﻿Yacuwa.
1.
Awarni i řmewt n Musa, amsexxar n SIDI, issiweř SIDI ak-d Yacuwa, mmis n Nun, amsexxar n Musa, inna: 
“Musa, amsexxar inu immut. Řexxu kkar, ekk x L’Urdun-a, cek d marra řgens-a, ɣar temmurt i d asen ɣa wceɣ Necc, i ayt n Israil. 
Kuř amcan min xef ɣa teɛjen třeqqa n uḍar nwem, aqa wciɣ awem t i kenniw, am mammec i ssiwřeɣ Necc ak-d Musa. 
Tammurt nwem ad tiři zi řexřa ař Lubnan-a, ař iɣzar ameqqran, iɣzar n Lfuraṭ, marra tammurt n Iḥittiyyen ař Řebḥar Ameqqran ɣar řɣarb mani tɣeǧi tfuct. 
Uřa d ijj war izemmar ad iqqim ibedd zzat i wudem nnec marra ussan n tudart nnec. Am mammec d ayi tuɣa ak-d Musa, ad iřiɣ uřa akidek. Necc war dayek semmḥeɣ niɣ ad cek ttejjiɣ. 
Iři d aryaz u iři tmeḥḍed, minzi cek ad tarred řgens-a ad iṭṭef tammurt d řwart, tammurt nni x Necc jjuǧeɣ i řejdud nsen ad asen tt wceɣ. 
Iři waha d aryaz u iři tmeḥḍed, maḥend ad teḥḍid ad tegged marra Ccariɛa nni d ac yumur Musa, amsexxar inu. War xas ttḥeyyed ɣar yefus uřa ɣar uzeřmaḍ, maḥend ad tegged s řeɛqeř mani ma i ɣa traḥed. 
War ttejji ca adlis n Ccariɛa-ya ad ac ittwakkes x yiřes nnec, maca xarreṣ dayes ass d ǧiřet, maḥend ad teḥḍiḍ ad tegged ammu nican am mammec marra min dayes tura, minzi xenni i ɣa tfeřḥed deg webrid nnec uca ad tt tegged s řeɛqeř. 
Ma war d ac t nniɣ? Iři d aryaz u iři tmeḥḍed, war tteggʷed u war ttejji ad iɛgez wuř nnec, minzi SIDI, AREBBI nnec, aqa-t akidek qaɛ mani ma i ɣa traḥed.” 
Uca yumur Yacuwa i imeḥḍayen n řgens, inna: 
“Uyurem x řwesṭ n řmargeḥ n řɛeskar uca umur řgens, inim asen: ‘Swejdet řeɛweč i yixef nwem, minzi awarni i třata n wussan ad teẓwam L’Urdun-a, ḥima ad tadfem ɣar temmurt i d awem ɣa iwc SIDI, AREBBI nwem, d řwart uca ad tt teksim d řwart.’” 
Issiweř Yacuwa ak-d Irubiniyyen d Ijadiyyen u ak-d wezyen n teqbič n Manassa, inna: 
“Ɛeqřet x wawař nni x i d awem yumur Musa, amsexxar n SIDI, umi inna awem: ‘SIDI, AREBBI nwem, iwca awem arraḥet uca iwca awem tammurt-a. 
Timɣarin nwem, iḥenjiren nwem d řebhayem nwem ad qqimen di temmurt i d awem iwca Musa x ujemmaḍ n L’Urdun uca kenniw ad teẓwam tḥezzmem zzat i wudem n aytmatwem, marra ayt n bu-teɣruḍt imeḥḍen, uca kenniw ad asen tewcem afus, 
ař ɣa yewc SIDI arraḥet i aytmatwem, am tuɣa iwca i kenniw, uca uřa d nitni ad ṭṭfen tammurt i d asen iwca SIDI, AREBBI nwem, d řwart. Xenni ad iɛeddeř ad dd-tdewřem ɣar temmurt tenni d řwart nwem uca ad twartem min d awem iwca Musa, amsexxar n SIDI, x ujemmaḍ n L’Urdun manis dd-tneqqar tfuct.” 
Nitni arrin-dd x Yacuwa, nnan: “Marra min xef i d aneɣ tumured, ad t negg u mani ma i d aneɣ ɣa tessekked, ad nuyur. 
Ammu nican am mammec nesřa ɣar Musa, ad ɣarek nseř. Mɣir iři ad kik yiři SIDI, AREBBI nnec, am mammec tuɣa iǧa ak-d Musa! 
Kuř aryaz nni i ɣa iɛṣan řumur nnec u war ixs ad iseř i wawařen nnec ɣar marra min d as ɣa tumured, ad ittwaneɣ. Iři waha d aryaz u iři tmeḥḍed!” 
