﻿Aɛawed n Ccariɛa.
16.
“Ḥḍa ayur n Abib, ad tesswejded Taɣarṣt n Useɛdu i SIDI, AREBBI nnec, minzi deg uyur n Abib issuffeɣ i cek-dd SIDI, AREBBI nnec, zi temmurt n Miṣra s ǧiřet. 
Ad tɣarṣed i Taɣarṣt n Useɛdu i SIDI, AREBBI nnec, uǧi d ifunasen d tfunasin deg wemcan nni i ɣa yixḍar SIDI, maḥend ad din issezdeɣ Isem nnes. 
War kis ttᵉtt ca s wentun. Sebɛa n wussan ad kis tecced aɣrum břa antun, aɣrum n tamara, minzi deɣya teffɣed zi temmurt n Miṣra, ḥima ad tɛeqřed x wass i dd-tteffɣed zi Miṣra marra ussan n tudart nnec. 
War kik ittemẓar wentun di marra jjihet nnec sebɛa n wussan uca zeg weysum nni i tɣarṣed ɣar uɛecci n wass amezwaru, war ittnusi ca ař tiwecca nnes. 
War iḥeǧeř ad tɣarṣed i Tɣarṣṭ n Useɛdu ɣar daxeř i yict n tewwura n tneddam i d ac ɣa yewc SIDI, AREBBI nnec, 
maca deg wemcan nni i ɣa yixḍar SIDI, AREBBI nnec, ḥima ad din issizdeɣ Isem nnes, din i ittxeṣṣa ad tɣarṣed i Tɣarṣt n Useɛdu ɣar uɛecci xmi ɣa teɣři tfuct di tsaɛɛet nni di teffɣed zi Miṣra. 
Uca ad tt tessengʷed ad tt tecced deg wemcan nni i ɣa yixḍar SIDI, AREBBI nnec. Ɣar ṣṣbeḥ awarni as ad tɛeqbed uca ad traḥed ɣar iqiḍan nnec. 
Setta n wussan ad tecced aɣrum břa antun uca deg wass wiss sebɛa ad yiři ijj n umuni ifarzen i SIDI, AREBBI nnec. Xenni war iḥeǧeř ad tegged uřa d ict n řxedmet i ittxeṣṣa ad tᵉttwagg.” 
“Ad tḥesbed sebɛa n ssimanat i yixef nnec. Zeg wami i ɣa tebdid ad tegged amjar deg imendi ibedden, ad tebdid ad tḥesbed sebɛa n simanat. 
Xas uca ad tegged Řɛid n Ssimanat i SIDI, AREBBI nnec. Ad tewced ict n ṣṣedqet s řxaḍar zeg ufus nnec am mammec cek ibarek SIDI, AREBBI nnec. 
Ad tfarḥed zzat i wudem n SIDI, AREBBI nnec, cek, mmic, yeǧic, ismeɣ nnec, tayya nnec, Alawi nni ittɣiman daxeř i tewwura nnec, abarrani, ayujiř d tajjač nni iǧan di řwesṭ nnec, deg wemcan nni i ɣa yixḍar SIDI, AREBBI nnec, ḥima ad din issezdeɣ Isem nnes. 
Ad tɛeqřed belli tuɣa cek d ismeɣ di Miṣra uca ittxeṣṣa ad teḥḍid tiweṣṣa-ya u ad ten tegged.” 
“Ad tɛeyyded Řɛid n Iɛuccuten sebɛa n wussan, xmi tkemmřed asmuni n ṣṣabet n unedrar nnec d uẓemmi n tsirt nnec n uḍiř. 
Uca ad tfarḥed di Řɛid nnec, cek, mmic, yeǧic, ismeɣ nnec, tayya nnec, Alawi, abarrani, ayujiř d tajjač nni ittɣiman daxeř i tewwura nnec. 
Sebɛa n wussan ad tɛeyyded i SIDI, AREBBI nnec, deg wemcan nni i ɣa yixḍar SIDI, minzi SIDI, AREBBI nnec, ad cek ibarek di marra řɣiǧet nnec u di marra řxedmet n ifassen nnec uca ad tfarḥed s tidett!” 
“Třata n twařawin deg useggʷas ad dd-banen marra iwetman nnec zzat i wudem n SIDI, AREBBI nnec, deg wemcan nni i ɣa yixḍar Netta: di Řɛid n Weɣrum břa Antun, di Řɛid n Ssimanat, di Řɛid n Iɛuccuten. War dd-ittbin uřa d ijj s ifassen xwan zzat i wudem n SIDI. 
Kuř aryaz ad iwc am mammec d as immewcen deg ufus nnes, anect n lbaraka i d ac iwca SIDI, AREBBI nnec. 
Ad tfarned řquḍat d imeḥḍayen ɣar daxeř i tewwura nni d ac ɣa iwc SIDI, AREBBI nnec, jar marra tiqebbař nnec. Nitni ad ḥekmen jar řgens s ict n řeḥkamet iseggden. 
War tteffeɣ ca x webrid n tidett, war ttegg s wudmawen xmi ɣa tḥekmed. War ttᵉṭṭef ca arrecwet, minzi arrecwet tessdarɣař tiṭṭawin n yinni iḥekkmen u tessfarraɣ awařen n yinni iqqaren tidett. 
Tasegda uca ɛawed tasegda ad teḍfared, ḥima ad teddared uca ad twarted tammurt nni i d ac ɣa iwc SIDI, AREBBI nnec. 
War ttegg ca tarebbit n cwarti zi ca n tcejjart zzat i uɛalṭar n SIDI, AREBBI nnec, wenni ɣa tegged. 
War ssgeɛɛad ameyḍa iqeddsen i yixef nnec, minzi d man aya icarreh SIDI, AREBBI nnec.” 
