﻿Aɛawed n Ccariɛa.
8.
“Ad teḥḍam marra řumurat i zi d awem umureɣ ass-a, maḥend ad tent teggem, ḥima ad teddarem u ad temmarenyem uca ad tadfem ɣar temmurt, tenni ijjuǧ SIDI i řejdud nwem, uca ad tt teksim d řwart. 
Ad tidared marra abrid x mani cek igewwed SIDI, AREBBI nnec, arebɛin n iseggʷusa di řexřa ḥima ad cek isswaḍeɛ u ad cek iqeǧeb maḥend ad issen min din deg wuř nnec, ma ad teḥḍid řumurat nnes niɣ lla. 
Netta isswaḍeɛ i cek u issřaẓ i cek u iwca ac ‘manna’ d macca, tenni war tessined ca cek uřa d řejdud nnec war tt ssinen ca, ḥima ad ac isscen belli bnadem war iddar s weɣrum waha, maca aqa bnadem iddar s marra min dd-iffɣen zeg uqemmum n SIDI. 
Arruḍ nnec ɛemmarṣ war xak iwsar uřa d aḍar nnec war yuff ca di marra arebɛin n iseggʷusa-ya. 
Sen deg wuř nnec, belli SIDI, AREBBI nnec, aqa yarebba i cek, am mammec yarebba aryaz mmis 
uca ḥḍa řumurat n SIDI, AREBBI nnec, ařami teǧid deg ibriden nnes u ařami zzayes tteggʷeded.” 
“Minzi SIDI, AREBBI nnec, ad cek issidef deg ict n temmurt icnan, ict n temmurt n tɣezratin d řɛunṣarat d waman ihewřen, inni dd-iffɣen zi teysart d wedrar, 
ict n temmurt n irden d imendi d tzayarin d wartan n tazart d iremmamen, ict n temmurt teccur s zzect n tzitunt u n tamment, 
ict n temmurt mani ɣa tecced aɣrum umi war din řexṣeṣ u war cek ittxeṣṣi ca dayes, ict n temmurt, iẓra nnes ccuren s wuzzař u zeg idurar nnes ad tneqced nnḥas. 
Mařa teccid u tejjiwned, ad tbarked SIDI, AREBBI nnec, x temmurt icnan, tenni d ac iwca.” 
“Ḥḍa ixef nnec, ḥima war tᵉttud SIDI, AREBBI nnec, ařami war teḥḍid řumurat nnes, lfarayiḍ nnes d tweṣṣa nnes, tinni d ac umureɣ ass-a, 
ḥima war ittiři - mařa teccid u tejjiwned uca aqa tebnid tudrin icnan, tinni i di teggid ad daysent tzedɣed, 
uca ifunasen d tfunasin nnec d wuǧi nnec ttwammarnin u nnuqart d wureɣ nni ɣarek aqa ttwammarnin, u marra min ɣarek aqa ittwammarni - 
ad tessgeɛɛded uř nnec, ad tᵉttud SIDI, AREBBI nnec, wenni cek dd-issuffɣen zi temmurt n Miṣra, zi taddart n tesmuɣi ... 
d Wenni i cek dd-inedhen di řexřa imɣaren u issaggʷaden mani tuɣa ifiɣran yarɣin d tɣarḍmiwin uřa di tammurt ittfadan břa aman, d Wenni dd-issuffɣen aman zeg weẓru n sseǧaḥ, 
d Wenni d ac iwcin ‘manna’ i macca di řexřa, manna nni war ssinen řejdud nwem, ḥima ad cek isswaḍeɛ u ḥima ad cek iqeǧeb u ḥima ad ac igg tcuni ɣar uneggar, 
uca xenni ad tinid deg wuř nnec: ‘S tzemmar inu d jjehd n ufus inu ṭṭfeɣ marra řeksibet-a i yixef inu.’ 
Idar SIDI, AREBBI nnec aqa Netta i d ac iwcin jjehd ḥima ad tkesbed ict n řeksibet temɣar maḥend ad imten ammu Řɛahd nnes nni tuɣa ijjuǧ i řejdud nnec, am teǧa ass-a. 
Mařa tiwḍed ad tᵉttud SIDI, AREBBI nnec, uca ad tuyured awarni i irebbiten nneɣni, ad asen tɛebded u ad asen tbendqed, necc ass-a barrḥeɣ ac-dd, aqa ad tᵉttwahellkem s ttidet. 
Ad tᵉttwahellkem am řegnus nni x yuẓẓeř SIDI zzat i wudem nwem, minzi war tesřim i tmijja n SIDI, AREBBI nwem.” 
