﻿Ilawiyyen.
20.
Issiweř SIDI ak-d Musa, inna: 
“Ad tinid i ayt n Israil: ‘Kuř ijjen zeg ayt n Israil niɣ zeg ibarraniyyen, wenni i ɣa iwcin zeg iḥenjiren nnes i Mulak, ad ittwaneɣ nican. Řgens n temmurt ad t yarjem.    
Necc ad qeřbeɣ udem inu x weryaz nni uca ad t qeḍɛeɣ zi řgens nnes, minzi netta aqa iwca zi zzariɛet nnes i Mulak. S uyenni tuɣa issexmej Zzawect inu Iqeddsen uca issexsar Isem amqeddas inu. 
Mařa tarwa n temmurt qqnen tiṭṭawin nsen x weryaz nni, xmi ɣa iwc netta zi zzariɛet nnes i Mulak, uca nitni war t neqqen, 
xenni Necc ad qeřbeɣ udem inu x weryaz nni u x řaǧ nnes uca ad t qeḍɛeɣ zi jar řgens nnes, netta d marra inni issefsaden ixef nsen am ddekkwařen awarni as maḥend ad ssfesden ixef nsen ak-d Mulak.’” 
“Bnadem nni i ɣa iqeřben ixef nnes ɣar yinni issawařan ak-d imettan d igezzanen, maḥend ad dewřen awarni asen am ssfesden ixef nsen, Necc ad qeřbeɣ udem inu x bnadem nni uca ad t qeḍɛeɣ zi jar řgens nnes.”   
“Sqeddsem ixef nwem, iřim d imqeddasen, minzi Necc d SIDI, AREBBI nwem! 
Ḥḍam tiweṣṣa inu uca ggem zzaysent. Necc d SIDI, wenni kenniw issqeddsen.” 
“Maɣar kuř aryaz nni i ɣa ineɛřen x babas niɣ x yemmas, ad ittwaneɣ nican. Inɛeř x babas niɣ x yemmas, idammen nnes aqa aten xas. 
Mařa ijj n weryaz izna ak-d temɣart n weryaz nneɣni, xenni wenni tuɣa izennan ak-d temɣart n jjar nnes ad ittwaneɣ nican, wenni iznan d tenni iznan. 
Mařa ijj n weryaz, am iṭṭeṣ ak-d temɣart n babas, aqa issɛurri řɛar n babas, xenni nitni s tnayen ad ttwanɣen nican. Idammen nsen aqa aten xasen.    
Mařa ijj n weryaz iṭṭeṣ ak-d temɣart n mmis, xenni nitni s tnayen ad ttwanɣen nican. Aqa ggin ijj n uxeǧeḍ ifesden. Idammen nsen aqa aten xasen.    
Mařa ijj n weryaz iṭṭeṣ ak-d ijj n weryaz nneɣni am mammec itteṭṭeṣ weryaz ak-d ict n temɣart, xenni aqa nitni s tnayen idsen ggin ict n řefḍiḥet temɣar. Ad ttwanɣen nican. Idammen nsen aqa aten xasen. 
Mařa imeřc ijj n weryaz ca n temɣart uřa d yemmas, aqa-tt d řefḍiḥet. Ad t sscemḍen s tmessi, netta d nitenti s tnayen, ḥima xenni war tᵉttiři ɛad d řefḍiḥet di řwesṭ nwem. 
Mařa ijj n weryaz iṣṣur ixef nnes ak-d ict n řebhimet, xenni ittxeṣṣa ad ittwaneɣ nican. Ittxeṣṣa ɛawed ad tenɣem řebhimet. 
Mařa ca n temɣart tqarreb-dd ɣar ca n řebhimet mammec ma tegga, maḥend ad kides tfeḥḥeř, xenni ad tenɣed tamɣart d řebhimet. Ad ttwanɣen nican. Idammen nsen aqa aten xasen. 
Mařa ijj n weryaz iṭṭef učmas, yeǧis n babas niɣ yeǧis n yemmas, uca iẓra řɛar nnes uca nettat teẓra řɛar nnes, aqa-tt d řefḍiḥet. Ad ttwanɣen s tnayen zzat i tiṭṭawin n tarwa n řgens nsen. Aqa issɛurri řɛar n učmas, ad yarbu řmuɛṣiyyet nnes. 
Mařa ijj n weryaz iṭṭeṣ ak-d ict n temɣart tenni x iǧa idammen uca aqa issɛurri řɛar nnes, issɛurri anu n idammen nnes, uca nettat simant nnes tessɛurri anu n idammen nnes, xenni ad ttwaqeḍɛen s tnayen zi řwesṭ n řgens nsen. 
War sɛarri ca učmas n yemmac niɣ učmas n babac, minzi xenni issfeṭṭaḥ bnadem řɛar n raǧ nnes. Nitni ad arbun řmuɛṣiyyet nsen. 
Mařa ijj n weryaz, wenni ittᵉṭṭṣen ak-d ɛentis, aqa issɛurri řɛar n ɛemmis, ad arbun nitni řmuɛṣiyyet nsen. Ad mmten břa tarwa.    
Mařa ijj n weryaz yiwi tamɣart n umas, aqa man aya d aɛeddi x weɛzař n temɣart. Aqa issɛurri řɛar n umas. Ad iřin břa iḥenjiren.’” 
“Ḥḍam marra tiweṣṣa inu d marra lfarayiḍ inu uca ggem tent, maḥend war kenniw tᵉttɛuqqi temmurt mani kenniw i ɣa nedheɣ, ḥima ad dayes tzedɣem. 
War ggurem x tebridt n tweṣṣa n řgens nni ɣa ssuffɣeɣ zzat i wudem nwem, minzi nitni ggin marra timesřayin-a u s uya carrheɣ ten. 
Necc nniɣ awem: Kenniw ad twartem tammurt nsen uca ad awem tt-i-dd wceɣ d řwart, ict n temmurt ifeyyḍen s uɣi d tamment. Necc d SIDI, AREBBI nwem, wenni kenniw ifarzen zi jar řegnus. 
X uya kenniw ad tmeyyzem jar řebhayem n řeḥřař d yinni ixemjen u jar ijḍaḍ ixemjen d yinni n řeḥřař. War ssexsaram řeɛmuř nwem ak-d ca n řebhimet niɣ ak-d ca n wejḍiḍ niɣ ak-d ca zi marra min ittbuɛen x temmurt, marra min d awem ḥarrmeɣ, ḥima ad t tḥesbem d řexmej.” 
“Aqa kenniw ad ayi tiřim d imqeddasen, minzi Necc d SIDI d amqeddas uca Necc farzeɣ kenniw zi řegnus, ḥima ad tiřim inu. 
Mařa ijj n weryaz niɣ ict n temɣart ɣares buḥbeř n uɛezzem n imettan niɣ n tgezzant, xenni ad ttwanɣen nican. Ad ten arejmen. Idammen nsen aqa aten xasen.” 
