﻿Di Řexřa.
24.
Iẓra Balɛam belli aqa yarḍa i tiṭṭawin n SIDI umi ibarek Israil uca xenni war yarezzu, am umur amezwaru d umur wiss tnayen, ḥima ad iɛezzem s ifiɣran, maca yarra udem nnes ɣar řexřa. 
Umi issgeɛɛed tamuɣři nnes, iẓra Israil izdeɣ din, tᵉttwasettef ɛlaḥsab tiqebbař nnes, xenni yusa-dd Arruḥ n AREBBI xas. 
Ibda netta awař nnes iweznen, inna: “Awař n Balɛam, mmis n Baɛur, awař n weryaz ijehden, wenni umi teqqen tiṭṭ, 
ijj n wawař n wenni isřin awařen n Arebbi, d wenni ixezzaren řewḥiy n Umzemmar x kuřci, am dd-iwḍa s tiṭṭawin yarezmen. 
A Yaɛqub, mecḥař ṣebḥen iqiḍan nnec, d tzeddiɣin nnec, a Israil!, 
aqa sswiẓẓaḍen amecnaw tiɣzurin, amecnaw aɣemmuy icewwaren ak-d yeɣzar, amecnaw acfiř nni iẓẓu SIDI, amecnaw ticejjura n tengelt zzat i waman. 
Zeg ibuqařen nnes ad ssizzřen waman uca zzariɛet nnes ad tiři di tuffet. Ajeǧid nnes ad ittwassgeɛɛed x Ajaj u tageldit nnes ad tᵉttwassuɛřa. 
Arebbi issuffeɣ i-t-i-dd zi Miṣra. Jjehd nnes am waccawen iziraren n iɣayḍ n řexřa. Ad yecc řegnus, iɣrimen nnes, ad iřbez iɣussan nsen uca ad ten issnuqqeb s fřitcat nnes. 
Aqa iɣnes, issezzeř ixef nnes am weyrad, am teyradt. Wi t i dd ɣa issekkaren? Wenni cek ittbarken, ad ittwabarek u wenni cek ineɛɛřen, ad yiři ittwanɛeř!’” 
Xenni yarɣa uxeyyeq n Balak x Balɛam. Iwta netta deg ifassen nnes uca Balak inna i Balɛam: “Aqa řaɣiɣ-dd cek maḥend ad tneɛřed řɛedyan inu, maca xzar, aqa tbarked i-ten ɛad nican třata n imuren! 
Xenni řexxu, arweř ɣar wemcan mani tzeddɣed! Necc nniɣ ac t, ad cek cenɛeɣ aṭṭas, maca xzar, SIDI imneɛ xak ccenɛet nni!” 
Xenni inna Balɛam i Balak: “Ma war ssiwřeɣ ak-d ireqqasen nni d ayi dd-tᵉssekked uca nniɣ: 
‘Waxxa Balak ad ayi iwc taddart nnes teccur s nnuqart d wureɣ, xenni necc ɛad war zmireɣ ad ɛeddiɣ x řumur n SIDI, maḥend ad ggeɣ ca n řḥajjet n řxar niɣ n řɣar i dd-itteffɣen zeg wuř inu. Min ɣa yini SIDi, ad t iniɣ.’ 
Řexxu xenni, xzar, necc ad dd-dewřeɣ ɣar řgens inu. As-dd, necc ad cek ssaregbeɣ x řefhamet uca ad ac iniɣ min d ac ɣa yegg řgens-a deg uneggar n wussan.” 
Xenni ibda netta awař iweznen nnes, inna: “Awař n Balɛam, mmis n Baɛur, awař n weryaz ijehden, wenni umi teqqen tiṭṭ! 
Tawařt n wenni isřin awařen n Arebbi, d wenni issnen zi tussna n wenni d Amɛuǧi x kuřci, d wenni ixezzaren řewḥiy n Umzemmar x kuřci, am dd-iwḍa s tiṭṭawin yarezmen. 
Ad t ẓarɣ, war iǧi řexxu, ad t twařiɣ, maca war iǧi zi řadaset. Ad dd-iffeɣ itri zi Yaɛqub uca ad tekkar uzeǧaḍ n řḥakem zi Israil, wenni i ɣa iřebzen lḥenkat n uzeǧif n Mu’ab uca ad iřbez marra tarwa n ssdeɛ 
uca ad ittwaṭṭef Idum d řwart u Saɛir, wenni d řeɛdu nnes, ad t ṭṭfen d řwart ɛawed, uca ammu i ɣa yegg Israil s taryast. 
U wenni i dd ɣa iffɣen zi Yaɛqub ad iḥkem u netta ad isshellek wenni yarewřen zi tendint.” 
Umi netta iẓra Ɛamaliq, ibda awař iweznen nnes, inna: “Ɛamaliq d amezwaru n řegnus, maca aneggaru nnes ad idweř d ahellek!” 
Řami iẓra Iqiniyyen, ibda netta awař iweznen nnes, inna: “Tazeddiɣt nnec temten uca teggid řɛucc nnec di teṣḍart. 
Ɛad Qayin ad ittwassecmeḍ. Ař meřmi izemmar Accur ad ac dd-yawi d ameḥbus?” 
Uca ibda netta awař iweznen nnes, inna: “Ay, wi ɣa iqqimen iddaren xmi xas i ɣa issars Arebbi man aya? 
Iɣarruba zi jjwayeh n Kittim ad ɣezzan Accur uca ad ɣezzan ɛawed Ɛabir u netta ad ittwateḥḥa.” 
Ikkar Balɛam, yuyur uca idweř ɣar wemcan nnes n tzeddiɣt. Uřa d Balak iṭṭef abrid nnes. 
