﻿Aɛawed n Ccariɛa.
21.
“Mařa ittwaf ḥed ittwaneɣ di temmurt nni d ac ɣa iwc SIDI, AREBBI nnec, maḥend ad tt tᵉṭṭfed d řwart, izzeř deg iyyar uca war issin ḥed wi t inɣin, 
xenni imɣaren nnec d řquḍat nnec ad dd-ffɣen uca ad ksin řeɛbar ař tineddam i d as dd-innḍen i wenni ittwanɣen. 
Zi tendint nni yudsen i wenni ittwanɣen, ad zzayes ksin yemɣaren ict n tɛejmit n tfunasin nni ɛemmarṣ war zzayes crizen ca u tenni war ijbiden ɛad azayřu. 
Uca imɣaren n tendint nni ad ssehwan taɛejmit nni ɣar ict n teɣzurt ittazřen řebda s waman, ɛemmarṣ war tᵉttwacarz u war tᵉttwaẓẓu uca ad arẓen iri n tɛejmit din di teɣzurt. 
Xenni ad dd-qarrben ikehhanen, ayt n Lawi, minzi SIDI, AREBBI nnec, ixḍar i-ten maḥend ad xas sexxaren u maḥend ad barken s Yisem n SIDI, u ɛlaḥsab awař nsen ad ittwaḥkem kuř amcubbec d kuř řexcunet. 
Uca marra imɣaren n tendint nni yudsen x wenni ittwanɣen, ad ssirden ifassen nsen sennej i tɛejmit nni umi ittwarẓ yiri di teɣzurt. 
Ad barrḥen, ad inin: ‘Ifassen nneɣ war ssizzřen ca idammen-a u tiṭṭawin nneɣ war t ẓrin. 
Egg aṣřaḥ i řgens nnec Israil nni tefdid, a SIDI, uca war ssrusa idammen imezdagen di řwesṭ n řgens nnec Israil!’ Xenni idammen ittwassizřen nni ad ttwaḥesben d řefdiyyet i nitni. 
Ammu i ɣa tekksed idammen imezdagen zi řwesṭ nnec, minzi ittxeṣṣa ad tegged min iǧan nican di tiṭṭawin n SIDI.” 
“Xmi ɣa teffɣed ɣar umenɣi ak-d řɛedyan nnec uca SIDI, AREBBI nnec, igga ac ten deg ifassen nnec uca tiyed ten d imeḥbas, 
uca teẓrid jar imeḥbas ict n temɣart, tecna deg waddud, uca temmeẓred ad tt teksid d tamɣart i yixef nnec, 
xenni ad tt tessidfed ɣar taddart nnec uca ad tḥeff azeǧif nnes, ad tqessed iccaren nnes. 
Ad tekkes arruḍ n tmeḥbast nnes uca ad teqqim di taddart nnec uca ad tesɣuy i babas d yemmas ijj n uyur ikmeř u awarni man aya tzemmared ad xas tadfed uca ad tiřid d aryaz nnes u nettat ad tiři d tamɣart nnec. 
Uca mařa war d ac teɛjib, ad tt tejjed ad tuyur ɣar řxaḍar nnes, war tt znuzi s nnuqart. War zzayes tegged axmi sseřɛet i teǧa, minzi aqa tesseḥqared tt.” 
“Mařa aryaz ɣares tnayen n temɣarin, icten ittexs i-tt, tenneɣnit icarreh i-tt, uca tenni icarreh d tenni ittexs urwent as-dd iḥenjiren, maca amenzu tuɣa-t n tenni icarreh, 
xenni deg wass nni i di ɣa ibḍa řwart n min ɣares iǧan i iḥenjiren nnes, war izemmar ad iwc tasɣart n umenzu i mmis n tenni ittexs deg wemcan i ɣa iwc i mmis n tenni icarreh, wenni d amenzu i yeǧa. 
Ittxeṣṣa ad inɛem s mmis amenzu n tenni icarreh umi d as ɣa iwc tnayen n tseqqar zi marra min d as dd-ikkaren, minzi netta d amezwar n teryast nnes u tasɣart n tmenzut nnes i teǧa.” 
“Mařa ijj n weryaz ɣares mmis d aɣennan d amɣewweɣ nni war ittesřin i wawař n babas niɣ i wawař n yemmas, uca nitni wtint t, maca netta war d asen ittesři, 
xenni babas d yemmas ad t ksin uca ad t awyen barra zzat i imɣaren n tendint nnes, ɣar tewwart n wemcan mani izeddeɣ. 
Ad inin i imɣaren n tendint: ‘Wa d mmitneɣ d aɣennan d amɣewweɣ, war ittesři i wawař nneɣ, aqa afus nnes innuqqeb u netta d ameskar.’ 
Xenni marra iryazen n tendint ad t arejmen ař ɣa immet. Ittxeṣṣa ad tekksed aɛeffan zi řwesṭ nwem ḥima marra Israil ad tseř uca ad teggʷed.” 
“Mařa ijj n weryaz igga ijj n ddenb i x iǧa řḥukm n řmewt uca ittwaneɣ, tuyřed i-t x ict n teḥnact n ukeccuḍ, 
xenni war ttejjim řxecbet nnes ad tessens x teḥnact, maca ad t tneḍřed deg wass nni, minzi wenni ittwayřen aqa-t d amenɛuř zi AREBBI. War sxemmaj tammurt nnec, tenni d ac ɣa iwc SIDI, AREBBI nnec, d řwart.” 
