﻿Aɛawed n Ccariɛa.
4.
“Xenni řexxu, a Israil, seř ɣar tweṣṣa d lfarayiḍ nni d awem sseřmadeɣ, maḥend ad tent teggem ḥima ad teddarem uca ad tadfem ɣar temmurt nni i d awem ɣa iwc SIDI, AREBBI n řejdud nwem, uca ad tt twartem. 
War arennyem ɣar wawař i d awem ɣa umureɣ u war zzayes ttekksem, ḥima ad tiřim tᵉttᵉṭṭfem di tweṣṣa n SIDI, AREBBI nwem, tinni zi d awem ttumureɣ. 
Tiṭṭawin nwem ẓrint min igga SIDI ak-d Baɛl-Faɣur, minzi marra aryaz nni iḍeffaren Baɛl-Faɣur, aqa iteḥḥa i-t SIDI, AREBBI nwem, zi řwesṭ nwem. 
Maca kenniw, inni iřessqen ɣar SIDI, AREBBI nwem, aqa kenniw marra teddarem ɛad ass-a. 
Xzarem, necc ssřemdeɣ awem tiweṣṣa d lfarayiḍ am mammec d ayi yumur SIDI, AREBBI inu, ḥima ad zzaysent teggem di temmurt i ɣar ɣa tadfem maḥend ad tt twartem. 
Ṭṭfem daysent u ggem tent, minzi ta ad tiři tiɣit nwem d řeɛqeř nwem zzat i tiṭṭawin n řegnus nni i ɣa isřen marra tiweṣṣa-ya. Xenni ad inin nitni: ‘Řgens-a ameqqran wanita d tidett d ijj n řgens d amiɣis u s řeɛqeř!’ 
Minzi man řgens imɣaren i da iǧan, aqa ɣares arebbi yudsen am SIDI, AREBBI nneɣ, řebda xmi xas nettřaɣa? 
U man řgens da iǧan imɣar, aqa ɣares tiweṣṣa d lfarayiḍ iseggmen am marra Ccariɛa-ya nni d awem ɣa wceɣ ass-a? 
Maca ḥḍa x yixef nnec uca ṭṭef nican acbar x řeɛmur nnec ḥima war tᵉttud min ẓrint tiṭṭawin nnec u ḥima timesřayin-a war dd-tteffiɣent ca zeg wuřawen nnec. Ittxeṣṣa ad tent tessargbed i iḥenjiren nnec u i iḥenjiren n iḥenjiren nnec. 
Ass min di tuɣa tbedded ɣar wedrar n Ḥurib zzat i wudem n SIDI, AREBBI nnec, řami d ayi inna SIDI: ‘Smun ɣari řgens-a, xenni Necc ad ten arreɣ ad sřen awařen inu maḥend ad ten ssřemden ḥima ad zzayi ggʷeden marra ussan nni iddaren di temmurt uca ḥima ad ten ssřemden i iḥenjiren nsen.’ 
Xenni tqarrbem-dd kenniw uca tbeddem ɣar iḍaren n wedrar uca adrar yarɣa ařami timessi nnes tiweḍ ɣar řwesṭ n ujenna, uca aqa din taǧest d iseynuten d yijj n useynu ibbumbes.    
Xenni issiweř akidwem SIDI zi řwesṭ n tmessi. Kenniw tesřim i řḥess n wawařen, maca war teẓrim ca addud nnes, mɣir ict n tmijja umi tesřim waha. 
Netta issargeb kenniw x Řɛahd nnes, wenni yumur ad t teggem, ɛecra n wawařen. Yura ten di tnayen n teřwiḥin n weẓru. 
I necc ɛawed yumur SIDI di řweqt nni maḥend ad kenniw ssřemdeɣ tiweṣṣa d lfarayiḍ maḥend ad zzaysent teggem di temmurt i ɣar ɣa teẓwam ḥima ad tt twartem.” 
“Ḥḍam nican x řeɛmur nwem, minzi kenniw war teẓrim uřa d ijj n waddud deg wass umi akidwem issiweř SIDI x wedrar n Ḥurib zi řwesṭ n tmessi! 
War ttessefsadem ixef nwem umi ɣa teggem i yixef nwem ijj n řexyař ineqcen, addud n ca n ijj n ṣṣanam, addud n ca n ijj n wewtem niɣ n ict n tewtemt, 
ijj n řexyař n ca n ijj n umuddar nni iǧan x temmurt, niɣ ijj n řexyař n ca n ijj n wejḍiḍ s wefriwen i iṭṭawen deg ujenna, 
niɣ ijj n řexyař n ca n ijj n umuddar nni ittbuɛen x temmurt, niɣ ijj n řexyař n ca n ijj n wesřem nni iǧan deg waman sadu temmurt. 
Ɣarek ad tessgeɛɛded tamuɣři nnec ɣar ujenna uca xenni ad tẓared tafuct d uyur d itran, marra řɛeskar n ujenna, uca xenni ad ttwaɛarrned ad asen tbendqed uca ad asen tɛebded i nitni, inni ibḍa SIDI, AREBBI nnec, i marra řegnus sadu marra ajenna. 
SIDI aqa iqbeř i kenniw uca issuffeɣ i kenniw-dd zeg ufarran n wuzzař, zi Miṣra, ḥima ad as tiřim d řgens nnes i iwart, am teǧa ass-a. 
Ɛawed isɛar xafi SIDI di ssibbet n wawařen nwem uca ijjuǧ belli war ẓekkʷwiɣ ca L’Urdun u war ttidfeɣ ɣar temmurt iṣebḥen nni i d ac ɣa iwc SIDI, AREBBI nnec, d řwart, 
minzi necc ad mmteɣ di temmurt-a, war ẓekkʷiɣ ca L’Urdun. Kenniw ad teẓwam uca ad tᵉṭṭfem tammurt-a icnan. 
Ḥḍam war tᵉttum Řɛahd n SIDI, AREBBI nwem, wenni igga akidwem uca ḥḍam war tteggem i yixef nwem ijj n řexyař ineqcen zi ca n n řḥajjet i d ac iḥarrem SIDI, AREBBI nnec. 
Minzi SIDI, AREBBI nnec, aqa-t d ict n tmessi ittetten, d ijj n Arebbi ittasmen. 
Xmi ɣa tarwem arraw d ayyawen uca ad tewsarem di temmurt uca xenni ad tdeǧmem ixef nwem, ad teggem ijj n řexyař ineqcen, ṣṣiffet n ca n řḥajjet uca ad teggem řɣar di tiṭṭawin n SIDI, AREBBI nwem umi t ɣa tesɛarem ammu, 
xenni necc ass-a ad řaɣiɣ x ujenna d temmurt d řechud xawem, aqa kenniw ad tᵉttwahellkem deɣya s tidett di temmurt i ɣar ɣa teẓwam x L’Urdun maḥend ad tt teksim d řwart. War dayes tᵉttɣimim kenniw ca n wussan ktar ɛad, minzi ad tᵉttwateḥḥam qaɛ. 
SIDI ad kenniw ibezzeɛ jar řegnus uca ad zzaywem iqqim ijj n wuru n yeryazen waha jar řegnus mani kenniw ɣa indeh SIDI. 
Din ad tsexxarem irebbiten nni ittwaggen s ifassen n bnadem s ukeccuḍ d weẓru, inni war ittwařin, war ittesřin, war ittetten u war ittcemman.” 
“Ad tarzum ssenni SIDI, AREBBI nnec, u cek ad t tafed, mařa tarezzud xas s marra uř nnec d marra řeɛmar nnec. 
Mařa cek di řeḥṣaret uca ad ɣarek dd-asen marra awařen-a deg uneggar n wussan, xenni ad dd-tdewřed ɣar SIDI, AREBBI nnec, u ad tesřed i tmijja nnes, 
minzi SIDI, AREBBI nnec, d ijj n Arebbi yareḥḥmen, war cek ittejji u war cek ittareddeǧ. War ittettu Řɛahd n řejdud nnec, wenni d asen ijjuǧ. 
Seqsa xenni x wussan iɛdun, inni iǧan qbeř i cek, zeg wass min di igga AREBBI bnadem x temmurt, seqsa zi ṭṭarf n ujenna ɣar ṭṭarf nneɣni n ujenna, ma ɛemmarṣ temsar ca n řḥajjet temɣar anect n tanita niɣ ittwaseř ca am man aya? 
Ma ɛemmarṣ isřa ca n řgens tmijja n AREBBI tessiweř zi řwesṭ n tmessi am mammec tt ttesřid cek uca xenni iqqim iddar? 
Niɣ ma iqeǧeb ɛemmarṣ ijj n arebbi ad dd-yas maḥend ad iksi i yixef nnes ijj n řgens zi řwesṭ n ijj n řgens nneɣni s tjarribin, s řeɛřamat, s lmuɛjizat, s umenɣi, s ufus ijehden, s uɣiř isswiẓẓḍen u s tmegga ssiggʷident mɣarent, am marra min igga SIDI, AREBBI nwem, zzat i tiṭṭawin nwem di Miṣra? 
Aqa i cek umi dd-ittwassban aya, ḥima ad tessned belli SIDI d AREBBI i iǧa. War din ca nneɣni mɣir Netta. 
Zeg ujenna igga ad tesřed i tmijja nnes ḥima ad cek inebbeh u x temmurt aqa isscen ac timessi nnes imɣaren u aqa tesřid awařen nnes zi řwesṭ n tmessi. 
Minzi Netta tuɣa ixs řejdud nnec, u ifarz zzariɛet nnes awarni as, aqa issuffeɣ i cek-dd s Yixef nnes zi Miṣra s jjehd nnes imɣaren 
ḥima ad yaẓẓeř zzat i wudem nnec x řegnus imɣaren d yinni xak ijehden zi teṣɣart nsen, u ḥima ad dayes issidef cek u ad ac iwc tammurt nsen d řwart, am mammec i teǧa ass-a. 
Xenni ssen ass-a uca xarreṣ x man aya deg wuř nnec belli SIDI d AREBBI i yeǧa, sennej deg ujenna u swadday di temmurt, war din ḥed nneɣni! 
Ṭṭef di tweṣṣa nnes u di řumurat nnes, tinni d ac umureɣ ass-a ḥima ad iffeɣ umeddur mliḥ i cek u i iḥenjiren nnec awarni ac uca ad zzugarten ussan di temmurt i d ac ɣa iwc SIDI, AREBBI nnec, i řebda.” 
Xenni ifarz Musa třata n tneddam n tarewřa x ujemmaḍ n L’Urdun manis dd-tneqqar tfuct, 
ḥima ad din yařwer uqettař nni inɣin, břa ma ad as igg řeḥsab, jjar nnes, wenni umi war icarrhen ɛemmarṣ iḍennaḍ uřa d fariḍennaḍ. Wanita izemmar ad yarweř ɣar ict zi tneddam-a ařami iqqim iddar netta. 
Baṣir di řexřa, di řwaṭa yuɛřan, i Rubiniyyen, u Ramut di Jilɛad i Ijadiyyen u Julan d Bacan i Imanassiyyen. 
Ta d Ccariɛa nni igga Musa zzat i ayt n Israil. 
Ina d cchadat d tiweṣṣa d lfarayiḍ nni issiweř Musa ɣar ayt n Israil umi dd-ffɣen zi Miṣra. 
Aya tuɣa x ujemmaḍ n L’Urdun, di teɣzurt arendad n Bayt-Faɣur, di temmurt n Siḥun, ajeǧid n Imuriyyen, wenni tuɣa izeddɣen di Ḥacbun, wenni x iɣřeb Musa ak-d ayt n Israil umi dd-ffɣen zi Miṣra. 
Aqa ksin tammurt nnes am řwart uřa d tammurt n Ɛuj, ajeǧid n Bacan, timmura n tnayen n ijeǧiden n Imuriyyen nni tuɣa zeddɣen x ujemmaḍ n L’Urdun manis dd-tneqqar tfuct, 
zi Ɛaruɛir nni iǧan ɣar tma n teɣzart n Arnun ař wedrar n Siyun nni iǧan d wedrar n Ḥirmun, 
d marra řewḍa x ujemmaḍ n L’Urdun, ɣar ccarq, ař Řebḥar n Řewḍa nni iǧan wadday n teysarin n wedrar n Fisja. 
