﻿Di Řexřa.
14.
Marra tamesmunt tebda tesɣuyyu s jjehd uca řgens iru marra ǧiřet nni. 
Marra ayt n Israil tuɣa ttnedqamen ḍidd i Musa u ḍidd i Harun uca tenna as marra tmesmunt: “Meɛlik qaɛ nemmut di temmurt n Miṣra!” niɣ: “Meɛlik qaɛ nemmut di řexřa-ya!” 
“Mayemmi d aneɣ dd-yiwi SIDI ɣar temmurt-a ḥima ad newḍa s ssif u xenni ad dewřent temɣarin nneɣ d tarwa nneɣ d takeccaḍt? Ma war yeǧi ḥsen zeɛma ad neɛqeb ɣar Miṣra?” 
Uca nnan ijj i wenneɣni: “Ejj aneɣ ad negg ijj d azeǧif xaneɣ uca ad neɛqeb ɣar Miṣra!” 
Řexdenni wḍan Musa d Harun x uɣembub nsen zzat i wudem n marra agraw n tmesmunt n ayt n Israil. 
Yacuwa, mmis n Nun, d Kalib, mmis n Yafunni, inni tuɣa zeg inni tuɣa ittbergagen x temmurt, carrgen arruḍ nsen. 
Nitni ssiwřen ɣar marra tamesmunt n ayt n Israil, nnan: “Tammurt nni x nekka maḥend ad tt nbergeg, aqa-tt d ict n temmurt mliḥ aṭṭas. 
Mařa SIDI issfarnen ɣarneɣ, Netta ad aneɣ dd-yawi ɣar temmurt-a uca ad aneɣ tt iwc, ict n temmurt ifeyyḍen s uɣi d tamment. 
Maca war ttiřim d imɣewwɣen ḍidd i SIDI uca war tteggʷedem ca zi řgens n temmurt-a, minzi aqa aten d aɣrum nneɣ. Tiři nsen teffeɣ-dd sennej nsen, aqa SIDI akidneɣ, war zzaysen tteggʷdem ca!” 
Maca řami tessiweř marra tamesmunt belli ittxeṣṣa ad ten arejmen, iban-dd uɛuǧi n SIDI deg Uqiḍun n Umsagar zzat i marra ayt n Israil. 
Inna SIDI i Musa: “Ař meřmi d ayi ɣa isɛar řgens-a? Ař meřmi war d ayi ttimnen s marra řeɛřamat nni ggiɣ di řwesṭ nsen? 
Necc ad ten wteɣ s ṭṭaɛun uca ad xasen kkseɣ řwart uca ad cek ggeɣ d ijj n řgens d ameqqran, ijhed xasen.” 
Inna Musa i SIDI: “Ad sřen Imiṣriyyen man aya, minzi Cek tessuffɣed řgens-a s jjehd nnec zi řwesṭ nsen. 
uca ad t inin i imezdaɣ n temmurt-a, inni isřin belli Cek, a SIDI, di řwesṭ n řgens-a, belli Cek, a SIDI, tbaned-dd amecnaw udem deg wudem, belli aseynu nnec ittbedda sennej nsen u belli Cek teggured zzat i wudem nsen deg ijj n uqellij n useynu s uziř uca s ǧiřet deg ijj n uqellij n tmessi.    
Mařa tenɣid řgens-a am yijj n weryaz, xenni řegnus nni isřin x usemɣar nnec ad ssiwřen ad inin: 
‘Minzi SIDI war izemmar ad issidef řgens-a di temmurt nni x ijjuǧ ad asen tt iwc, aqa s uyenni d asen iɣarṣ di řexřa!’ 
Řexxu xenni, ejj ad yiři jjehd n Sidi inu imɣar am mammec tuɣa tessiwřed, tennid: 
‘SIDI ɣares ttasiɛ n řxaḍar uřa d aṭṭas n tmexsiwt icewwaren. Aqa yarebbu řmuɛṣiyyet d uxeṭṭu nneɣ u Netta war ittbarri wenni itteggen ddenb u isseɛɛdu řmuɛṣiyyet n ibabaten ɣar iḥenjiren nnes ař jjiř wiss třata d jjiř wiss arebɛa.’ 
Ɣfar i řgens-a řmuɛṣiyyet nnes ɛlaḥsab řemɣaret n tmexsiwt nnec icewwaren u am mammec themřed ak-d řgens-a zi temmurt n Miṣra ař danita!” 
Inna SIDI: “Necc ɣfareɣ asen ɛlaḥsab awař nnec. 
S tidett am ddareɣ Necc, aqa marra tammurt ad tᵉttwaccur s uɛuǧi n SIDI! 
Minzi marra iryazen nni iẓrin aɛuǧi inu d řeɛřamat inu i ggiɣ di Miṣra u di řexřa, d yinni d ayi iqeǧben di řexřa ɛad ɛecra n twařawin u war sřin i tmijja inu, 
war ẓarren tammurt nni x jjuǧeɣ i řejdud nsen ad asen tt wceɣ, wah, marra inni d ayi issdduqqzen ammu, war tt ẓarren. 
Maca ad ssiwḍeɣ amsexxar inu Kalib ɣar temmurt mani tuɣa yudef qbeř uca ad tt warten tarwa nnes, minzi tuɣa akides ijj n arruḥ nneɣni uca netta iḍfar ayi nican. 
Aqa ayt n Ɛamaliq d ayt n Kenɛan zeddɣen di řewḍa n teɣzurt. Ad dd-tdewřem tiwecca uca ad tekksem iqiḍan nwem ssa, ffɣem ɣar řexřa, uyurem deg webrid ɣar Řebḥar n Telga.” 
Issiweř SIDI ak-d Musa d Harun, inna: 
“Ař meřmi ɣa teqqim tmesmunt-a taɛeffant tᵉttnedqam xafi? Anedqem n ayt n Israil i zi xafi ttnedqamen, aqa sřiɣ t. 
Ini asen: ‘S tidett am ddareɣ Necc, iqqar SIDI, mařa war d awem tteggeɣ am mammec d awem sřiɣ s imezzuɣen inu min tennam kenniw. 
Řxecbat nwem ad wḍant di řexřa-ya, řxecbat n marra inni ittwaḥesben n řgens, marra řqedd n iḥenjiren nwem zi ɛicřin iseggʷusa sennej i tuɣa xafi ittnedqamen. 
Kenniw war tᵉttidfem ca ɣar temmurt min xef ssgeɛɛdeɣ afus inu maḥend ad jjaǧeɣ ad kenniw ggeɣ ad dayes tzedɣem, mɣir Kalib, mmis n Yafunni, d Yacuwa, mmis n Nun. 
Tarwa nwem i xef tennam: ‘Ad ttwakeccḍen!’, Necc ad ten ssidfeɣ dayes uca nitni ad ssnen tammurt nni tenḍarem kenniw ammu s useḥqar. 
Maca řxecbat nwem, wah, kenniw simant nwem, ad tewḍam di řexřa-ya, 
uca iḥenjiren nwem ad tellɛen di řexřa-ya řmijař n arebɛin n iseggʷusa uca kenniw ad kiwem tarbum farq-ccɣeř nwem ař ɣa fnant řxecbat nwem di řexřa. 
Anect i řqedd n wussan i tuɣa tᵉttbergagem tammurt, iqqar arebɛin n wussan - aqa ijj n wass d ijj n useggʷas - ad tarbum řmuɛṣiyyet nwem, řmijař n arebɛin n iseggʷusa. Kenniw ad tessnem aqa Necc beɛɛdeɣ xawem. 
Necc d SIDI ssiwřeɣ: Mařa war tteggeɣ ammu ak-d marra tamesmunt-a taɛeffant tenni ikksen awař xafi: ad mmten di řexřa-ya, ad mmten din!” 
Iryazen nni issekk Musa maḥend ad bergagen tammurt, řami dd-dewřen, tamesmunt am tekmeř tedweř ḍidd nnes umi nitni ssiwřen s řɣar x tammurt, 
aqa iryazen nni ibehdřen tammurt, mmuten s ict n jjriḥect zzat i wudem n SIDI. 
Maca Yacuwa, mmis n Nun, d Kalib, mmis n Yafunni, qqimen ddaren jar iryazen nni iruḥen ad bergagen tammurt. 
Issiweř Musa awařen-a ɣar marra ayt n Israil. Iḥzen xenni řgens aṭṭas. 
Uca nitni kkaren zic uca uřyen ař taqiccat n wedrar, nnan: “Aqa-neɣ da uca ad ngeɛɛed ɣar wemcan min xef issiweř SIDI, minzi neccin aqa nexḍa!” 
Maca Musa inna: “Mayemmi tᵉttɛeddam ammu řumur n SIDI? Man aya war iɛeddu! 
War ttgeɛɛidem ca minzi SIDI war ittiři di řwesṭ nwem. War ttejjim ixef nwem ad texsarem zzat i wudem n řɛedyan nwem. 
Minzi ayt n Ɛamaliq d ayt n Kenɛan aqa aten din zzat nwem uca ad tewḍam kenniw s ssif minzi kenniw tiggʷejem x SIDI. S uya SIDI war kiwem ittiři.” 
Maca nitni tuɣa ttuffen maḥend ad dd-ařyen ař taqiccat n wedrar. Maca Ttabut n Řɛahd n SIDI d Musa war ffiɣen zi řwesṭ n řmargeḥ n řɛeskar. 
Xenni hwan-dd ayt n Ɛamaliq d ayt n Kenɛan nni tuɣa izeddɣen deg wedrar nni uca arenyen ten u řebzen ten ař Ḥurma. 
