɣar ɛad řɛarc nnes x řɛarc n sidi inu, ajeǧid Dawud!” 
Xenni ihwa ukehhan Ṣaduq ak-d unabi Natan d Banaya, mmis n Yahuyadaɛ, u ak-d iɛessasen n arrimet d ireqqasen n tazřa. Nitni ssenyen Suliman x usardun n ujeǧid Dawud u nedhen t ɣar Jiḥun. 
Akehhan Ṣaduq, iksi icc s zzect zeg uqiḍun uca idhen Suliman. Nitni suḍen deg uyicc n icarri u marra řgens inna: “Tudart i ujeǧid Suliman!” 
Marra řgens igeɛɛed awarni as. Iwdan ṣeffaren di tzamarin u farḥen s ict n řefraḥet temɣar ařami tfeǧeq temmurt s řḥess nsen. 
Isřa aya Aduniya ak-d marra inewjiwen nni ɣares iǧan. Nitni tuɣa bḥřa mmunswen. Uřa d Yuwab isřa i usuḍi deg uyicc n icarri, inna: “Mana řḥess zi tendint ammu s zzhir aṭṭas?” 
Am issawař netta ɛad, yusa-dd Yunatan, mmis n ukehhan Abyatar. Aduniya inna: “Adef-dd ɣar daxeř, minzi cek d ijj n weryaz imeḥḍen. Cek ad tawyeḍ nican ijj n řexbar aṣebḥan.” 
Yunatan yarra-dd, inna i Aduniya: “S řemqřub, siditneɣ, ajeǧid Dawud, igga Suliman d ajeǧid. 
Ajeǧid issekk akides akehhan Ṣaduq d unabi Natan d Banaya, mmis n Yahuyadaɛ, d iɛessasen n arrimet d ireqqasen n tazřa u ina ggin t ad iniy x usardun n ujeǧid. 
Akehhan Ṣaduq d unabi Natan dehnen t d ajeǧid di Jiḥun u ssenni geɛɛden s řefraḥet ařami tehweř tendint. Aya d řḥess i tesřim. 
Uřa d Suliman ittɣima x řɛarc n tgeldit. 
Uřa d imsexxaren n ujeǧid usin-dd, ḥima ad barken siditneɣ, ajeǧid Dawud, nnan: ‘Iři ad yarr AREBBI nnec isem n Suliman ɛad icna x yisem nnec u ad yarr řɛarc nnes ɛad imɣar x řɛarc nnec.’ Xas uca ibendeq ujeǧid x tassut nnes. 
Ɛawed inna ujeǧid: ‘Ad ittwabarek SIDI, AREBBI n Israil, wenni iwcin ass-a ad iqqim ijjen x řɛarc inu, umi tiṭṭawin inu ɛad zemmarent ad twařant aya.’” 
Marra inewjiwen inni tuɣa iǧan ɣar Aduniya nnxeřɛen, kkaren uca ffɣen, kuř aryaz yuyur abrid nnes. 
Aduniya iggʷed zi Suliman. Netta ikkar, yuyur uca icebbar deg waccawen n uɛalṭar. 
Xebbaren man aya ɣar Suliman, nnan: “Xzar, Aduniya, iggʷed zeg ujeǧid Suliman, maɣar aqa netta icebbar deg waccawen n uɛalṭar, iqqar: ‘Ejj ajeǧid Suliman ad ayi ijjaǧ ass-a, aqa netta war ineqq amsexxar nnes s ssif!’” 
Inna Suliman: “Mařa netta iban-dd d ijj n weryaz d amtiqqi, war xas iweṭṭi uřa d ijj n uzeṭṭu n ucuwwaf nnes, maca mařa ittwaf dayes tuɛeffna, ittxeṣṣa ad immet.” 
Ajeǧid Suliman issekk ca n ireqqasen u nitni kessin t zeg uɛalṭar u netta yusa-dd, ibendeq zzat i ujeǧid Suliman. Inna as Suliman: “Ruḥ ɣar taddart nnec!” 
