﻿Di Řexřa.
13.
Issiweř SIDI ak-d Musa, inna: 
“Sekk iryazen zzatek ḥima ad bergagen tammurt n Kenɛan, tenni i ɣa wceɣ i ayt n Israil. I kuř taqbič n řejdud ad tessekkem ijj n weryaz, kuř ijj ad yiři d řḥakem jar asen.” 
Musa issekk i-ten zi řexřa n Faran, x řumur n SIDI. Tuɣa marra iryazen nni d izeǧifen n ayt n Israil. 
Aqa d ina d ismawen nsen: zi teqbič n Rubin, Cammuɛ, mmis n Zakkur, 
zi teqbič n Cimɛun, Cafat, mmis n Axuri, 
zi teqbič n Yahuda, Kalib, mmis n Yafunni, 
zi teqbič n Issakar, Yijɛal, mmis n Yusuf, 
zi teqbič n Ifrayim, Hucaɛ, mmis n Nun, 
zi teqbič n Binyamin, Falṭi, mmis n Rafu, 
zi teqbič n Zabulun, Jaddiyil, mmis n Sudi, 
zi teqbič n Yusuf, i teqbič n Manassa, Jaddi, mmis n Susi, 
zi teqbič n Dan, Ɛammiyil, mmis n Jamalli, 
zi teqbič n Acir, Satur, mmis n Mixayil, 
zi teqbič n Naftali, Naḥbi, mmis n Wafsi, 
zi teqbič n Jad, Ja’uyil, mmis n Maki. 
Aqa ina d ismawen n yeryazen nni issekk Musa ḥima ad bergagen tammurt uca Musa iřaɣa i Huciɛa, mmis n Nun, s yisem n Yacuwa. 
Issekk i-ten Musa ḥima ad bergagen tammurt n Kenɛan, inna asen: “Ařyem ssiha ař Tammurt n Ljanub uca ařyem xenni ɣar idurar, 
uca xzarem mammec teǧa temmurt d řgens i dayes izeddɣen, ma ijhed niɣ iḍɛef i yeǧa, ma aqa din drus niɣ aṭṭas. 
Xzarem ɛawed mammec teǧa temmurt i di izeddeɣ řgens, ma tammurt d taṣebḥant niɣ d taɛeffant i teǧa, u mammec ǧant tneddam i di izeddeɣ řgens, ma zeddɣen di řemrageḥ n iqiḍan niɣ di tneddam ifaryen s iɣebřawen. 
U ɛawed mammec teǧa temmurt, ma tessɣemmi niɣ tuẓeɣ, ma aqa din ticejjura niɣ lla. Ggem taryast uca ksim ca zi řɣiǧet n temmurt. Ussan nni tuɣa aten d ussan n tmenzut n uḍiř.” 
Uca nitni geɛɛden uca bergagen tammurt zi řexřa n Ṣin ař Raḥub, mani ɣa tiwḍed ɣar Ḥamat. 
Geɛɛden ɛad ktar ɣar Temmurt n Ljanub uca iwḍen ɣar Ḥabrun. Dinni i tuɣa Aximan, Cicay d Talmay, nitni d iḥenjiren n Ɛanaq. Ḥabrun tuɣa tᵉttwabna sebɛa n iseggʷusa qbeř Ṣuɛan di Miṣra. 
Xenni iwḍen ař taɣzurt n Ackul uca ssenni kksen ict n tezremt s yijj n uzekkun n uḍiř wenni dd-iwyen s tnayen s yijj n uzeǧaḍ n trebbut. Kksen ɛawed zeg aremmam u zi tazart. 
Qqaren as i wemcan nni taɣzurt n Ickul, isem wanita ixs ad yini ‘taɣzurt n Uzekkun’, di ssibbet n uzekkun n uḍiř nni qessen ayt n Israil din. 
Umi kemmřen arebɛin n wussan, dewřen-dd zeg ubergag n temmurt. 
Ɛeqben nitni uca usin-dd ɣar Musa d Harun u ɣar marra tamesmunt n ayt n Israil di řexřa n Faran, ɣar Qadac, uca wcin řexbar i marra tamesmunt uca ssecnen asen řɣiǧet n temmurt. 
Ḥajan as, nnan: “Aqa nudef ɣar temmurt nni mani d aneɣ tessekked. S tidett tfeyyeḍ s uɣi d tamment u tanita d řɣiǧet nnes. 
Maca řgens, wenni izeddɣen di temmurt, ijhed u tineddam ɣarsent iɣebrawen mɣarent aṭṭas, u neẓra ɛawed arrawen n Ɛanaq. 
Ayt n Ɛamaliq zeddɣen di Temmurt n Ljanub, u Iḥittiyyen d Iyabusiyyen d Imuriyyen zeddɣen deg idurar u ayt n Kenɛan zeddɣen ɣar řebḥar u x tma n L’Urdun.” 
Xenni issesqar Kalib řgens zzat i Musa, inna: “Ejj aneɣ ad ngeɛɛed s jjehd uca ad tt neṭṭef d řwart, minzi nzemmar as neccin!” 
Maca iryazen nni geɛɛden akides, nnan: “War nzemmar ad ngeɛɛed ḍidd i řgens nni, minzi aqa ijhed xaneɣ aṭṭas.” 
Ammu i dd-iwyen ijj n řexbar war iḥřin i ayt n Israil x temmurt nni x tuɣa ttbergagen, nnan: “Tammurt x manis nekka ḥima ad tt nbergeg, aqa d ict n temmurt tsarreḍ imezdaɣ nnes uca marra iwdan nni neẓra, aqa aten d iryazen n waddad imɣar. 
Aqa neẓra din ‘nifilim’, ixs ad yini ‘jjwaheř iwḍan’, ayt n Ɛanaq, arrasa n jjwaheř iwḍan. Tuɣa neccin di tiṭṭawin nneɣ amecnaw tamurɣi uca ammu i dd asen nettban di tiṭṭawin nsen.” 
