﻿Di Řexřa.
17.
Issiweř SIDI ak-d Musa, inna: 
“Ini i Aliɛazar, mmis n ukehhan Harun, belli ad iksi timejmarin zeg uḥaduq n tmessi uca ad issuyes min iqqimen n tmessi di řaggʷaj, minzi aqa timejmarin nni, qeddsent i ǧant! 
Jjem ten ad ggen zi tmejmarin n yeryazen-a, inni tuɣa ixeṭṭan ḍidd i řeɛmur nsen, tiřwiḥin d tizirarin i dduri i uɛalṭar, minzi iwyen tent zzat i wudem n SIDI, s uya ttwaqeddsent tina. Ad iřint d ijj n uceyyar i ayt n Israil.” 
Xenni iksi ukehhan Aliɛazar timejmarin n nnḥas nni dd-iwyen yinni ittwacemḍen i tewhibt, uca tketken tent ḥima ad zzaysent dřent aɛalṭar 
i řidaret i ayt n Israil, ḥima uřa d ijj n weryaz war iǧin zi zzariɛet n Harun, war dd-ittqarrib ca břa ttesriḥ zzat i wudem n SIDI, ḥima ad issbexxar řebxur, maḥend war d as iřqef min iřeqfen Quraḥ d ubarru nnes, am mammec tuɣa issiweř SIDI s uqemmum n Musa. 
Tiwecca nnes tuɣa marra tamesmunt n ayt n Israil tᵉttnedqam ḍidd i Musa d Harun, nnan: “Kenniw tenɣim řgens n SIDI!” 
Uca umi tmun tmesmunt ḍidd i Musa d Harun uca bdan nitni gguren ɣar Uqiḍun n Umsagar, xzar, aqa din aseynu nni t idřin uca iban-dd uɛuǧi n SIDI. 
Yusa-dd Musa ak-d Harun, bedden zzat i Uqiḍun n Umsagar. 
Issiweř SIDI ak-d Musa, inna: 
“Kkarem, aggʷejem zi řwesṭ n tmesmunt u Necc ad ten mḥiɣ deg ijj n wermac n wabřiwen!” Xenni wḍan x wudem nsen. 
Inna Musa i Harun: “Ksi deɣya ijj n řmejmar, egg xas timessi n uɛalṭar uca sars xas řebxur. Azzeř ɣar tmesmunt uca egg aṣřaḥ di ṭṭweɛ nsen, minzi iffeɣ-dd uduqqez n weɣḍab zi zzat i wudem n SIDI. Aqa da jjriḥect am tebda ɛad.” 
Iksi Harun řmejmar, am mammec inna Musa, uca yuzzeř ɣar řwesṭ n wegraw n řgens, uca xzar, jjriḥect tuɣa am tebda ɛad jar řgens, uca netta issars dayes řebxur uca igga aṣřaḥ di ṭṭweɛ n řgens. 
Tuɣa ibedd jar imettan d imuddaren uca tᵉttwassbedd jjriḥect. 
Wi immuten zi jjriḥect tuɣa aten di arbeɛṭac-ařef u-sebɛa-mya, břa inni immuten di ssibbet n Quraḥ. 
Idweř Harun ɣar Musa ɣar wadaf n Uqiḍun n Umsagar. Aqa tᵉttwassbedd jjriḥect. 
Issiweř SIDI ak-d Musa, inna: 
“Siweř ak-d ayt n Israil uca ksi zzaysen ict n teɣɣarct i kuř taddart n ibabaten nsen, zi marra řḥukkam nsen, ɛlaḥsab lɛadad n tudrin n ibabaten nsen, tenɛac n tᵉɣɣaryen. Ittxeṣṣa ad tarid isem n kuř ijj zzaysen x teɣɣarct nnes. 
Ad tarid isem n Harun x teɣɣarct n Lawi, minzi ad din tiři ict n teɣɣarct i yijj n uzeǧif n taddart n řejdud nsen. 
Ad tent tegged deg Uqiḍun n Umsagar, zzat i Cchadet, mani kidwem ɣa msagareɣ. 
Xenni ad imsar, aqa ad tnuwwar teɣɣarct n weryaz nni ixḍareɣ Necc uca ad ssbeddeɣ anedqem ḍidd inu i zi xawem nndeqmen ayt n Israil.” 
Issiweř Musa ak-d ayt n Israil, uca marra řḥukkam nsen wcin ict n teɣɣarct i mkuř ijj n řḥakem, ɛlaḥsab řqedd n tudrin n ibabaten nsen, tenɛac n teɣɣaryen. Uca taɣɣarct n Harun tuɣa-t jar tᵉɣɣaryen nsen. 
Musa issars tiɣɣaryen nni zzat i wudem n SIDI deg Uqiḍun n Cchadet. 
Tiwecca nnes yudef Musa ɣar Uqiḍun n Cchadet, uca xzar, taɣɣarct n Harun di ṭṭweɛ n taddart n Lawi tuɣa tegga tacřařt uca taɛebbuzt tessuffeɣ-dd uca nnuwwar nnes yarzem uca yiwi-dd ǧuz yiwḍen. 
Xenni issuffeɣ Musa marra tiɣɣaryen zi zzat i wudem n SIDI ɣar marra ayt n Israil. Ẓrin aya uca ṭṭfen kuř ijj taɣɣarct nnes. 
Xenni inna SIDI i Musa: “Arr taɣɣarct n Harun zzat i Cchadet, ad tt teḥḍid am yijj n uceyyar ḍidd i yinni iɣewwɣen. Ammu i ɣa tessbedded anedqem nsen ḍidd inu maḥend nitni war ttmettin ca.” 
Uca igga Musa am mammec d as yumur SIDI, ammu i igga netta. 
Xenni ssiwřen ayt n Israil ak-d Musa, nnan: “Xzar, ad zzayneɣ iffeɣ buḥbeř, ad nettwahellek, ad nettwahellek marra neccin! 
Man wen ma i dd ɣa iqarrben ɣar Uqiḍun n SIDI, ad immet. Ma ad nettwateḥḥa ař zzayneɣ iffeɣ buḥbeř?” 
