﻿1 Ṣamwil.
15.
Camwil inna i Cawul: “SIDI tuɣa issekk ayi-dd ḥima ad cek dehneɣ d ajeǧid x řgens nnes, x Israil. Seř xenni ɣar wawařen n SIDI. 
Ammu i iqqar SIDI n řɛeskarat: ‘Necc ad xeǧṣeɣ min igga Ɛamaliq i Israil, aqa ibedd as deg webrid umi dd-igeɛɛed Israil zi Miṣra. 
Kkar řexxu u wwet Ɛamaliq. Ḥarrem marra min ɣares i uteḥḥi u war xas ttḥiwiř ca, maca neɣ marra, zeg weryaz ař temɣart, zeg uḥenjir ař aseymi, zeg ufunas ař uǧi, zeg weřɣem ař aɣyuř!’” 
Iřaɣa-dd Cawul x řgens. Isedd i-ten di Ṭalayim. Tuɣa-ten di mitayen-ařef n yeryazen x iḍaren d tenɛac ařef n yeryazen n Yahuda. 
Umi yiweḍ Cawul ɣar tendint n Ɛamaliq, igga ijj n řfex di teɣzurt, 
uca Cawul ijja ad inin i ayt n Iqiniyyen: “Ffɣem, beɛɛdem, semḥem di řwesṭ n Ɛamaliq, ḥima necc war kenniw tteḥḥiɣ akidsen, maɣar kenniw teggim s tmexsiwt icewwaren ak-d ayt n Israil umi dd-ffɣen zi Miṣra.” Xas uca ffɣen Iqiniyyen zi řwesṭ n ayt n Ɛamaliq. 
Xenni iɣřeb Cawul x ayt n Ɛamaliq zi Ḥawila ař Cur i iǧan arendad n Miṣra. 
Ajaj, ajeǧid n Ɛamaliq, iṭṭef i-t iddar, maca marra řgens iḥarrem i-ten i uteḥḥi s řeqḍeɛ n ssif. 
Maca Cawul d řgens ḥawřen x Ajaj uřa x řemxeyyer n wuǧi d ifunasen d tfunasin u x min iǧan iṣebḥen awarni as u x marra izmaren daysen tadunt u x marra min tuɣa d aṣebḥan qaɛ. War xsen ad ten ḥarrmen i uteḥḥi, maca marra min iǧan drus d min iḍeɛfen, ḥarrmen t i uteḥḥi. 
Xenni yusa-dd wawař n SIDI ɣar Camwil, inna: 
“Necc nedmeɣ, aqa ggiɣ Cawul d ajeǧid, maɣar netta iḥeyyed zi ḍeffar inu u war isseqfeř awařen inu.” Innehweř Camwil, isɣuy tameddit tmun ɣar SIDI. 
Tiwecca nnes zic ikkar Camwil, yuyur ad iřqa Cawul. Ittwanna as i Camwil, nnan: “Cawul yusa-dd ɣar Karmil u issbedd dinni ijj n uqellij n řidaret i yixef nnes, xenni inneqřeb, iɛdu, ihwa ɣar Jiljal.” 
Yusa-dd Camwil ɣar Cawul u Cawul inna as: “Aqa cek tᵉttwabarked zi SIDI! Necc ssqefřeɣ awař n SIDI.” 
Xenni yarra-dd xas Camwil: “D min ixs ad yini řḥess-a n wuǧi i d ayi ittadfen deg imezzuɣen inu, d řḥess n ifunasen d tfunasin i ttesřiɣ?” 
Cawul inna: “Nitni iwyen ten-dd akidsen zi Ɛamaliq, minzi řgens iḥaweř x mummu n wuǧi d ifunasen d tfunasin, ḥima ad ten qeddmen d taɣarṣt i SIDI, AREBBI nnec. Min iqqimen nḥarrem i-t i uteḥḥi.” 
Xenni inna Camwil i Cawul: “Cfa! Necc ad cek iniɣ min i d ayi inna SIDI di ǧiřet-a.” Inna as Cawul: “Siweř!” 
Inna Camwil: “Umi teǧid ɛad d ameẓyan di tiṭṭawin nnec, ma war tdewřed ca d azeǧif n tqebbař n Israil, u ma war cek idhen SIDI d ajeǧid x Israil? 
SIDI issekk i cek ɣar webrid, inna: “Uyur, ḥarrem imednab nni, ayt n Ɛamaliq, i uteḥḥi u mneɣ akidsen ař ten ɣa teqḍid qaɛ. 
Mayemmi war tesřid ca ɣar tmijja n SIDI uca tewḍiḍ cek x tkeccaḍt u teggid min iǧan d řɣar di tiṭṭawin n SIDI?” 
Xenni inna Cawul i Camwil: “Necc sřiɣ ɣar tmijja n SIDI u necc kkeɣ abrid i x i d ayi dd-issekk SIDI. Necc iwyeɣ-dd danita Ajaj, ajeǧid n Ɛamaliq uca ayt n Ɛamaliq ḥarrmeɣ ten i uteḥḥi. 
Řgens iksi uǧi d ifunasen d tfunasin zi tkeccaḍt, mummu n min ittwaḥarrmen, ḥima ad qeddmen aya i SIDI, AREBBI nnec, di Jiljal.” 
Maca Camwil inna: “Ma teɛjeb as i SIDI tiɣarṣa n wecmaḍ d tiɣarṣa nneɣni am mammec i d as iɛjeb useǧi i tmijja n SIDI? Xzar aseǧi ḥsen zi tɣarṣt u asḥessi s taynit ḥsen zi tadunt n icarriyyen. 
Minzi aɣewweɣ am ddenb n uɛezzem, u taɣennant am weɛbad n ṣṣanam d řexyařat timeẓyanin n l’aṣnam. Minzi cek tenḍared awař n SIDI, inḍar Netta i cek am ujeǧid.” 
Xenni inna Cawul i Camwil: “Necc xḍiɣ, maɣar necc ttɛeddiɣ x řumur i dd-iffɣen zeg uqemmum n SIDI u x wawařen nnec, minzi necc ggʷedeɣ zi řgens u sřiɣ ɣarsen. 
S uyenni, ɣfar ayi ddenb inu u dweř akidi, xenni ad sejdeɣ i SIDI.” 
Maca Camwil yarra-dd x Cawul: “Necc war kidek dikkʷiřeɣ ca, maɣar cek tenḍared awař n SIDI. S uya SIDI inḍar i cek am ujeǧid x Israil.” 
Umi Camwil inneqřeb ḥima ad yuyur, icebbar as Cawul di tma n useřham nnes, maca wanita icarreg. 
Xenni inna as Camwil: “Deg wass-a icarreg ac SIDI tagelda n Israil u iwca i-tt i jjar nnec wenni iǧan ḥsen zzayek. 
Uřa Lɛaḍim n Israil i ittduman i řebda war issxarriq ca u war indim, maɣar Netta war iǧi d bnadem ařami i ɣa indem.” 
Xas uca inna as: “Necc xḍiɣ. Ewc ayi maca aweqqar zzat i imɣaren n řgens u zzat i Israil. Dweř akidi, xenni ad sejdeɣ i SIDI, AREBBI nnec.” 
Uca idweř Camwil, yareddef Cawul u Cawul ibendeq zzat i SIDI. 
Xas uca inna Camwil: “Awi-dd ɣari Ajaj, ajeǧid n Ɛamaliq. Ajaj yuyur ɣares s arratuḥ. Inna Ajaj ak-d ixef nnes: “S tidett, tarzugi n řmewt tᵉttwaḥeyyed xafi.” 
Maca Camwil inna: “Am mammec issḥarrem ssif nnec timɣarin x iḥenjiren nsent, ammu i ɣa tᵉttwaḥarrem yemmac jar timɣarin x tarwa nnes.” U Camwil iqeṭṭes Ajaj d iceǧiqen zzat i wudem n SIDI di Jiljal. 
Xenni yuyur Camwil ɣar Rama u Cawul igeɛɛed ɣar taddart nnes di Jibɛa n Cawul. 
Camwil war iẓri ɛad Cawul ař ass n řmewt nnes, maca Camwil icḍen x Cawul. Uca indem SIDI řami igga Cawul d ajeǧid x Israil. 
