﻿2 Ṣamwil.
6.
Dawud issmun twařa nneɣnit marra iɛeskariyyen ittwafarzen di Israil, třatin-ařef n yeryazen. 
Uca ikkar Dawud, iffeɣ ak-d marra řgens i ɣares iǧan zi Baɛli-Yahuda ḥima ad ssenni issgeɛɛed Ttabut n SIDI, Ttabut i x ittwabarreḥ s Yisem, s Isem n SIDI n řɛeskarat, wenni ittɣiman x ikiruben. 
Nitni nedhen Ttabut n SIDI x ijj n ukarru n jdid. Nitni iwyen tt-i-dd zi taddart n Abinadab tenni ibedden x ict n teɛrurt. Ɛuzza d Axiyu, iḥenjiren n Abinadab, nedhen akarru n jdid. 
Nitni iwyen t-i-dd zi taddart n Abinadab i tuɣa ibedden x ict n teɛrurt, uca uyuren ak-d Ttabut n SIDI. Axiyu yuyur ɣar zzat i Ttabut. 
Dawud d marra taddart n Israil uraren zzat i wudem n SIDI s ɛřam kuř dduzan n ǧɣa zeg ukeccuḍ n tcejjart n umerzi, s řgambriyat d lharpat d ibendiren d nnaqusat d teǧunin n wuzzař. 
Umi iwḍen ɣar unedrar n Naxun, isswiẓẓeḍ Ɛuzza afus nnes ɣar Ttabut n AREBBI uca iṭṭef i-tt, minzi nderfen ifunasen. 
Xenni yarɣa weɣḍab n SIDI x Ɛuzza uca iwta i-t AREBBI din x uxeṭṭu-ya. Netta immut din ɣar Ttabut n SIDI. 
Yiweḍ ssem ɣar wuř n Dawud, aqa SIDI tuɣa isɛar ammu x Ɛuzza, uca iřaɣa as i wemcan nni Fariṣ-Ɛuzza ař ass-a. 
Deg wass nni teřqef Dawud tiggʷudi zi SIDI, inna: “Mammec i ɣa yegg ad ɣari dd-tas Ttabut n SIDI?” 
S uyenni Dawud war ixs ad yejj ad ɣares dd-awyen Ttabut n SIDI di tendint n Dawud. Dawud ijja i-tt ad taggʷej ɣar taddart n Ɛubid-Idum, Ajitti. 
Tekka Ttabut n SIDI třata n iyuren di taddart n Ɛubid-Idum, Ajitti, uca SIDI ibarek Ɛubid-Idum d marra taddart nnes. 
Xenni xebbaren i ujeǧid Dawud, nnan: “SIDI aqa ibarek taddart n Ɛubid-Idum d marra min iǧan nnes, di ṭṭweɛ n Ttabut n AREBBI.” Xenni yuyur Dawud din, issgeɛɛed Ttabut n AREBBI s řefraḥet zi taddart n Ɛubid-Idum ɣar tendint n Dawud. 
Řami uyuren inni yarebbun Ttabut n SIDI setta n iṣuraf, imsar, aqa iqeddem Dawud ijj n ufunas d ijj n uɛejmi imesřen d tɣarṣt. 
Dawud icḍeḥ s marra tizemmar nnes zzat i wudem n SIDI. Tuɣa Dawud yarḍ ijj n upalṭu n ukehhan n řeqṭen. 
Dawud d marra taddart n Israil iwyen Ttabut n SIDI s usřiwřew u s řḥess n usuḍi deg uyicc n icarri ɣar sennej. 
Řami dd-tiweḍ Ttabut n SIDI ɣar tendint n Dawud, imsar, aqa Mixal, yeǧis n Cawul, texzar-dd zi řkazi. Umi teẓra nettat mammec ineggez d iceṭṭeḥ ujeǧid Dawud zzat i wudem n SIDI, tesseḥqar i-t deg wuř nnes. 
Arbun Ttabut n SIDI ɣar daxeř uca ssarsen tt deg wemcan nnes di řwesṭ n uqiḍun nni tuɣa i d as icedd Dawud uca Dawud issgeɛɛed tiɣarṣa n wecmaḍ zzat i wudem n SIDI, uřa d tiɣarṣa n řehna. 
Umi ikemmeř Dawud zeg usgeɛɛed n tɣarṣa n wecmaḍ d tɣarṣa n řehna, ibarek řgens deg Yisem n SIDI n řɛeskarat. 
Netta ibḍa x marra řgens, x marra řɣaci n Israil, x yeryazen d temɣarin, i kuř ijj iwca as ict n txebbazt n weɣrum, ijj n uřeqquz n weysum n ufunas d ijj n weɣrum n zzbib. Xenni yuyur řgens marra, kuř aryaz ɣar taddart nnes. 
Yareggʷeḥ Dawud, ḥima ad ibarek taddart nnes. Teffeɣ-dd ɣares Mixal, yeǧis n Cawul, tenna as: “Mammec igga ujeǧid n Israil ass-a ccan d ameqqran i ixef nnes, umi iɛarra netta ixef nnes zzat i tiṭṭawin n tiyya n imsexxaren nnes am mammec iɛarra ca n yijjen zeg inni war isekkwin?” 
Dawud yarra-dd x Mixal: “Necc ggiɣ t zzat i wudem n SIDI wenni d ayi ifarzen x babam d marra taddart nnes, ḥima ad ayi igg d řḥakem x řgens n SIDI, x Israil, aqa zzat i wudem n SIDI i ceṭṭḥeɣ s řefraḥet. 
D ameẓyan ɛad i ɣa dewřeɣ. Necc ad iřiɣ d amuqřiř di tiṭṭawin inu. Ɣar tiyya i x tessiwřed cem, ɣarsent i ɣa ṭṭfeɣ ccan.” 
Mixal, yeǧis n Cawul, teqqim břa aḥenjir ař ass n řmewt nnes. 
