﻿Řquḍat.
9.
Abimalik, mmis n Yarubbaɛl, yuyur ɣar Cakim, ɣar aytmas n yemmas. Netta issiweř akidsen u ak-d marra řwacun n taddart n babas n yemmas, inna: 
“Siwřem maca deg imezzuɣen n marra imezdaɣ n Cakim: ‘Min iǧan mliḥ i kenniw: mařa sebɛin n yeryazen ad xawem ḥekmen, marra iḥenjiren n Yarubbaɛl, niɣ mařa mɣir ijj n weryaz waha ad xawem iḥkem? Ɛeqřem ɛawed, aqa necc d iɣussan nwem d aysum nwem.’” 
Xenni ssiwřen aytmas n yemmas marra awařen-a deg imezzuɣen n marra imezdaɣ n Cakim ařami uř nsen imeyyeř ad dd-yas ak-d Abimalik, maɣar nitni nnan: “Netta d umatneɣ.” 
Nitni wcin as sebɛin n uqiyyat n nnuqart zi zzawect n Baɛl-Barit. Zzaysent icra Abimalik iryazen ixwan d yinni iṭarrcen, uca nitni ḍeffaren t-i-dd. 
Yudef ɣar taddart n babas di Ɛafra u inɣa x ijj n weẓru aytmas, iḥenjiren n Yarubbaɛl, sebɛin n yeryazen. Mɣir Yutam, aḥenjir amaẓuẓ n Yarubbaɛl iqqim weḥḥdes, minzi netta tuɣa innuffar. 
Uca munen marra imezdaɣ n Cakim d marra inni di lqelɛa uca ffɣen, ggin Abimalik d ajeǧid ɣar tcejjart n yigg nni iǧan deg wemcan iqeddsen ɣar Cakim. 
Nitni xebbaren aya i Yutam, ikkar ibedd x tqiccat n wedrar n Jarizim. Issgeɛɛed tmijja nnes, inna asen: “Sřem ɣari, a kenniw imezdaɣ n Cakim, uca AREBBI ad ɣarwem iseř!” 
“Acḥař uya kkarent tcejjura, ffɣent ḥima ad dehnent ijj n ujeǧid x yixef nsent uca nnant i uzemmur: ‘Iři cek d ajeǧid nneɣ!’ 
Azemmur inna asen: ‘Ma ad semḥeɣ di tadunt n zzect inu nni i d ayi issemɣar AREBBI d iwdan? Ma ad ḍweɣ sennej i tcejjura nneɣni?’ 
Uca nnant tcejjura i wartu: ‘As-dd, iři cek d ajeǧid nneɣ!’ 
Urtu inna asen: ‘Ma ad semḥeɣ di taẓyudi inu d řɣiǧet iṣebḥen inu? Ma ad ḍweɣ sennej i tcejjura nneɣni?’ 
Uca nnant tcejjura i tzayart: ‘As-dd, iři cem d ajeǧid nneɣ!’ 
Maca tenna asen tzayart: ‘Ma ad semḥeɣ di binu n jdid inu nni issefraḥen AREBBI d iwdan? Ma ad ḍweɣ sennej i tcejjura nneɣni?’ 
Xenni nnan marra ticejjura i cbarq ak-d isennanen: ‘As-dd, iři cek d ajeǧid nneɣ!’ 
Uca cbarq ak-d isennanen inna i tcejjura: ‘Mařa texsent kennint s tidett ad ayi tdehnent d ajeǧid xakent, asent-dd xenni, afent adurri di tiři inu, maca mařa lla, xenni ad tekkar tmessi zi cbarq ak-d isennanen, ad tecc ticejjura n tengelt n Lubnan.’” 
Řexxu xenni, kenniw, imezdaɣ n Cakim, mařa teggim s tidett d řeṣfayet umi teggim Abimalik d ajeǧid, u mařa kenniw teggim mliḥ di Yarubbaɛl d taddart nnes, u mařa kenniw teggim dayes am mammec issdaheǧ, 
- aqa baba immneɣ di ṭṭweɛ nwem uca isebbeř tudart nnes uca ifekk kenniw zeg ufus n Midyan, 
maca kenniw tɣewwɣem ass-a x taddart n baba u x ijj n weẓru aqa tenɣim arraw nnes, sebɛin n yeryazen, u teggim Abimalik, mmis n tayya, d ajeǧid x imezdaɣ n Cakim, minzi netta d umatwem - 
mařa kenniw teggim ass-a s tidett d řeṣfayet di Yarubbaɛl d taddart nnes, xenni ad tfarḥem di Abimalik u netta ad ifarḥ daywem. 
Maca mařa war iǧi amenni, xenni ad tekkar tmessi zi Abimalik ad tecc iryazen n Cakim d imezdaɣ n lqelɛa uca ad tekkar tmessi zeg imezdaɣ n Cakim u zi marra inni di lqelɛa, ad tecc Abimalik!’” 
Xenni yuyur Yutam, yarweř, iruḥ ɣar Bi’r. Tuɣa izeddeɣ din, iggʷej x umas Abimalik. 
Řami tuɣa iḥekkem Abimalik x Israil třata n iseggʷusa, 
issekk AREBBI ijj n řaryaḥ d aɛeffan jar Abimalik d imezdaɣ n Cakim. Imezdaɣ n Cakim ɣdaren zi Abimalik, 
ḥima aɣeṣṣeb, nni ittwaggen i sebɛin n iḥenjiren n Yarubbaɛl, d idammen nsen ad dd-asen x umatsen Abimalik, wenni ten inɣin, u x imezdaɣ n Cakim, inni tuɣa issjehden ifassen nnes maḥend ad nɣen aytmas. 
Imezdaɣ n Cakim wejden as řefxux x tqiccat n idurar u nitni keccḍen marra wenni din xasen i ɣa ikken d abrid. Aya ittwanna i Abimalik. 
Jaɛal, mmis n Ɛabid, yusa-dd ak-d aytmas uca nitni uyuren ɣar Cakim u imezdaɣ n Cakim ttiqqen dayes. 
Nitni ffɣen ɣar iyyaren, řeqḍen uḍiř deg imarjaɛen nsen, ɛeffsen x uḍiř uca ɣennjen izřan n řefraḥet, udfen ɣar taddart n arebbi nsen, ccin swin uca neɛřen Abimalik. 
Uca Jaɛal, mmis n Ɛabid, inna: “Min iɛna netta Abimalik d man wen i iǧan d Cakim, aqa neccin ad as naḍar? Ma war iǧi netta d mmis n Yarubbaɛl? U ma war iǧi Zabul d lwali nnes? Sexxarem xenni i yeryazen n Ḥamur, babas n Cakim, minzi mayemmi i d as ɣa nsexxar? 
Mři maca řgens-a deg ufus inu, xenni necc tuɣa xseɣ ad aẓẓřeɣ x Abimalik.” Uca inna i Abimalik: “Arni i řɛeskar nnec uca ffeɣ ɣar umenɣi!” 
Umi Zabul, řḥakem n tendint, isřa awařen n Jaɛal, mmis n Ɛabid, yarɣa uxeyyeq nnes. 
Netta issekk ireqqasen ɣar Abimalik di tnuffra, nnan: “Xzar, Jaɛal, mmis n Ɛabid, d aytmas usin-dd ɣar Cakim, u xzar, aqa ssɣewwɣen xak tandint. 
Xenni řexxu, kkar di ǧiřet-a, cek d řgens nni ɣarek iǧan, uca egg ijj n řfex deg iyyar. 
U ɣar tuffut, ɣar wenqar n tfuct, ittxeṣṣa ad tekkared zic uca ɛref x tendint. U xzar, mařa netta d řgens i ɣares ad ɣarek dd-iffeɣ, egg xenni akides min xef izemmar ufus nnec ad igg.” 
Abimalik d marra řgens i ɣares, ikkar-dd di ǧiřet u nitni ggin ijj n řfex x Cakim s arebɛa n ibaṭayunen. 
U Jaɛal, mmis n Ɛabid, iffeɣ-dd, yuyur ɣar tewwart n tendint u Abimalik, d marra řgens i ɣares, ikkar zeg wemcan innuffaren. 
Umi Jaɛal iẓra řgens, inna i Zabul: “Xzar, aqa iwdan hekkwan-dd zi tqiccat n idurar.” Zabul inna as: “Cek twařid tiři n idurar d iwdan.” 
Jaɛal yarni issawař, inna: “Xzar, aqa ijj n ubarru n řgens ihekkwa-dd zi tɛebbuḍt n temmurt u ict n řkumpaniyyet tusa-dd zeg webrid n tcejjart n yigg n ibezgawen.” 
Xenni inna as Zabul: “Mani i ǧan řexxu wawařen nnec i zi tennid: ‘Min iɛna Abimalik, aqa neccin ad as nsexxar? Ma war ǧin ina d řgens i tesseḥqared cek? Ffeɣ xenni řexxu u temmenɣed akides!” 
Uca iffeɣ Jaɛal zzat i wudem n imezdaɣ n Cakim uca immneɣ ak-d Abimalik. 
Iḍfar i-t Abimalik, minzi netta yarweř zzat i wudem nnes uca aṭṭas n yinni ittwassnuqqben s ssif wḍan ař adaf n tewwart n tendint. 
Iqqim Abimalik di Aruma u Zabul yuẓẓeř x Jaɛal d aytmas ařami war zemmaren ad qqimen ɛad di Cakim. 
Tiwecca nnes, imsar, řgens iffeɣ ɣar iyyar. Aya ɛawden t i Abimalik. 
Xenni iksi netta řgens, ibḍa t x třata n ibaṭayunen uca igga ijj n řfex deg iyyar uca netta ixezzar, aqa řgens iffeɣ zi tendint. Xenni ikkar ḍidd nsen uca iɣřeb xasen. 
Minzi Abimalik d ibaṭayunen i ɣares, ffɣen uca uyuren ad bedden ɣar tewwart n tendint, u tnayen n ibaṭayunen nneɣnit udfen x yinni tuɣa deg iyyar uca qḍan xasen. 
Ass nni marra immneɣ Abimalik ak-d tendint. Netta iṭṭef i-tt, inɣa řgens i dayes iǧan. Xenni ihdem tandint uca issuyes xas tameǧaḥt. 
Umi t sřin marra imezdaɣ n lburj, udfen ɣar amcan n warwař n taddart n arebbi nsen Barit. 
Ittwanna i Abimalik, aqa marra imezdaɣ n lburj n Cakim ggin ad munen din. 
Xas uca igeɛɛed Abimalik adrar n Ṣalmun, netta ak-d marra řgens i ɣares iǧan, u Abimalik iṭṭef ccaqur nnes deg ufus uca iqřeɛ ict n tṣeṭṭa n tcejjart, iksi tt u issars i-tt x teɣruḍt nnes, inna i řgens nnes: “Min teẓrim ggiɣ necc, qeǧqem, ggem t uřa d kenniw am necc!” 
U marra řgens, kuř aryaz, iqřeɛ taṣeṭṭa nnes uca ḍfaren Abimalik u ssarsen tent ɣar wemcan n warwař uca qqedmen asen timessi x wemcan n warwař ařami mmuten uřa d marra iryazen n lburj n Cakim, ɛřaḥař ařef n yeryazen d temɣarin. 
Iruḥ Abimalik ɛawed ɣar Tabaṣ, iwta iqiḍan nnes ɣar Tabaṣ uca iṭṭef i-tt. 
Tuɣa di řwesṭ n tendint ijj n lburj imettnen u arewřen ɣares marra iryazen d temɣarin d marra imezdaɣ n tendint uca nitni bellɛen xasen, nyin x tzeqqa n lburj. 
Yiweḍ Abimalik ɣar lburj u immneɣ akides, maca xmi netta dd-iqarreb ɣar tewwart n lburj ḥima ad as iqqed timessi, 
tenḍar ict n temɣart ict n taṣḍart n tsirt yuɛřan x uzeǧif n Abimalik uca teřbez as aceqquf n uzeǧif. 
Deɣya iřaɣa netta i umsexxar nnes wenni d as yarebbun řesnaḥ, inna as: “Jbedd ssif nnec uca neɣ ayi, ḥima war xafi qqaren: ‘Ict temɣart tenɣa i-t’.” Uca aḥudri nnes issnuqqeb i-t uca immut. 
Umi ẓrin iryazen n Israil, aqa Abimalik immut, ffɣen-dd, kuř ijj n weryaz ɣar wemcan n tzeddiɣt nnes. 
Ammu i ixeǧeṣ AREBBI tuɛeffna n Abimalik nni igga i babas umi inɣa sebɛin n aytmas. 
Marra tuɛeffna i iggin iryazen n Cakim yarr i-tt AREBBI x uzeǧif nsen u nneɛřet n Yutam, mmis n Yarubbaɛl, tewḍa-dd xasen. 
