﻿Di Řexřa.
27.
Xenni usint-i-dd yessis n Ṣalufḥad, mmis n Ḥafar, mmis n Jilɛad, mmis n Makir, mmis n Manassa, inni iǧan n řaǧat n Manassa, mmis n Yusuf. Ina d ismawen n yessis: Maḥla, Nuɛa, Ḥujla, Milka d Tirṣa. 
Tuɣa beddent zzat i wudem n Musa u zzat i wudem n Aliɛazar, akehhan, u zzat i wudem n řḥukkam u zzat i wudem n marra tamesmunt ɣar wadaf n Uqiḍun n Umsagar, nnant: 
“Babatneɣ immut di řexřa u war t tuɣi jar ubarru n yinni imunen ḍidd i SIDI, deg ubarru n Quraḥ war din t tuɣi netta, minzi immut di ddnub nnes u war ɣares tuɣi iḥenjiren.    
Mayemmi ɣa ikkes isem n babatneɣ zi jar řaǧ nnes, ma minzi war ɣares tuɣi bu uḥenjir? Ewc aneɣ agřa di řwesṭ n aytmas n babatneɣ.” 
Musa yiwi ddeɛwa nsent zzat i wudem n SIDI. 
Issiweř SIDI ak-d Musa, inna: 
“Aqa aya am mammec t nnant yessis n Ṣalufḥad. Ittxeṣṣa ad asent tewced tasɣart n řwart di  řwest n aytmas n babatsen uca ad xasent tesseɛdud řwart n babatsent. 
Uca ad tessiwřed ak-d ayt n Israil, ad tinid: ‘Mařa ca n yijjen immut břa mmis, xenni ad tesseɛdum řwart nnes ɣar yeǧis, 
u mařa war ɣares yeǧis, ad tewcem řwart nnes i yaytmas. 
Mařa war ɣares aytmas ɛawed, ad tewcem řwart nnes i yaytmas n babas. 
Mařa babas war ɣares aytmas ɛawed, ad tewcem řwart nnes i raǧ nnes, i wenni i d as dd-yudsen zi řaǧ nnes, ḥima ad tt iwart netta.’ Man aya ad tiři d ict n tewṣeyyet n uzerf i řebda i ayt n Israil, am mammec t yumur SIDI i Musa.” 
Xenni inna SIDI i Musa: “Geɛɛed-dd adrar-a Abarim uca xzar tammurt nni wciɣ i ayt n Israil. 
Xmi tt ɣa tẓared, ad tᵉmmarnid ɣar řgens nnec, uřa d cek, am mammec uřa d umac Harun immarni ɣar řgens nnes, 
minzi kenniw tɣewwɣem zzat i tiṭṭawin nsen ḍidd i řumur inu maḥend ad ayi tessqeddsem di řexřa n Ṣin, řami din tuɣa amcubbec di tmesmunt. Aqa d ina d aman n Mariba, ɣar Qadac di řexřa n Ṣin.” 
Issiweř Musa ak-d SIDI, inna: 
“Ad igg SIDI, AREBBI n buḥbeřat n marra ddat, aḥeṭṭu x tmesmunt deg ufus n ijj n weryaz, 
ḥima netta ad iffeɣ zzat i wudem nsen uca ad yadef zzat i wudem nsen uca ad ten indeh ɣar barra, ad ten issidef ɣar daxeř, maḥend tamesmunt n SIDI war tᵉttiři am wuǧi břa ameksaw.”    
Xenni inna SIDI i Musa: “Ksi Yacuwa, mmis n Nun, ijj n weryaz i di iǧa Arruḥ, uca sars xas afus nnec 
uca ad t tegged zzat i wudem n ukehhan Aliɛazar u zzat i marra tamesmunt, ad as tewced řumur zzat i tiṭṭawin nsen. 
Ewc as ca zeg uweqqar nnec ḥima ad as tseř marra tamesmunt n ayt n Israil. 
Netta ad ibedd zzat i ukehhan Aliɛazar, wenni i ɣa icawar zzat i wudem n SIDI ɛlaḥsab řeḥkam n Urim. X řumur nnes ad dd-ffɣen ɣar barra u x řumur nnes ad adfen ɣar daxeř, netta d marra ayt n Israil uřa d marra tamesmunt.” 
Uca Musa igga am mammec d as yumur SIDI. Yiwi Yacuwa uca issbedd i-t zzat i ukehhan Aliɛazar u zzat i wudem n marra tamesmunt. 
Issars xas ifassen nnes uca isseɛdu as řumur am mammec d as inna SIDI s tsexxart n Musa. 
