﻿Aɛawed n Ccariɛa.
32.
“Sřem, a ijenwan, ad ssiwřeɣ! Ejj tammurt ad tseř i wawařen n uqemmum inu! 
Ejj taɣuri inu ad tudem am wenẓar, ad hwant tiwařin inu am nnda, am ict n thiḍurt x uɣemmuy aziza u am tnecnacin x wefsu, 
minzi necc ad barrḥeɣ Isem n SIDI, arrem-dd řemɣaret i AREBBI nneɣ! 
Netta d Taṣḍart, řxedmet nnes nican, minzi marra ibriden nnes ttwaseggden, ijj n Arebbi d amtiqqi břa řɣecc, aqa-t d amsegged, nican i yeǧa. 
Řgens aqa issefsed ixef nnes, nitni war ǧin ca d iḥenjiren nnes, maca d řefḍiḥet, aqa-t d ijj n jjiř ifarɣ, ixnunnes. 
Ma texsem ad teggem aya i SIDI, a řgens abuhaři d wefɣur! Ma war iǧi Netta d Babac nni cek isɣin, d wenni cek iggin u d wenni cek ikewwnen? 
Idarem ussan iɛdun, xemmem iseggʷusa n jjiř ař jjiř, seqsa babac u netta ad ac t iɛawed seqsa imɣaren u nitni ad ac t inin. 
Umi iwca Umɛuǧi x kuřci tasɣart nsen i marra řegnus, umi ibḍa tarwa n bnadem, issgeɛɛed iymiren n řegnus ɛlaḥsab řqedd n ayt n Israil. 
Minzi tasɣart n SIDI d řgens nnes, Yaɛqub d afiřu n řeɛbar n tesɣart nnes. 
Yufa i-t di temmurt n řexřa, di tnezruft ixřan ak-d řewḥuc ittzun, issɣuyyun. Inneḍ as-dd, isseřmed i-t, iḥḍa i-t am mummu n tiṭṭ nnes. 
Am ugider nni issfaqen řɛucc nnes, iṭṭaw sennej i warrud nnes zi ssa ɣar da, ittbezzeɛ afriwen nnes, iksi i-t uca yarebbu t x wafriwen nnes, 
ammu i indeh i-t SIDI waha uca war tuɣi din akides ca n arebbi d aɣrib. 
Issenya i-t x tɛuřař n temmurt uca icca řɣiǧet n yeyyar. Ijja i-t ad iẓemm tamment zi jjarf, d zzect zeg weẓru n teṣḍart, 
d trussi n tfunasin d uɣi n wuǧi s tadunt n izmaren d icarriyyen, inni iǧan am tarwa n Bacan, u s tadunt n iɣayḍen, s mummu n waren n irden. Ɛawed cek teswid zeg idammen n uḍiř, ak-d ukuffu nnes xas. 
Idweř Yacurun iqbubbez uca iẓẓeɛbeḍ - ‘Aqa tmesřed u teqbubbzed, wah, s tadunt tᵉttwadřed!’ - uca ismeḥ di Arebbi nni i-t dd-ixeřqen uca isseḥqar Taṣḍart n usenjem nnes. 
S irebbiten iɣriben ssekkaren nitni tusmi nnes, s jjɛayef sɛaren t. 
Nitni qeddmen tiɣarṣa i ccwaṭen, war iǧi i Arebbi, i irebbiten nni war ssinen, irebbiten n jdid, inni dd-yusin ɛad mammec, war zzaysen ttarjijen řejdud nwem. 
Taṣḍart nni i cek dd-yejjin, tsemḥed dayes u tᵉttud Arebbi nni i cek dd-yurwen s řewjeɛ. 
Iẓra SIDI man aya uca issehqar i-ten, zi ssibbet n usduqqez n iḥenjiren nnes d yessis. 
Netta inna: ‘Ad zzaysen ffareɣ udem inu, ad ẓareɣ mammec ɣa yiři zzman uneggaru nsen, minzi nitni d ijj n jjiř ittneqřab, d tarwa i di war iǧi řmanet. 
Nitni ssekkaren tusmi inu s min war iǧin d Arebbi, sɛaren ayi s l’aṣnam nsen ibeṭṭřen. Necc ad ssekkareɣ tusmi nsen s min war iǧin d řgens, s yijj n řgens d abuhaři ad ten sɛareɣ. 
Minzi s weɣḍab inu tekkar tmessi, ad tecmeḍ ař řaxart din swadday, uca ad tecc tammurt d řɣiǧet nnes, u ad tessecmeḍ tisi n idurar. 
Necc ad asen arniɣ iceřwawen, ad xasen neyyceɣ fřitcat inu. 
Ad ttwaheyyfen s řaẓ uca ad ttwaṣarḍen s ṭṭaɛun u s wareddeǧ amerzag u Necc ad daysen ssekkeɣ tiɣmas n řmař s ssem ineqqen n ifiɣran inni ittmuǧuɣen di tɛejjajt. 
Zi barra ad ikkes ssif tarrawt, u zeg wexxam n daxeř ad teřqef tiggʷudi: am ubřiɣ am teɛzarect, aseymi ak-d umeccaybu. 
Tuɣa xseɣ ad iniɣ: ‘Am usemmiḍ ad ten faretkeɣ, ad ssbeddeɣ řidaret nsen jar iwdan!’, 
mři war ǧiɣ tteggʷideɣ zeg wesɛar n řeɛdu, ḥima iɣrimen nsen war t nekkaren uca ad inin: ‘Ifassen nneɣ, inni ittwassgeɛɛden ammu s jjehd, ggin aya marra, war iǧi d SIDI.’ 
Minzi nitni d ijj n řgens břa array u war daysen řefhamet. 
Mři ggin tiɣit, xenni iggur ad fehmen aya u ad wcen taynit i uneggar nsen. 
Mammec izemmar ad iḍfar ijj n bnadem ařef n iwdan u mammec zemmaren tnayen ad arren ɛecra-ařaf ad arewřen, mařa war d asen temmenz teṣḍart nsen uca war d asen isellem SIDI i nitni? 
Minzi taṣḍart nsen war teǧi am Taṣḍart nneɣ. Ejj ad ḥekmen řɛedyan nneɣ s ixef nsen. 
Minzi tazayart nsen teǧa zi tzayart n Sadum u zeg iyyaren n Ɛamurra. Aḍiř nsen d aḍiř n ssem, ɣarsen izekkunen ccuren s tarzugi. 
Binu nsen amecnaw asuḍi n tmessi n řhaycat, amecnaw ssem ineqqen n třefsiwin. 
Ma marra aya war ɣari ittwaxzen, ittwacemmeɛ deg ixxamen n txubay inu? 
D Necc i yeǧan x nneqmet d řexřaṣ, xmi ɣa iḥřuǧeḍ uḍar nsen. Ass n uḍeyyeɛ nsen aqa yudes, uca min xasen i ɣa yiři, ad imsar deɣya. 
Minzi SIDI ad igg s řḥeqq di ṭṭweɛ n řgens nnes, Netta ad iḥenn x imsexxaren nnes xmi ɣa iẓar belli jjehd immeksi, uca war din iqqim ɛad wenni ittwaṭṭfen d wenni ijjin.    
Xenni ad yini: ‘Mani ǧan irebbiten nsen, mani taṣḍart i ɣares ufin adurri? 
Mani ǧan irebbiten nni zi ccin tadunt n tɣarṣa nsen, inni zi sessen binu n tewhibin n useyyeb nsen? Ejj i-ten ad kkaren, ad cek ɛawnen u ejj i-t ad xawem issduri.’ 
Xzarem řexxu, aqa d Necc, wah d Necc, u war din ca uřa d ijj n arebbi akidi. Necc neqqeɣ u Necc sseddareɣ, Necc řebbzeɣ u ssgenfiɣ u war din wi ɣa ifekken zeg ufus inu. 
Minzi Necc ad sswiẓẓḍeɣ afus inu ɣar ujenna, ad iniɣ: ‘Necc aqa ddareɣ i řebda!’ 
Mařa ssqeḍɛeɣ ssif inu ittwessgen uca afus inu ad iṭṭef di řḥukm, xenni Necc ad ntaqmeɣ zi iɣrimen inu u zeg inni d ayi icarrhen. 
Ad ssᵉscareɣ fřitcat n řqews inu s idammen, uca ssif inu ad isarḍ aysum, idammen n wenni ittwanɣen u n wenni ittwaḥebbsen azeǧif n řeɛdu ak-d ijeṭṭayen n ucuwwaf nnes. 
Sřiwřewem, a řegnus!, ak-d řgens nnes, minzi Netta ad intaqem i idammen n imsexxaren nnes, ad yarra nneqmet x iɣrimen nnes, uca ad igg weṣřaḥ i temmurt nnes d řgens nnes.”    
Yusa-dd Musa uca issiweř marra awařen n tizřit-a x imezzuɣen n řgens, netta jmiɛ ak-d Huciɛa, mmis n Nun. 
Umi ikemmeř Musa marra awařen-a i zi issiweř ɣar marra Israil, 
inna asen: “Arrem marra awařen-a nni x d awem nniɣ ass-a ɣar wuř nwem, ḥima ad ten tumurem i iḥenjiren nwem maḥend ad ḥḍan marra awařen n Ccariɛa-ya ad zzaysen ggen, 
minzi war iǧi d awař n baṭeř i kenniw, maca d tudart nwem. S wawař-a ad tezzuggartem ussan nwem x temmurt i ɣar ɣa teẓwim x L’Urdun, maḥend ad tt tᵉṭṭfem d řwart.” 
Issiweř SIDI ak-d Musa deg wass nni, inna: 
“Geɛɛed adrar n Abarim, aqa-t d adrar n Nabu nni iǧan di temmurt n Mu’ab arendad n Ariḥa, uca xzar tammurt n Kenɛan nni i ɣa wceɣ d řwart i ayt n Israil, 
uca mmet x wedrar nni ɣar ɣa tgeɛɛded. Ad tdewřed ad tᵉmmarnid ɣar řgens nnec, am mammec immut umac Harun x wedrar n Hur uca immarni ɣar řgens nnes, 
minzi kenniw teɣdařem zzayi di řwesṭ n ayt n Israil ɣar waman n Mariba-Qadac di řexřa n Ṣin, minzi kenniw war d ayi tessqeddsem di řwesṭ n ayt n Israil. 
Xenni řexxu ad ṭẓared tammurt zzatek, maca war ttidfed ca ɣar temmurt nni i ɣa wceɣ i ayt n Israil.” 
