﻿Di Řexřa.
20.
Deg uyur amezwaru tiweḍ marra tamesmunt n ayt n Israil ɣar řexřa n Ṣin. Řgens iqqim di Qadac. Din i temmut Maryam uca neḍřen tt din. 
War tuɣi din ca aman i tmesmunt. Xenni munen ḍidd i Musa d Harun. 
Tuɣa řgens imcubbec ak-d Musa, nnan: “Mři tuɣa zzayneɣ iffeɣ buḥbeř umi tuɣa iffeɣ buḥbeř zeg aytmatneɣ zzat i wudem n SIDI! 
Mayemmi tessidfem wegraw n řgens n SIDI di řexřa-ya maḥend ad mmten din, neccin d řebhayem nneɣ? 
U mayemmi d aneɣ dd-tessiřyem zi Miṣra ḥima ad aneɣ tessiwḍem ɣar wemcan-a aɛeffan? Deg wemcan-a war din zzariɛet niɣ tazart niɣ tzayart niɣ aremmam u war din ɛad aman ḥima ad nsu.” 
Xenni yiweḍ Musa ak-d Harun zi zzat n wudem n wegraw n řgens ɣar wadaf n Uqiḍun n Umsagar uca wḍan x wudmawen nsen uca iban asen-dd uɛuǧi n SIDI. 
Issiweř SIDI ak-d Musa, inna: 
“Ksi taɣɣarct uca smun tamesmunt, cek d Harun, umac. Ittxeṣṣa ad tessiwřem ak-d teṣḍart zzat i tiṭṭawin nsen uca xenni ad tewc aman nnes. Ammu i ɣa tessuffɣem aman i nitni zi teṣḍart uca ad tᵉssessud tamesmunt d řebhayem.” 
Xenni iksi Musa taɣɣarct zi zzat n wudem n SIDI am mammec d as yumur Netta, 
uca issmun Musa d Harun agraw n řgens zzat i wudem n teṣḍart. Netta inna asen: “Sřem řexxu, a kenniw inni iɣewwɣen, ma ittxeṣṣa aneɣ ad dd-nessuffeɣ aman zi teṣḍart-a?” 
Uca issgeɛɛed Musa afus nnes uca iwta taṣḍart tnayen n twařawin s taɣɣarct nnes uca ffɣen-dd zzayes aṭṭas n waman uca teswa tmesmunt d řebhayem nsen. 
Xenni inna SIDI i Musa d Harun: “Minzi kenniw war d ayi tᵉttecřem zzat i tiṭṭawin n ayt n Israil ařami d ayi tweqqarem s uweqqar iqeddsen, s uya war tessidifem agraw-a n řgens di temmurt nni d asen wciɣ.” 
Ina aqa d aman n Mariba min xef arezzun ayt n Israil ad mcubbcen ak-d SIDI u mani Netta iban-dd d Amqeddes jar asen. 
Issekk Musa ireqqasen zi Qadac ɣar ujeǧid n Idum, nnan: “Ammu i iqqar Israil, umac: ‘Cek tessned marra tamara nni xaneɣ ikkin, 
aqa řejdud nneɣ hwan-dd ɣar Miṣra u tuɣa nzeddeɣ aṭṭas n iseggʷusa di Miṣra u Imiṣriyyen ggin dayneɣ u di řejdud nneɣ aṭṭas n řɣar. 
Nřaɣa x SIDI uca Netta isřa tmijja nneɣ uca issekk-dd lmalak uca issuffeɣ aneɣ-dd zi Miṣra. Xzar, aqa aneɣ di Qadac, ict n tendint ɣar ṭṭarf n jjihet nnec. 
Ejj aneɣ, mařa texsed, ad neẓwa x temmurt nnec. War nẓekkwi x iyyaren niɣ x imarjaɛen nnec n uḍiř u war nᵉsess aman zeg wanuten. X webrid igellden ad neɛdu břa ma ad nḥeyyed ɣar yefus uřa ɣar uzeřmaḍ, ař ɣa neɛdu ɛawed iymiren n temmurt nnec.’” 
Inna as Idum: “War ttẓekkʷid xafi, niɣ ak kic mmsagareɣ s ssif balak!” 
Xenni nnan as ayt n Israil: “Ad neḍfar abrid ameqqran u mařa ad sweɣ aman nnec, necc d řebhayem inu, ad ten xeǧṣeɣ. Ad ẓwiɣ tammurt x iḍaren d wenni netta waha.” 
Maca netta inna: “War xas tẓekkʷid!” Uca iffeɣ Idum maḥend ad kis imsagar s yijj n ubarru d ameqqran d ufus ijehden. 
Ammu yugi Idum ad iwc ttesriḥ i Israil maḥend ad iẓwa aymir nnes. S uyenni i ijja Israil abrid di ssibbet nnes. 
Fesyen iqiḍan nsen, ffɣen zi Qadac, uca xenni iwḍen ayt n Israil ɣar wedrar n Hur, tamesmunt marra. 
Issiweř SIDI ak-d Musa d Harun ɣar wedrar n Hur, ɣar weymir n temmurt n Idum, inna: 
“Ad immarni Harun ɣar řgens nnes, minzi war ittidef ɣar temmurt nni wciɣ i ayt n Israil, minzi kenniw tɣennanem x řumur inu ɣar waman n Mariba. 
Ksi Harun d Aliɛazar, mmis, uca arr i-ten ad geɛɛden x wedrar n Hur. 
Ɛarra Harun zeg warruḍ nnes uca syarḍ i-t i Aliɛazar, mmis. Xenni ad ittwaksi Harun uca ad immet din.” 
Musa igga am mammec d as yumur SIDI. Uřyen adrar n Hur zzat i tiṭṭawin n marra tamesmunt. 
Musa iɛarra Harun zeg warruḍ nnes uca issyarḍ i-t i Aliɛazar, mmis. Uca immut Harun din x tqiccat n wedrar. Xenni ihwa-dd Musa zeg wedrar ak-d Aliɛazar. 
Marra tamesmunt teẓra belli Harun iḍřeq i buḥbeř nnes uca run třatin n wussan di ssibbet n Harun, marra taddart n Israil. 
