﻿Di Řexřa.
26.
Issiweř SIDI ak-d Musa d Aliɛazar, mmis n Harun, akehhan, inna: 
“Ḥesbem marra tamesmunt n ayt n Israil, azeǧif azeǧif, zi ɛicřin n iseggʷusa sennej, am ttwasettfen nitni ɛlaḥsab taddart n ibabaten nsen, marra wenni dd-itteffɣen di Israil ak-d řɛeskar.” 
Musa d Aliɛazar, akehhan, ssiwřen akidsen di řewḍat n Mu’ab, ɣar L’Urdun arendad n Ariḥa uca nnan: 
“Zi ɛicřin n iseggʷusa sennej!” am mammec t yumur SIDI i Musa. Ina d ayt n Israil nni tuɣa dd-iffɣen zi temmurt n Miṣra: 
Rubin tuɣa d amenzu n Israil. Aqa ina d iḥenjiren n Rubin: zi Ḥanuk řaǧ n Iḥanukiyyen, zi Fallu řaǧ n Ifalluwiyyen, 
zi Ḥaṣrun řaǧ n Iḥaṣruniyyen, zi Karmi řaǧ n Ikarmiyyen. 
Tina tuɣa d řaǧat n Irubiniyyen uca inni zzaysen ittwaḥesben tuɣa aten di třata u-rebɛin-ařef u-sebɛa-mya u-třatin n yeryazen. 
Tarwa n Fallu tuɣa aten: mɣir Iliyab. 
Tuɣa arraw n Iliyab: Nimuyil, Datan d Abiram. Ina, Datan d Abiram, tuɣa aten d imřaɣan n tmesmunt inni iɣewwɣen ḍidd i Musa d Harun, jmiɛ ak-d ubarru n Quraḥ, umi ɣewwɣen ḍidd i SIDI.    
Tammurt tarzem aqemmum nnes uca tsarḍ i-ten, jmiɛ ak-d Quraḥ, řami immut ubarru nni umi timessi tecca mitayen u-xemsin n yeryazen. Dewřen nitni d ijj n weɛřam issiggwiden. 
Maca iḥenjiren n Quraḥ war mmuten ca. 
Ina tuɣa d iḥenjiren n Cimɛun ɛlaḥsab řaǧat nsen: zi Nimuyil iqqarṣ řaǧ n Inimuyiliyyen, zi Yamin řaǧ n Iyaminiyyen, zi Yakin řaǧ n Iyakiniyyen, 
zi Zaraḥ řaǧ n Izaraḥiyyen, zi Cawul řaǧ n Icawuliyyen. 
Tina tuɣa d řaǧat n Icimɛuniyyen: tnayen u-ɛicrin-ařef u-mitayn n yeryazen. 
Ina tuɣa d iḥenjiren n Jad ɛlaḥsab řaǧat nsen: zi Ṣifun iqqarṣ řaǧ n Iṣifuniyyen, zi Ḥajji řaǧ n Iḥajjiwiyyen, zi Cuni řaǧ n Icuniyyen, 
zi Uzni řaǧ n Iyuzniyyen, zi Ɛiri řaǧ n Iɛiriyyen, 
zi Arud řaǧ n Irudiyyen, zi Ariyili řaǧ n Iriyiliyyen. 
Tina tuɣa atent d řaǧat n Jad uca inni zzaysen ittwaḥesben tuɣa aten di arebɛin-ařef u-xemsa-mya. 
Ayt n Yahuda tuɣa aten d Ɛir d Unan. Maca mmuten Ɛir d Unan di temmurt n Kenɛan. 
Ina tuɣa aten d iḥenjiren n Yahuda ɛlaḥsab řaǧat nsen: zi Cayla iqqarṣ řaǧ n Icilayyen, zi Fariṣ řaǧ n Ifaraṣiyyen, zi Zaraḥ řaǧ n Izaraḥiyyen. 
Ina tuɣa aten d iḥenjiren n Fariṣ: zi Ḥaṣrun iqqarṣ řaǧ n Iḥaṣruniyyen, zi Ḥamul řaǧ n Iḥamuliyyen. 
Tina tuɣa atent d řaǧat n Yahuda uca inni zzaysen ittwaḥesben tuɣa aten di setta u-sebɛin-ařef u-xemsa-mya n yeryazen. 
Ina tuɣa aten d iḥenjiren n Issakar ɛlaḥsab řaǧat nsen: zi Tulaɛ iqqarṣ řaǧ n Itulaɛiyyen, zi Puwa řaǧ n Ipuwaniyyen, 
zi Yacub řaǧ n Iyacubiyyen, zi Cimrun řaǧ n Icimruniyyen. 
Tina tuɣa atent d řaǧat n Issakar uca inni zzaysen ittwaḥesben tuɣa aten di arebɛa u-settin-ařef u-teřt-mya n yeryazen. 
Ina tuɣa aten d iḥenjiren n Zabulun ɛlaḥsab řaǧat nsen: zi Sarid iqqarṣ řaǧ n Isaridiyyen, zi Ilun řaǧ n Iluniyyen, zi Yaḥliyil řaǧ n Iyaḥliyiliyyen. 
Tina tuɣa atent d řaǧat n Izabuluniyyen uca inni zzaysen ittwaḥesben tuɣa aten di settin-ařef u-xemsa-mya n yeryazen. 
Ina tuɣa aten d iḥenjiren n Yusuf ɛlaḥsab řaǧat nsen: Manassa d Ifrayim. 
Ina tuɣa aten d iḥenjiren n Manassa: zi Makir iqqarṣ řaǧ n Imakiriyyen. Makir yejj-dd Jilɛad. Zi Jilɛad iqqarṣ řaǧ n Ijilɛadiyyen. 
Ina tuɣa aten d iḥenjiren n Jilɛad: zi Iɛazar iqqarṣ řaǧ n Iɛazariyyen, zi Ḥalaq řaǧ n Iḥalaqiyyen, 
zi Asriyil řaǧ n Isriyiliyyen, zi Cakam řaǧ n Icakamiyyen, 
zi Cimidaɛ řaǧ n Icimdaɛiyyen, zi Ḥafar řaǧ n Iḥafariyyen. 
Ṣalufḥad, mmis n Ḥafar, war tuɣi ɣares ca iḥenjiren, mɣir tiḥenjirin. Ina tuɣa aten d ismawen n yessis n Ṣalufḥad: Maḥla, Nuɛa, Ḥujla, Milka d Tirṣa. 
Tina tuɣa atent d řaǧat n Manassa uca inni zzaysen ittwaḥesben tuɣa aten di tnayen u-xemsin-ařef u-sebɛa-mya n yeryazen. 
Ina tuɣa aten d iḥenjiren n Ifrayim, ɛlaḥsab řaǧat nsen: zi Cutalaḥ iqqarṣ řaǧ n Icutalaḥiyyen, zi Bakar řaǧ n Ibakariyyen, zi Taḥan řaǧ n Itaḥaniyyen. 
Ina tuɣa aten d iḥenjiren n Cutalaḥ: zi Ɛiran řaǧ n Iɛiraniyyen. 
Tina tuɣa atent d řaǧat n warrawen n Ifrayim uca inni zzaysen ittwaḥesben tuɣa aten di tnayen u-třatin-ařef u-xemsa-mya n yeryazen. Ina tuɣa aten d arrawen n Yusuf, ttwasettfen ɛlaḥsab řaǧat nsen. 
Ina tuɣa aten d iḥenjiren n Binyamin ɛlaḥsab řaǧat nsen: zi Bilaɛ iqqarṣ řaǧ n Ibilaɛiyyen, zi Acbil řaǧ n Icbiliyyen, zi Aḥiram řaǧ n Iḥiramiyyen, 
zi Cafufam řaǧ n Icafufamiyyen, zi Ḥufam řaǧ n Iḥufamiyyen. 
Ina tuɣa aten d iḥenjiren n Balaɛ: Ard d Nuɛman. Zi Ard iqqarṣ řaǧ n Irdiyyen, zi Nuɛman řaǧ n Inuɛmaniyyen. 
Ina tuɣa aten d iḥenjiren n Binyamin, ɛlaḥsab řaǧat nsen uca inni zzaysen ittwaḥesben tuɣa aten di xemsa u-rebɛin-ařef u-setta-mya n yeryazen. 
Ina tuɣa aten d iḥenjiren n Dan ɛlaḥsab řaǧat nsen: zi Cuḥam iqqarṣ řaǧ n Icuḥamiyyen. Tina tuɣa d řaǧat n Dan, ttwasettfent ɛlaḥsab řaǧat nsen. 
Marra řaǧat n Icuḥamiyyen, aqa inni zzaysen ittwaḥesben tuɣa aten di arebɛa u-settin-ařef u-arebɛa-mya n yeryazen. 
Ina tuɣa aten d iḥenjiren n Acir ɛlaḥsab řaǧat nsen: zi Yimna iqqarṣ řaǧ n Iyimniyyen, zi Yicwi řaǧ n Iyicwiyyen, zi Beriɛa řaǧ n Ibariɛiyyen. 
Ina tuɣa aten d iḥenjiren n Beriɛa: zi Ḥabir iqqarṣ řaǧ n Iḥabiriyyen, zi Malkiyil řaǧ n Imalkiyiliyyen. 
Isem n yeǧis n Acir tuɣa-tt d Saraḥ. 
Ina tuɣa aten d iḥenjiren n Acir uca inni zzaysen ittwaḥesben tuɣa aten di třata u-xemsin-ařef u-arebɛa-mya n yeryazen. 
Ina tuɣa aten d iḥenjiren n Naftali ɛlaḥsab řaǧat nsen: zi Yaḥasyil iqqarṣ řaǧ n Iyaḥasliyyen, zi Juni řaǧ n Ijuniyyen, 
zi Yaṣir řaǧ n Iyaṣiriyyen, zi Cillim řaǧ n Icillimiyyen. 
Tina tuɣa atent d řaǧat n Naftali, ɛlaḥsab řaǧat nsen uca inni zzaysen ittwaḥesben tuɣa aten di xemsa u-rebɛin ařaf u-arebɛa-mya n yeryazen. 
Ina d inni ittwaḥesben zeg ayt n Israil: setta-mya u-waḥit-ařef u-sebɛa-mya u-třatin n yeryazen. 
Issiweř SIDI ak-d Musa, inna: 
“Jar ina ad tᵉttwabḍa temmurt d řwart, ɛlaḥsab řqedd n ismawen nsen. 
I wenni umi ɣar iǧa aṭṭas n iwdan, ad tewced ktar d řwart uca i wenni umi ɣar iǧa drus n iwdan, ad tewced qell d řwart. Kuř ijjen ɛlaḥsab inni ittwaḥesben ad as temmewc tasɣart nnes. 
Tammurt ad tᵉttwabḍa s tqedduḥt. Nitni ad warten ɛlaḥsab ismawen n tqebbař n řejdud nsen. 
Ad tᵉttwabḍa tesɣart n kuř ijj s tqedduḥt jar inni iǧan s waṭṭas d inni iǧan drus.” 
Ina tuɣa aten d inni ittwaḥesben zi Lawi ɛlaḥsab řaǧat nsen: zi Jarcun řaǧ n Ijarcuniyyen, zi Qahat řaǧ n Iqahatiyyen, zi Marari řaǧ n Imarariyyen. 
Tuɣa tina d řaǧat n Ilawiyyen: řaǧ n Ilibniyyen, řaǧ n Iḥibruniyyen, řaǧ n Imahliyyen, řaǧ n Imuciyyen, řaǧ n Iquraḥiyyen. Uca Qahat yejj-dd Ɛamram. 
Tamɣart n Ɛamram qqarent as Jukabad, yeǧis n Lawi, tenni dd-ittwarwen i Lawi di Miṣra. D nettat turuw-dd Harun d Musa d Maryam, učmatsen, i Ɛamram. 
I Harun ttwarwen as-dd Nadab d Abihu, Aliɛazar d Itamar. 
Maca Nadab d Abihu mmuten, umi dd-iwyen timessi taɣribt zzat i wudem n SIDI. 
Inni zzaysen ittwaḥesben, zeg Ilawiyyen, marra iwetman n ijj n uyur sennej, tuɣa aten di třata u-ɛicrin-ařef. Ina maca war ttwaḥesben ca ak-d ayt n Israil, minzi war d asen temmewc tesɣart d řwart jar ayt n Israil. 
Ina tuɣa aten d inni ittwaḥesben s ufus n Musa d Aliɛazar, akehhan. Nitni ḥesben ayt n Israil di řewḍat n Mu’ab, ɣar L’Urdun arendad n Ariḥa. 
War tuɣi jar asen uřa d ijj zeg inni ittwaḥesben n Musa d Harun, akehhan, umi ḥesben nitni ayt n Israil di řexřa n Sina. 
minzi xasen tuɣa inna SIDI ad mmten s tidett di řexřa. War zzaysen iqqim uřa d ijj, mɣir Kalib, mmis n Yafunni, d Yacuwa, mmis n Nun. 
