﻿Aɛawed n Ccariɛa.
29.
Iřaɣa-dd Musa x marra Israil, inna asen: “Kenniw aqa teẓrim marra min igga SIDI di temmurt n Miṣra zzat i tiṭṭawin nwem di firɛun d marra imsexxaren nnes d marra tammurt nnes, 
tiqeǧuba timeqqranin, tinni teẓrim s tiṭṭawin nwem, řeɛřamat d lmuɛjizat nni imɣaren. 
Ař ass-a SIDI war d awem iwci uř ḥima ad tfehmem uřa d tiṭṭawin ḥima ad tẓarem uřa d imezzuɣen ḥima ad tesřem. 
Ssnedheɣ kenniw arebɛin n iseggʷusa di řexřa. Arruḍ nwem war idwiř d řbaři u tisiřa nwem war dduysarent x iḍaren nwem. 
War teccim aɣrum, war teswim binu uřa d ccrab, ḥima ad tessnem belli Necc d SIDI, AREBBI nwem.” 
“Řami treḥḥgem ɣar wemcan-a, iffeɣ-dd Siḥun, ajeǧid n Ḥacbun, ak-d Ɛuj, ajeǧid n Bacan, ḥima ad kidneɣ imsagar i umenɣi uca neɣřeb i-ten 
uca neṭṭef tammurt nsen uca newc i-tt d řwart i Irubiniyyen d Ijadiyyen u i wezyen n teqbič n Manassa. 
Ḥḍam awařen n Řɛahd-a, teggem ten, ḥima ad tawḍem s řeɛqeř ɣar marra min ɣa teggem. 
Ass-a marra kenniw tbeddem zzat i wudem n SIDI, AREBBI nwem - izeǧifen n tqebbař nwem d imɣaren nwem d imeḥḍayen nwem, marra iryazen n Israil, 
imeẓyanen nwem, d temɣarin nwem, ibarraniyyen nni izeddɣen di řwest n řmargeḥ n řɛeskar nwem, zeg wenni ittqessen akeccuḍ ař wenni dd-ittaymen aman - 
ḥima ad yadef kuř ijj zzaywem ɣar Řɛahd n SIDI, AREBBI nnec nni i ɣa iqqen SIDI, AREBBI nnec ass-a akidek, u ɣar nneɛřet i iǧan d uɣezdis nnes nneɣni, 
ḥima ad ac yegg ass-a ad tekkared am řgens nnes uca Netta ad ac yiři d AREBBI, am d ac inna u am ijjuǧ i řejdud nnec Ibrahim d Isḥaq d Yaɛqub. 
War iǧi akidwem waha i ɣa ggeɣ Řɛahd-a d nneɛřet-a i iǧan d uɣezdis nnes nneɣni, 
ak-d yinni da ɣarneɣ iḥḍaren ass-a zzat i wudem n SIDI, AREBBI nneɣ, maca ɛawed ak-d yinni war da ɣarneɣ iǧin ass-a. 
Minzi kenniw tessnem mammec tuɣa nzeddeɣ di temmurt n Miṣra, u mammec neẓwa di řwesṭ n temmura n řegnus nni x dd-tekkem uřa d kenniw, 
uca teẓrim nnɛawat nsen n l’aṣnam d imeyḍa n l’aṣnam nsen nni ɣarsen n weẓru d ukeccuḍ d nnuqart d wureɣ.” 
“War ittiři jar awem aryaz niɣ tamɣart niɣ řaǧ niɣ taqbič ad issiggʷej ass-a uř nnes x SIDI, AREBBI nwem, ḥima ad isexxar i irebbiten n řegnus nni u war ittiři jar awem aẓwar nni i ɣa ittarwen arrhaj niɣ cciḥ, 
uca ad imsar, umi ɣa iseř awařen n nneɛřet-a, aqa netta ad iseggem ixef nnes deg wuř nnes, ad yini: ‘Ad ɣari yiři řehna, waxxa ggureɣ di řeqsaḥet n wuř inu, ař ɣa ihellek min issun ak-d min iffuden.’ 
SIDI war d as isemmeḥ, maca aɣḍab n SIDI d tusmi nnes iqeddsen ad dduxxnen deg weryaz nni, u marra nneɛřet nni yurin deg wedlis-a ittwannḍen ad xas tiři uca SIDI ad imḥa isem nnes zi sadu ujenna. 
SIDI ad t iḥuz x marra tiqebbař n Israil i řɣar, ɛlaḥsab marra nnɛaři n Řɛahd nni yurin deg wedlis-a ittwanḍen n Ccariɛa-ya. 
Xenni jjiř i dd ɣa yasen, iḥenjiren nwem, inni ɣa igeɛɛden awarni awem, uřa d ubarrani nni i dd ɣa yasen zeg ict n temmurt tiggʷej, marra nitni ad inin ammu xmi ɣa ẓaren jjrayeḥ n temmurt-a d řehřacat i zi issehřec SIDI tammurt: 
‘Řecbariyyet d tmeǧaḥt, aqa tecmeḍ marra tammurt, war tᵉttwaẓẓu niɣ tessɣemmi ɛad u war issgeɛɛid afsu aziza, am mammec imsar deg uneqřeb n Sadum d Ɛamurra d Adma d Ṣabuyim nni issneqřeb SIDI deg weɣḍab nnes d wesɛar nnes!’, 
uca ɛawed marra řegnus ad inin: ‘Mayemmi igga SIDI man aya i temmurt-a? Mana řḥaduq n weɣḍab-a imɣaren?’ 
Xenni ad dd-arren: ‘Minzi nitni jjin Řɛahd n SIDI, AREBBI n řejdud nsen, Řɛahd nni iqqen Netta akidsen umi ten dd-issuffeɣ zi temmurt n Miṣra. 
Uyuren ɛebden i irebbiten nneɣni uca bendqen asen, i irebbiten nni war ssinen nitni, war d asen tent-i-dd-iwci Netta. 
Aɣḍab n SIDI yarɣa x temmurt-a maḥend ad ɣares indeh marra nneɛřet nni yurin deg wedlis-a ittwannḍen. 
SIDI iqřeɛ i-ten zi temmurt deg weɣḍab d wesɛar d uduqqez n weɣḍab imɣar uca inḍar i-ten ɣar temmurt nneɣni, am teǧa ass-a.’ 
Timesřayin innufaren aqa tent i SIDI, AREBBI nneɣ, maca timesřayin ttwassaregbent aqa tent i neccin u i iḥenjiren nneɣ i řebda, maḥend ad negg marra awařen n Ccariɛa-ya.” 
