﻿Di Řexřa.
21.
Umi isřa Akenɛani, ajeǧid n Ɛarad nni izeddɣen di Temmurt n Ljanub, belli yusa-dd Israil x webrid n ibergagen, immneɣ ḍidd i Israil uca iṭṭef ca zzaysen d imeḥbas. 
Xenni iwca Israil ijj n wawař i SIDI uca inna: “Mařa d tidett tɛarrned řgens-a deg ufus inu, necc ad ḥarrmeɣ tineddam nsen i uteḥḥi.” 
SIDI istajeb i Israil uca isellem as ayt n Kenɛan uca nitni ḥarrmen i-ten i uteḥḥi uřa d marra tineddam nsen uca iřaɣa amcan nni s yisem n Ḥurma. 
Xenni fesyen iqiḍan nsen zeg wedrar n Hur, ruḥen x webrid ɣar Řebḥar n Telga uca s man aya tuɣa ittxeṣṣa ad nnḍen i temmurt n Idum. Uca řgens war iṣbir deg webrid. 
Aqa iqaceḥ řgens ḍidd i AREBBI d Musa: “Mayemmi d aneɣ dd-tessuffɣem zi Miṣra, maḥend ad nemmet di řexřa-ya? War da iǧi weɣrum uřa d aman. Řeɛmar nneɣ iɛiff zeg weɣrum-a i war isekkwin!” 
Xenni iḍřeq SIDI ifiɣran yareqqen jar řgens, inni izeɛfen řgens uca immut waṭṭas n řgens n Israil. 
Yusa-dd řgens ɣar Musa, nnan: “Aqa nexḍa, minzi nqaceḥ ak-d SIDI u akidek. Ẓaǧ i SIDI maḥend ad xaneɣ ikkes ifiɣran-a.” Xenni iẓuǧ Musa di ṭṭweɛ n řgens. 
Inna SIDI i Musa: “Egg ijj n ufiɣar yareqqen uca sars i-t x ict n teḥnact uca man wen ma ittwazeɛfen u ad ɣares ixzar, ad iddar.” 
Uca igga Musa ijj n ufiɣar n nnḥas uca issars i-t x teḥnact uca xmi izeɛɛef ca n ufiɣar ca n yijjen, uca wanita ixezzar ɣar ufiɣar n nnḥas, xenni ad iqqim iddar. 
Xenni fesyen ayt n Israil iqiḍan nsen uca wtin iqiḍan nsen di Ubut. 
Xenni kksen iqiḍan nsen zi Ubut, wtin iqiḍan nsen ɣar arwinat n Ɛabarim di řexřa i iǧan zzat i wudem n Mu’ab manis dd-tneqqar tfuct. 
Ssenni kksen iqiḍan nsen uca wtin iqiḍan nsen di teɣzurt n Zarad. 
Ssenni kksen iqiḍan nsen uca wtin iqiḍan nsen x ujemmaḍ n yeɣzar n Arnun, wenni issizřen di řexřa, iffeɣ zi jjihet n weymir n Imuriyyen, minzi aqa Arnun d aymir ak-d Mu’ab, jar Mu’ab d Imuriyyen. 
X uya qqaren deg wedlis ittwannḍen n garrat n SIDI: “Wahib di Sufa d tɣezratin n Arnun, 
u tiɣezratin i dd-ihekkwan, ařami meyyřent ɣar tzeddiɣt n Ɛar, d tenni isennden x weymir n Mu’ab.” 
Ssenni ruḥen ɣar Bi’r, ‘Anu’. Wa aqa d anu min xef inna SIDI i Musa: “Smun řgens, xenni ad asen wceɣ aman.” 
Xenni iɣennej Israil izři-ya: “Ngez, a anu!” Arrim-dd xas s ijj n izři: 
“Cek anu, wenni ɣzin řḥukkam, wenni ineqcen tarwa n taṣiřet n řgens ak-d umgewwad nsen s izeǧaḍen nsen n řeḥkamet.” Zi řexřa ruḥen ɣar Mattana, 
uca zi Mattana ɣar Naḥliyil, zi Naḥliyil ɣar Bamut, 
uca zi Bamut ɣar teɣzurt nni iǧan deg iyyar n Mu’ab, x tqiccat n Fisja nni ittsijjan ɣar tnezruft. 
Xenni issekk Israil ireqqasen ɣar Siḥun, ajeǧid n Imuriyyen, inna: 
“Ejj ayi ad cuqeɣ di temmurt nnec. War nettmeyyiř ca ɣar iyyaren niɣ ɣar imarjaɛen nnec n uḍiř u war nsess aman zeg wanuten. Ad neɛdu x webrid igellden, ař ɣa neɛdu x temmurt nnec.” 
Maca Siḥun war yejji ad iẓwa Israil x jjwayeh nnes. Issmun Siḥun marra řgens nnes uca iffeɣ, ḥima ad imsagar ak-d Israil, ɣar řexřa, uca yusa-dd di Yahaṣ uca immneɣ ak-d Israil. 
Uca Israil iwta i-t s řeqḍeɛ n ssif uca iksi temmurt nnes d řwart, zi Arnun ař Yabbuq, ař ayt n Ɛammun, minzi jjihet n ayt n Ɛammun aqa-t d ijj n lburj ijehden. 
Iksi Israil marra tineddam-a uca izdeɣ Israil di marra tineddam n Imuriyyen, di Ḥacbun u di marra tneddam i ɣares dd-iqqnen. 
Minzi Ḥacbun tuɣa d tandint n Siḥun, ajeǧid n Imuriyyen, uca netta tuɣa immneɣ ak-d ujeǧid i d as dd-izwaren n Mu’ab uca iksi zzayes marra tammurt nnes ař Arnun. 
X uya qqaren inni issawařen s wawařen iweznen: “Asem-dd ɣar Ḥacbun, ad tᵉttwabna u ad tᵉttwaɛdeř tendint n Siḥun! 
Minzi teffeɣ-dd tmessi zi Ḥacbun d ijj n uɛeccař zi tendint n Siḥun, aceɛɛař nni icca Ɛar n ayt n Mu’ab řḥukkam n řuɛřat n Arnun. 
Uct xak, Mu’ab! Aqa ittwahellek řgens n Kamuc. Iḥenjiren nnes i tuɣa yarewřen d tḥenjirin nnes, aqa isellem i-ten d imeḥbas i Siḥun, ajeǧid n Imuriyyen. 
Aqa newwet i-ten s fřitcat. Ḥacbun ittwahellek ař Dibun. Nareddeǧ i-ten ař Nufaḥ tenni iǧan ař Midaba.” 
Ammu i idweř Israil ad izdeɣ di temmurt n Imuriyyen. 
Uca issekk Musa ibergagen ɣar Yaɛzir uca ksin tineddam i ɣares dd-iqqnen uca kksen tasɣart n Imuriyyem nni tuɣa din izeddɣen. 
Xenni meyyřen zeg webrid nsen, uřyen abrid ɣar Bacan. Xenni iffeɣ-dd Ɛuj, ajeǧid n Bacan, netta d marra řgens nnes, maḥend ad kidsen imsagar i umenɣi di Idraɛi. 
Inna SIDI i Musa: “War zzayes tteggʷed ca, minzi Necc ggiɣ t deg ufus nnec, ak-d marra řgens nnes d temmurt nnes uca ad zzayes tegged am mammec teggid zi Siḥun ajeǧid n Imuriyyen, wenni tuɣa izeddɣen di Ḥacbun.” 
Uca areddǧen t, netta d iḥenjiren nnes d marra řgens nnes, ař mani war iqqim uřa d ijj n umařwar zzayes uca ksin tammurt nnes d řwart. 
