﻿2 Ṣamwil.
1.
Imsar awarni i řmewt n Cawul, umi dd-iɛqeb Dawud zi řeɣřeb x ayt n Ɛamaliq, iqqim Dawud tnayen n wussan di Ṣiqlaɣ. 
Xenni imsar deg wass wiss třata, aqa da, yusa-dd ijj n weryaz zi řmargeḥ n řɛeskar n Cawul s warruḍ icarreg u s ucař x uzeǧif nnes. Umi dd-yiweḍ netta ɣar Dawud, iwḍa ɣar temmurt, yuḍar as. 
Dawud inna as: “Manis i dd-tusid cek?” Netta yarra-dd xas: “Necc ssnejmeɣ-dd ixef inu zi řmargeḥ n řɛeskar n Israil.” 
Dawud inna as: “Min din d řexbar? Ini ayi t!” Netta yarra-dd xas: “Řgens yarweř zeg umenɣi u aṭṭas n řgens i wḍan, mmuten. Uřa d Cawul d mmis Yunatan mmuten.” 
Dawud inna i uḥudri nni d as dd-yiwyen řexbar: “Mammec teggid tessned, belli Cawul d mmis Yunatan mmuten?” 
Xenni inna uḥudri i d as dd-yiwyen řexbar: “Necc usiɣ-dd amenni waha ɣar idurar n Jilbuɛa uca ẓriɣ mammec isenned Cawul x lansa nnes u ikarruten n umenɣi d imnayen inni xasen inyin ḍeffaren t břa qeṭṭu. 
Netta, am dd-inneqřeb, iẓra ayi, iřaɣa ayi-dd u necc nniɣ as: ‘Aqa-yi da!’ 
Netta inna ayi: ‘Min teɛnid cek?’ Necc arriɣ-dd xas: ‘Necc zeg ayt n Ɛamaliq.’ 
Xenni inna ayi netta: ‘As-dd ɣari, neɣ ayi, maɣar necc teřqef ayi tuccent, maca waxxa amenni tudart aqa-tt dayi.’ 
Řexdenni necc uyureɣ u nɣiɣ t, maɣar necc ssneɣ, aqa war ittɣimi iddar awarni i uweṭṭu nnes. Xenni ksiɣ ttaj n weɛzař nni x uzeǧif nnes d tmeqyast i tuɣa ɣares deg uɣiř, iwyeɣ ten-dd řexxu da ɣar sidi inu.” 
Řexdenni iṭṭef Dawud arruḍ nnes, icarreg i-t. Ammu i tt ggin uřa d marra iryazen i tuɣa ɣares iǧan. 
Nitni wtin agejdur, run u ẓummen ař tameddit x Cawul, x mmis Yunatan, x řgens n SIDI u x taddart n Israil, minzi wḍan s ssif. 
Xenni inna Dawud i uḥudri nni tuɣa i d as-dd-yiwyen řexbar: “Zi manis dd-tusid cek?” Netta inna as: “Necc d mmis n ijj n ubarrani, n ijj n weryaz zeg ayt n Ɛamaliq.” 
Dawud inna as: “Mammec teggid, cek war teggʷided ca ad tesswiẓẓḍed s ufus ḥima ad tareddǧed amedhun n SIDI?” 
Xas uca iřaɣa-dd Dawud x ijjen zeg imsexxaren inna: “Qarreb-dd, ḥeyyeḥ xas!” U netta iḥeyyeḥ xas ařami t inɣa. 
Dawud inna as: “Idammen nnec ad iřin x uzeǧif nnec, maɣar aqemmum nnec iched xak umi tennid: ‘Necc nɣiɣ amedhun n SIDI.’” 
Iɣennej Dawud izři-ya n wecḍan x Cawul u x mmis Yunatan. 
Netta inna: “Ad řemden ayt n Yahuda Izři n Řqews.” Xzar, yura deg Wedlis n Umsegged. 
“Talwizt n Israil ittwaneɣ x řegɛudi nnec. Mammec wḍan ayt n bu-teɣruḍt! 
War tt ttḥajam di Jat, war ttsiwḍem řexbar deg ibriden n Acqalun, maḥend yessis n Ifilisṭiniyyen war farrḥent, maḥend yessis n yinni war ittwaxetnen war ssřiwřiwent. 
A idurar n Jilbuɛa, war xawem ittiři nnda niɣ anẓar, war xawem ttiřin iyyaren maḥend ad zzaysen ttwakksent tiwhibin n usgeɛɛed, maɣar din ittwabeqqeḍ tseddart n ayt n bu-teɣruḍt s řɛar, taseddart n Cawul, axmi netta war iǧi d amedhun s zzect. 
Zeg idammen n yinni ittwanɣen, zi tadunt n ayt n bu-teɣruḍt war d imniɛ řqews n Yunatan, u ssif n Cawul war dd-iɛqib baṭeř. 
Cawul d Yunatan ttwaɛizzen d iɣřan ɣar iwdan di tudart nsen, u di řmewt nsen war mmsebḍin. Nitni tuɣa aten fsusen x igidaren d jehden x wayraden. 
A yessis n Israil, runt x Cawul, wenni kennint issyarḍen s uzeggʷaɣ, s řeqcuɛ iɣřan, d wenni iggin talwizt n wureɣ x warruḍ nkent. 
Mammec i wḍan ayt n bu-teɣruḍt di řwesṭ n umenɣi! A, Yunatan, tettwanɣed x řegɛudi nnec. 
Di ssibbet nnec ttwaḥṣareɣ, a uma Yunatan! Cek tuɣa tᵉttwaɛizzed ɣari aṭṭas. Tuɣa tayri nnec ɣari d ssar ktar x tayri n temɣarin. 
Mammec wḍan ayt n bu-teɣruḍt, mammec weddaren řesnaḥ n umenɣi!” 
