﻿Aɛawed n Ccariɛa.
15.
“Ɣar uneggar n sebɛa n iseggʷusa ad yiři ijj n wesmaḥ n imerwusa. 
Ta d tamesřact n ufekki zeg imerwusa: kuř bab n umarwas, wenni yareḍřen zeg ufus nnes i jjar nnes, ad as isemḥ i umarwas. War ittettar ca amarwas zeg jjar nnes uřa zeg umas, minzi ittwabarreḥ s ufekki n imerwusa i SIDI. 
Iɛeddeř ad třaɣid abarrani x umarwas, maca min iǧan nnec ɣar umac, d man aya ad dayes ismeḥ ufus nnec. 
Aqa war ittxeṣṣi ca ad ɣarek yiři uřa d ijj n umezřuḍ, minzi SIDI ad cek ibarek aṭṭas di temmurt nni i d ac ɣa iwc, SIDI, AREBBI nnec, d tasɣart i ɣa twarted, 
mařa xenni tesřid s teynit ɣar tmijja n SIDI, AREBBI nnec, ḥima ad teḥḍid uca ad tegged marra tiweṣṣa-ya, tinni x d ac weṣṣiɣ ass-a. 
Minzi SIDI, AREBBI nnec, ad ac ibarek am mammec tuɣa d ac inna, uca aṭṭas n řegnus ad xak arḍřen s weḍman, maca cek war tareṭṭřed walu s weḍman x uřa d yijjen zzaysen. Cek ad tḥekmed x waṭṭas n řegnus, maca nitni war xak ḥekkmen ca.” 
“Xmi din ɣarek ɣa yiři ijj n umezřuḍ, ijj zeg aytmac, ɣar daxeř i yict zi tewwura n temmurt nnec nni i d ac ɣa yewc SIDI, AREBBI nnec, xenni war sseqsaḥ ca uř nnec u war ttzeyyar ca afus nnec x umac nni izeřḍen, 
maca ad as tarzmed afus nnec s wecrim u ad as tareḍřed s weḍman, ɛlaḥsab min iḥwaj deg uzeyyar nnes. 
Ḥḍa, war ittiři deg wuř nnec uřa d ijj n uxarriṣ baṭeř, teqqared deg yixef nnec: ‘Aqa yudes-dd useggʷas wiss sebɛa, aseggʷas n ufekki n imerwusa!’, uca xenni ad texzared s tiṭṭawin ixeyyqen x umac nni i di iǧa zzeřḍ uca war d as tᵉtticed walu u netta ad zzayek icetca ɣar SIDI uca ad xak yiři ddenb. 
Ittxeṣṣa ad as tewced deɣya, war ittiři uxeyyeq deg wuř nnec xmi i d as ɣa tewced, minzi x uya ad ac ibarek SIDI, AREBBI nnec, di marra řxedmet nnec u di marra mani ɣa yaweḍ ufus nnec. 
Minzi ameẓřuḍ war ittwameḥḥi zi temmurt. X uya necc umureɣ cek, qqareɣ: Arzem afus nnec ař ṭṭarf i umac, i wenni ittwaḥṣaren u i umezřuḍ nni iǧan di temmurt nnec.” 
“Mařa umac, ijj n Uɛibrani niɣ ict n Tɛibranect, ittwazzenz ɣarek, xenni ad ac ixdem setta n iseggʷusa, maca deg useggʷas wiss sebɛa ad as tsarrḥed ad as tarxud zi ɣarek s třelli. 
Xmi i d as ɣa tsarrḥed, xenni war t ttejji ad iraḥ s ifassen xwan. 
Axmi d as ɣa tegged tiseddect ammu i d as ɣa tegged ict n tewhibt zeg wuǧi u zeg unedrar u zi tsirt n uḍiř. S min d ac ibarek SIDI, AREBBI nnec, ad as tewced i netta. 
Ad tidared belli tuɣa cek d ismeɣ di temmurt n Miṣra uca SIDI, AREBBI nnec, aqa ifdi xak. X uya, necc umureɣ cek tiweṣṣa-ya ass-a.    
Mařa netta inna ac: ‘War xak ttaggʷjeɣ!’, minzi ittexs i cek d řaǧ n taddart nnec, minzi aqa netta mliḥ ɣarek, 
xenni ad teksid ijj n usiyni uca ad tessnuqqeb amezzuɣ nnes uřa d tewwart uca ammu i ɣa yiři d ismeɣ nnec i řebda u ammu i ɣa tegged ɛawed s tayya nnec. 
War dd-ittbin iqseḥ di tiṭṭawin nnec, xmi t ɣa tessekked di třelli, minzi tuɣa isexxar i cek setta n iseggʷusa, yarebbeḥ i cek řexřaṣ n ijj n ucewwař tnayen n tseqqar. Ammu i cek ɣa ibarek SIDI, AREBBI nnec, di marra min ɣa tegged.” 
“Ad tessqeddsed i SIDI, AREBBI nnec, marra imenza iwetman nni dd-ittwaxeřqen jar ifunasen d tfunasin nnec d wuǧi nnec. War iɛeddeř ad tessxedmed amenzu n ifunasen nnec uca amenzu n wuǧi nnec war t tteǧas. 
Aseggʷas awarni i useggʷas ad ten tecced, cek d řaǧ n taddart nnec, zzat i wudem n SIDI, AREBBI nnec, deg wemcan i ɣa yixḍar SIDI. 
Maca mařa tuɣa dayes řɛib, tuɣa-t d aqidar niɣ d adarɣař niɣ min ma řɛib aɛeffan i ɣares iǧan, war d as ɣarreṣ ca i SIDI, AREBBI nnec. 
Daxeř i tewwura nnec ad zzayes tecced, am umexmuj am umezdag, am mammec i ɣa tecced zeg iɣayḍ n wezɣar u zeg udad. 
Mɣir idammen nnes, war ten ttᵉtt ca, ad ten tfarrɣed x temmurt am waman.” 
