﻿1 Ṣamwil.
3.
Camwil ameẓyan tuɣa ittsexxar i SIDI zzat i wudem n Ɛali. Deg wussan nni tuɣa awař n SIDI iqqiǧet. War tuɣi tᵉtteffiɣ ca n řewḥiy. 
Deg wass nni, umi Ɛali iṭṭeṣ deg wemcan nnes uca dewřent tiṭṭawin nnes arxunt ařami tuɣa war izemmar ad ittwařa ɛad, imsar - 
ɛad qbeř ixsi řefnar n AREBBI u Camwil tuɣa iṭṭeṣ di Zzawect n SIDI mani teǧa Ttabut n AREBBI - 
aqa SIDI iřaɣa i Camwil. Uca yarra-dd xas Camwil: “Necc aqa ayi da!” 
Netta yuzzeř ɣar Ɛali, inna: “Danita i ǧiɣ, cek třaɣid ayi-dd.” Maca netta inna: “Necc war xak dd-řaɣiɣ ca, ɛqeb, ad tezzřed!” Uca iɛqeb, izzeř. 
SIDI iřaɣa i Camwil twařa nneɣnit uca ikkar-dd Camwil, yuyur ɣar Ɛali, inna: “Necc aqa ayi da, minzi cek třaɣid ayi-dd.” Yarra-dd xas netta: “Necc war xak dd-řaɣiɣ ca, mmi, ɛqeb, ad tezzřed!” 
Camwil ɛad war issin SIDI u awař n SIDI tuɣa ɛad war d as ittwassargeb. 
Iřaɣa-dd SIDI x Camwil ɛawed i twařa wiss třata u netta ikkar-dd, yuyur ɣar Ɛali, inna: “Necc aqa ayi da, cek třaɣid ayi-dd.” Xas uca iḥekkar Ɛali, aqa SIDI tuɣa iřaɣa x uḥenjir, 
uca Ɛali inna i Camwil: “Ruḥ, ad tezzřed! Mařa Netta iřaɣa ac-dd ɛawed, xenni arr xas: ‘Siweř, SIDI, maɣar amsexxar nnec ittesřa!’” Uca iɛqeb Camwil, izzeř deg wemcan nnes. 
Xenni yusa-dd SIDI uca ibedd din uca iřaɣa am twařawin nneɣni: “Camwil, Camwil!” Inna Camwil: “Siweř, maɣar amsexxar nnec ittesřa!” 
SIDI inna i Camwil: “Xzar, Necc ad ggeɣ ca di Israil ařami marra wi xas i ɣa isřen, tnayen n imezzuɣen nnes ad ṭneṭnen. 
Deg wass nni ad qefřeɣ marra i Ɛali, zeg umezwaru ař aneggaru min zi ssiwřeɣ x taddart nnes. 
Minzi Necc ɛeřmeɣ as, aqa Necc ad ḥekmeɣ taddart nnes i řebda x řmuɛṣiyyet min xef issen, minzi řami ssiwḍen iḥenjiren nnes nneɛřet x yixef nsen, netta war ten iṭṭif ca. 
S uya Necc jjuǧeɣ i taddart n Ɛali: ‘War ittwagg weṣřaḥ i řebda i řmuɛṣiyyet n taddart n Ɛali s tɣarṣt uřa s tewhibt n řɣiǧet!’” 
Camwil iqqim izzeř ař ṣṣbeḥ, xenni yarzem tiwwura n Taddart n SIDI. Maca Camwil iggʷed ad iḥaja řewḥiy i Ɛali. 
Xenni iřaɣa Ɛali x Camwil, inna: “Camwil, mmi!” Netta yarra-dd xas: “Necc aqa ayi da!” 
Xenni inna: “Man awař i d ac inna? Ttzawgeɣ cek, war xafi snuffar! Ejj ad ac igg AREBBI ammu, ɛad mahu, mařa cek tessnuffared xafi ijj n wawař waha zi marra awařen i kidek issiweř Netta.” 
Xenni iḥaja as Camwil marra awařen u war xas ten iffar. Uca yarra-dd xas Ɛali: “Aqa-t d SIDI, ejj i-t ad igg min iǧan nican di tiṭṭawin nnes!” 
Camwil tuɣa imeqqar u SIDI tuɣa-t akides u war ijji uřa d ijjen zi marra awařen nnes ad iwḍa ɣar temmurt. 
Marra Israil, zi Dan ař Bi’r-Sebɛa, tuɣa ittwařa aqa Camwil tuɣa ittwařeqqem d anabi n SIDI. 
SIDI iqqim ad dd-iḍhar di Cilu, minzi SIDI issargeb Ixef nnes i Camwil di Cilu s wawař n SIDI. 
