﻿Aɛawed n Ccariɛa.
19.
“Xmi SIDI, AREBBI nnec, ɣa iteḥḥa řegnus i zzaysen d ac ɣa iwc, SIDI, AREBBI nnec, tammurt uca xenni ad teksid řwart nsen uca ad tzedɣed di tneddam nsen u di tudrin nsen, 
xenni ittxeṣṣa cek ad tḥuzed i yixef nnec třata n tneddam di řwesṭ n temmurt i d ac ɣa iwc SIDI, AREBBI nnec, maḥend ad tt teksid d řwart. 
Ad tɛedřed ijj n webrid uca tammurt, tenni d ac ɣa iwc SIDI, AREBBI nnec, d řwart, ad tt tebḍid x třata n tseqqar. Man aya ḥima kuř aqettař izemmar ad din yarweř. 
D wa d amtawi i zi iɛeddeř i uqettař maḥend ad din yarweř, ḥima ad iqqim iddar: mařa inɣa jjar nnes břa ma ad as igg řeḥsab, u tuɣa war t icarreh ca iḍennaḍ d fariḍennaḍ.” 
“Wenni iruḥen ak-d jjar nnes ɣar wezɣar ḥima ad iqess ticejjura uca isswiẓẓeḍ afus nnes s ccaqur ḥima ad iḥarwec tacejjart uca xenni iffeɣ as wuzzař n ccaqur uca iřqef jjar nnes uca wanita immut, aqa wanita izemmar ad yarweř ɣar icten zi n tneddam-a maḥend ad iqqim iddar. 
Ammu war izemmar uneqqam n idammen, xmi ɣa iɣeřɣeř wuř nnes, ad iḍfar aqettař uca ad xas iḥart, mařa abrid d azirar uca ad t ineɣ am war xas iǧi řeḥkam s řmewt, minzi tuɣa war t icarreh, war iǧi iḍennaḍ uřa d fariḍennaḍ. 
X uya necc umureɣ cek, qqareɣ: ‘Ḥuz třata n tneddam i yixef nnec.’ 
Uca mařa SIDI, AREBBI nnec ad iwesseɛ tammurt nnec, am mammec ijjuǧ i řejdud nnec, u ad ac iwc marra tammurt i x inna ad tt iwc i ibabaten nnec, 
- mařa ad teḥḍid marra tawṣeyyet-a maḥend ad tt tegged am mammec d ac umureɣ ass-a ḥima ad texsed SIDI, AREBBI nnec, uca ad tuyured deg ibriden nnes i řebda - xenni ad tarnid ɛad třata n tneddam ɣar třata-ya, 
ḥima war ttwassizřen idammen imezdagen di řwesṭ n temmurt nnec, tenni i d ac ɣa iwc SIDI, AREBBI, d řwart uca ad xak yiři ddenb. 
Maca mařa ca n weryaz icarh jjar nnes uca iqabeř i-t uca ikkar ɣares u xenni igga as ict n tecti uca immut, xenni yarweř ɣar icten zi tneddam nni, 
xenni ad ssekken imɣaren n tendint nnes, ad t ksin t zeg wemcan nni, ad t ggen deg ifassen n uneqqam n idammen uca ad immet. 
War d ac izziǧiz, maca ad temḥid zi Israil idammen n wenni war iggin ddenb ḥima ad tiřid mliḥ.” 
“War smuṭṭiy aymir n jjar nnec, wenni neyycen řejyuř n qbeř di tesɣart nnec, tenni i ɣa twarted di temmurt i d ac ɣa iwc SIDI, AREBBI nnec, ḥima ad tt tᵉṭṭfed. 
Ijj n ucehhad waha war izemmar ad ikkar d acehhad x ca n weryaz di ssibbet n ca n řmuɛṣiyyet niɣ di ca n ddenb nni izemmar ad ittwagg. X wawař zeg uqemmum n tnayen niɣ x wawař zeg uqemmum n ṭrata n řechud ad tᵉttwaḍmen tmesřact. 
Xmi ɣa ikkar ijj n ucehhad aqṭaṭɛiy x ca n weryaz ḥima ad zzayes icetca x ca n ddenb, 
xenni ad bedden tnayen n yeryazen, inni ittemmcubbucen zzat i wudem n SIDI, zzat i wudem n ikehhanen d řquḍat nni i din ɣa yiřin deg wussan nni. 
Uca řquḍat ad arzun mlih di tmesřact, u aqa, mařa acehhad d ijj n ucehhad issxarriqen, ad iched s řbaṭeř x umas, 
xenni ad zzayes teggem am mammec tuɣa ittxarreṣ ad igg netta ak-d umas. Ammu i ɣa tekksed řɣar zi řwesṭ nnec, 
ḥima inni iqqimen ad sřen, ad ggʷeden, war ddikkʷiren ad ggen řḥajjet taɛeffant di řwesṭ nnec. 
War d ac izziǧiz: řeɛmar s řeɛmar, tiṭṭ s tiṭṭ, tiɣmest s teɣmest, afus s ufus, aḍar s uḍar.” 
