﻿Aɛawed n Ccariɛa.
10.
“Di řweqt nni d ijjen inna ayi SIDI: ‘Nqec tnayen n teřwiḥin n weẓru am tinni timezwura uca geɛɛed-dd ɣari ɣar wedrar uca egg i cek ict n Ttabut n ukeccuḍ. 
Ad ariɣ di teřwiḥin awařen nni tuɣa di teřwiḥin timezwura nni tarẓid uca ad tent tessarsed di Ttabut. 
Necc ggiɣ ict n Ttabut n ukeccuḍ n ukasiya uca neqceɣ tnayen n teřwiḥin n weẓru am tmezwura. Geɛɛdeɣ ɣar wedrar s tnayen n teřwiḥin deg ufus inu. 
Yura x teřwiḥin, anect n tira tamezwarut, ɛecra n wawařen nni tuɣa issiweř SIDI deg wass n wegraw n řgens x wedrar zi řwesṭ n tmessi uca iwca i-tent ayi-dd SIDI. 
Dewřeɣ-dd u hwiɣ-dd zeg wedrar uca ssarseɣ tiřwiḥin di Ttabut nni ggiɣ uca diha i ǧant ɛad, am mammec d ayi yumur SIDI.” 
Fesyen ayt n Israil iqiḍan nsen zi Biɛrut-Bani-Yaɛqan, ffɣen ɣar Musira. Dinni immut Harun uca ittwanḍeř din. Mmis Aliɛazar idweř d akehhan deg wemcan nnes. 
Ssenni mmuṭṭiyen ɣar Judjud u zi Judjud ɣar Yuṭbata, tammurt n tɣezratin n waman. 
Di řweqt nni d ijjen iḥuzz SIDI taqbič n Lawi ḥima ad arbun Ttabut n Řɛahd n SIDI maḥend ad bedden zzat i wudem n SIDI, ad as sexxaren u ad barken deg Yisem nnes, ař ass-a. 
X uya Lawi war ɣares tuɣi ca n tesɣart, uřa d ca n řwart ak-d aytmas. SIDI d řwart nnes, am mammec d as inna SIDI, AREBBI nnec. 
“Uca necc qqimeɣ x wedrar, am wussan imezwura, arebɛin n ussan d arebɛin n ǧyaři uca isřa ayi SIDI ɛawed twařa-ya, aqa SIDI tuɣa war ixs ad kenniw issexsar. 
Inna ayi SIDI: ‘Kkar, uyur deg webrid zzat i wudem n řgens, ḥima ad adfen ɣar temmurt, tenni jjuǧeɣ i řejdud nsen ad asen tt-i-dd-wceɣ, ad tt ksin d řwart.’ 
Řexxu xenni, a Israil! Min zzayek ittar SIDI, AREBBI nnec, mɣir ad teggʷeded SIDI, AREBBI nnec, ad tuyured deg ibriden nnes u ad t texsed uca ad tsexxared i SIDI, AREBBI nnec s marra uř nnec u s marra řeɛmar nnec, 
uca ad teḥḍid řumurat n SIDI d tweṣṣa nni necc xak carḍeɣ ass-a i tizi nnec. 
Xzar, ajenna d ujenna n ijenwan d marra min dayes i SIDI, AREBBI nnec i iǧan. 
Mɣir ɣar řejdud nnec waha i iqqen SIDI Ixef nnes ḥima ad ten ixs u Netta ixḍar zzariɛet nsen awarni asen, aqa d kenniw, zi marra řegnus, am teǧa ass-a. 
Xetnem xenni i řeɛdařyet n wuř nwem, war sqessiḥem ca ɛad ktar uřawen nwem, 
minzi SIDI, AREBBI nwem, d AREBBI x marra irebbiten d Sidi x marra isiditen, ijj n Arebbi imɣar d ajebbar d ameggʷed, wenni war itteggen řfarz deg iwdan niɣ ikessi ccarḍ, 
wenni itteggen tasegda i uyujiř d tajjač, wenni ittexsen abarrani u iwca as aɣrum d arruḍ. 
Ittxeṣṣa ad texsem abarrani, minzi tuɣa kenniw d ibarraniyyen di temmurt n Miṣra. 
Ad teggʷeded SIDI, AREBBI nnec, ad as tsexxared uca ad as třeṣqed u s Yisem nnes ad tejjaǧed. 
Aqa Netta d asebbaḥ nnec, uca Netta d AREBBI nnec, wenni ɣarek iggin řxedmet-a d tameqqrant uřa d marra timesřayin-a issaggʷaden tinni ẓrint tiṭṭawin nnec. 
Řejdud nwem hwan-dd s sebɛin n řeɛmur ɣar Miṣra uca řexxu igga i-c SIDI, AREBBI nnec, aṭṭas am yitran n ujenna.” 
