﻿Řquḍat.
13.
Xenni arnin ayt n Israil maḥend ad ggen min iǧan d aɛeffan di tiṭṭawin n SIDI. Xenni inḍar i-ten SIDI deg ufus n Ifilisṭiniyyen, ijj n řmijař n arebɛin n iseggʷusa. 
Tuɣa din ijj n weryaz zi Ṣurɛa, zi řwacun n Dan. Tuɣa qqaren as Manuḥ. Tamɣart nnes tuɣa war ɣares bu tarwa u war dd-tiruw ca. 
Iban-dd lmalak n SIDI i temɣart-a uca netta inna as: “Xzar, war ɣarem bu tarwa u war dd-tirwud ca, maca ad teksid ddeyset, ad tarwed ijj n uḥenjir. 
Xenni řexxu, ḥḍa ixef nnem! War sess binu uřa d ccrab u war ttᵉtt walu zi marra min inegsen! 
Maɣar xzar, cem ad teksid s ddeyset, ad tarwed ijj n uḥenjir. War d as ittekk řmus x uzeǧif nnes, maɣar aḥenjir ad yarbu ttaj n weɛzař n AREBBI zeg uɛeddis n yemmas u netta ad ibda ḥima ad ifekk Israil zeg ufus n Ifilisṭiniyyen.” 
Tamɣart tudef u tessiweř ak-d weryaz nnes, tenna as: “Ijj n Weryaz n AREBBI yusa-dd ɣari. Aɣembub nnes igga am lmalak n AREBBI, issaggʷad aṭṭas, uca necc war t sseqsiɣ manis dd-yusa, u Netta war d ayi inni mammec d as qqaren. 
Netta inna ayi: ‘Xzar, cem ad teksid s ddeyset, ad tarwed ijj n uḥenjir. War sess binu uřa d ccrab u war ttᵉtt walu min ixemjen, minzi aḥenjir ad yarbu ttaj n weɛzař n AREBBI zeg uɛeddis n yemmas ař ass n řmewt nnes.’ 
Uca iẓẓuǧ Manuḥ ɣar SIDI, inna: “A, Sidi inu, ttzawageɣ Cek, ejj aryaz n AREBBI wenni dd tessekked, ad ɣarneɣ dd-yas twařa nneɣnit, maḥend ad aneɣ isscen min ɣa negg ak-d uḥenjir wenni dd ɣa ixeřqen.” 
Uca SIDI isřa ɣar Manuḥ u lmalak n AREBBI yusa-dd ict n twařa nneɣnit ɣar temɣart. Nettat teqqim deg iyyar uca aryaz nnes Manuḥ tuɣa war kides iǧi. 
Nettat tqeǧeq u teɛřef, tɛawed aya i weryaz nnes, tenna as: “Xzar, Aryaz nni dd ɣari yusin, iban ayi-dd ɛawed.” 
Ikkar Manuḥ, iḍfar tamɣart nnes. Umi dd-yusa ɣar Weryaz, inna as: “Ma cek d Aryaz nni issiwřen ak-d temɣart inu?” Netta yarra-dd xas: “Wah, d Necc.” 
Xenni inna Manuḥ: “Mařa ttwakemmřen xenni wawařen nnec řexxu, min i ɣa tiři řqaɛida i zi ɣa nuyur ak-d uḥenjir u min i ɣa tiři řxedmet nnes?” 
Inna lmalak n SIDI i Manuḥ: “Tamɣart ad teḥḍa ixef nnes zi marra min d as nniɣ. 
Nettat war ttᵉtt min dd-ittasen zi tzayart uca war tsess binu uřa d ccrab u war ttᵉtt walu zi marra min inegsen. Ad teḥḍa marra min d as umureɣ.” 
Xenni inna Manuḥ i lmalak n SIDI: “Ejj aneɣ ad Cek nemneɛ ɣarneɣ cwayt danita u ad ac nessewjed ijj n iɣayḍ d ameẓyan zeg iɣayḍen zzat i wudem nnec.” 
Maca lmalak n SIDI inna i Manuḥ: “Mařa texsed ad ayi tmenɛed, war ttᵉtteɣ zeg weɣrum nnec u mařa texsed ad tesswejded ict n tɣarṣt n wecmaḍ, ittxeṣṣa ad tt tqedmed i SIDI.” Minzi Manuḥ war issin, aqa-t d lmalak n SIDI. 
Uca inna Manuḥ i lmalak n SIDI: “Mammec i d ac qqaren, ḥima ad ac negg ccan, xmi ɣa ittwakemmeř wawař nnec.” 
Inna as maca lmalak n SIDI “Mayemmi d ayi tesseqsid x Yisem inu? Aqa wanita d Řeɛjeb.” 
Xenni iksi Manuḥ ijj n iɣayḍ d ameẓyan zeg iɣayḍen ak-d tewhibt n řɣiǧet uca iqeddem aya x teṣḍart i SIDI. Xas uca igga Netta ijj n řeɛjeb umi Manuḥ d temɣart nnes tuɣa xezzaren. 
Řami tuɣa aceɛɛař n uɛalṭar igeɛɛed deg ujenna, imsar aqa uřa lmalak n SIDI igeɛɛed deg uceɛɛař n uɛalṭar. Manuḥ d temɣart nnes ẓrin aya, wḍan ɣar temmurt x iɣembab nsen. 
Ssenni maca war dd-ibin lmalak n SIDI ɛad ɣar Manuḥ d temɣart nnes. Xenni issen Manuḥ, belli tuɣa d lmalak n SIDI. 
Inna Manuḥ i temɣart nnes: “S tidett neccin ad nemmet, minzi neccin neẓra AREBBI.” 
Tenna as temɣart nnes: “Mařa SIDI ixs ad aneɣ ineɣ, iři Netta war iksi zeg ufus nneɣ taɣarṣt n wecmaḍ d tewhibt n řɣiǧet u ad tiři war dd aneɣ ittejji ad nẓar ad nseř qaɛ man aya di řweqt-a.” 
Tamɣart turuw-dd ijj n uḥenjir, tegga as Camcun. Aḥenjir imɣar u SIDI ibarek i-t.    
Uca Arruḥ n SIDI ibda ad t indeh di řmargeḥ n řɛeskar n Dan jar Ṣurɛa d Icta’ul. 
